Ua tuuina mai e le Faamasinoga Feterale a Honolulu sana poloaiga i le malo o Amerika Samoa, ina ia latou totogi i le faletupe o Hawaii le tupe e silia i le $800,000 o loo aitalafu ai i le kamupani a le Marisco Ltd., ona o galuega toe faaleleia ma le siakiina o vaa sa faia e le kamupani i le lua tausaga talu ai.

I le poloaiga a le faamasinoga feterale o loo taua ai e faapea, e $811,631.87 le tupe e totogi atu e le malo faatasi ai ma le tupe tului i le Marisco, talu mai le aso 1 Setema 2009 seia oo ina mae’a le totogiina o lea tupe, faaopoopo i ai ma le totogi o le gaioiga uma sa faia mo lenei mataupu e tusa ma le $12,439.28.

I le talosaga na faila e le kamupani ia Iuni 7, o loo taua ai le tuuina atu e le faamasinoga o le manumalo i le kamupani i le aso 1 Me 2012, talu mai lea taimi, e leai se talosaga apili ua faila e le malo, e leai foi se tupe ua totogi atu.

O le aso 13 Iuni na talia ai e le faamasinoga le talosaga a le kamupani ma tuuina mai ai loa lana poloaiga e faapea, ua poloaina le malo ina ia faamalieina le faaiuga sa tuuina mai e le faamasinoga, mo le totogiina o le tupe i le kamupani a le Marisco.

I le aso Gafua o le vaiaso neie, na faailoa atu ai e le loia a le Faletupe o Hawaii lo latou tuuina atu lea o le poloaiga e pei ona latou maua, ma o loo i ai le tupe a le malo i totonu o le faletupe i le aofai e $824,166.15, toese ai le $95 o le totogi lea mo le tuuina atu o fesootaiga, ona totoe ai lea o le paleni e $824,071.15.

O le mataupu lenei na afua mai ina ua faila e le kamupani a le Marisco sana tagi faasaga i le malo o Amerika Samoa, i lo latou le usitaia lea o tuutuuga o se feagaiga sa latou faia.

O le masina o Mati 2010 na faila ai e le kamupani a le Marisco lana tagi i le faamasinoga feterale i Honolulu, fai mai e $832,671 le tupe o loo nofo aitalafu ai le malo o Amerika Samoa ia te i latou.

O lea aitalafu e afua mai i se tautua ma ni galuega sa latou faatino mo le vaa toso vaa o le Sailele, faapea ai ma isi tautua sa faia i lagisi e lua na faatau mai e le malo i le latou kamupani.

fa’aliliu Ausage Fausia