Ads by Google Ads by Google

FA’ATONU FA’AMASINOGA MALO FA’ATUPE SU’ESU’EGA ITU SIAUMAU JR

Ua talia e le Fa'amasinoga Maualuga se talosaga a le loia a Siaumau Siaumau Jr, ina ia tu'uina atu e le malo o Amerika Samoa se vaega tupe e fesoasoani ai i le faia o su'esu'ega fa'asaga i le mata'upu o lo o tu'ua'ia ai le ua molia, fa'apea ai ma le poloaina e le fa'amasinoga o le malo ina ia o latou sa'ilia mai le vaega tupe e o'o atu i le $260,000.

Na ta'ua i le fa'ai'uga a le fa'amasinoga e fa'apea, o le Loia Sili, Teutupe fa'apea ai ma le Fa'atonusili o le Ofisa o le Paketi a le malo o Amerika Samoa, o le a latou fa'aavanoaina mai le paketi o le tausaga tupe lenei 2010 se vaega tupe e o'o atu i le $260,000, ma ia teuina i se teugatupe fa'apitoa ina ia mafai ona avanoa mo le Ofisa o le Loia Fautua mo Tagata Lautele.

O le totogi mo le fa'atinoina o  lenei mata'upu o le a fa'atupe mai i se teugatupe fa'apitoa e saunia e le malo, ma ia aofia ai i totonu o le paketi o le tausaga tupe 2013, lea e amata atu i le aso 1 Oketopa 2012 ae  mae'a i le aso 31 Setema 2013.

O le fa'ai'uga a le fa'amasinoga na tu'uina mai lea ina ua faila e le itu a Siaumau Jr sana  talosaga i le 25 Aperila ma Me 15 2012, e talosagaina ai se poloaiga a le fa'amasinoga, ina ia fa'atonu le malo mo se vaega tupe e fa'atupe ai su'esu'ega o le mata'upu fa'asaga ia Siaumau Jr.

O le aso 2 Aokuso 2010 na faila ai e le malo moliaga e 11 fa'asaga ia Siaumau Jr, ona o le fa'alavelave na tagatavaleina ai le ali'i leoleo o Det. Lt. Lusila Brown e pei ona tu'ua'ia ai o ia.

O lo o tu'ua'ia Siaumau Jr i moliaga o le fasioti tagata i le tulaga muamua, 2 moliaga o le taumafai e fasioti se tagata, 3 moliaga o le fa'ao'olima i le tulaga muamua, atoa ai ma isi moliaga i le fa'aaoga ma le umia fa'asolitulafono o se aupega matautia e le i lesitalaina, o pulufana, fa'apea ai ma le fa'atupu vevesi i nofoaga faitele.

O le aso 3 Aokuso 2010 na faila ai e le malo sana talosaga i luma o le fa'amasinoga maualuga, e talosagaina ai ina ia fa'asala Siaumau Jr i le fa'asalaga o le oti, ma o lea talosaga ua atagia mai ai le tatau lea ona matua sauni le itu a le ua molia i so o se auala e puipuia ai le ua molia mai lenei mata'upu.

I mata'upu e aofia ai fa'asalaga o le oti, ua matua tapena lelei ai e le Asosi o Loia a le malo tele o Amerika (ABA) i auala e uia e loia mo le itu tete'e i le taimi e fa'afoeina ai a latou fa'afinauga tete’e, ma o isi o ia ta’iala e mana'omia ai e le itu tete’e ni loia se to'alua ua i ai le agava'a ma le poto masani e fa'afoe ma taulima ai mata'upu fa'apenei, o se tagata su’esu’e fa'apitoa fa'apea ai ma se tagata e i ai sona tomai fa'apitoa i mata'upu nei.

O le tagata ua i ai le tomai fa'apitoa o se tasi lea e mafai ona ia fa'ailoa mai le i ai o ni mea molimau i taimi sa tupu ai le fa'alavelave, ma ia feso'ota'i ma gaoioiga a loia o lo o galulue mo le mata'upu.

O le Ofisa Loia Fautua mo tagata lautele, e le masani ona tu'u atu i ai ni vaega tupe mo le taulimaina o ni mata'upu tetele fa'apenei, ae talu ai o lo o gasegase le ulua’i loia na tula'i mo Siaumau Jr, (o ia lea o Tautai Aviata Fa'alevao), ua tofia ai loa loia fautua e to'alua e tula'i mo le ua molia i lenei mata'upu.

E talitonu la le fa'amasinoga, o le talosagaina e le itu tete’e o se vaega tupe e tapena ai la latou itu mo lenei mata'upu, o se talosaga ua talafeagai ma tonu mo lenei taimi, e talafeagai fo'i lona tau pe a fa'atusatusa i se taimi o mata'upu sa tau'ave e ni loia mai fafo i Amerika Samoa nei i ni tausaga ua te’a, lea e tusa ma le $1miliona sa fa'aaluina ai.

O lo o taofia pea i le to'ese le ali'i o Siaumau Jr e fa'atali ai le isi la'asaga o lana mata'upu.

O le fa'ai'uga a le fa'amasinoga na tu'uina mai lea e le afioga i le fa'amasino sili lagolago ia Lyle L. Richmond ma le afioga ia Mamea Sala Jr, le fa'amasino lagolago.