Na fa’aaoga e le afioga i le Loia Sili o le malo o Amerika Samoa ia Talauega Eleasalo Ale le avanoa na fetufaa’i ai ma le Samoa News i le aso ananafi, e fa’aleo ai le agaga fa’amaualalo i tagata uma o le malo o Samoa, atoa ai ma Amerika Samoa nei, ona o se fa’aletonu sa tula’i mai i se taimi ua mavae, ina ua tuai ona kilia i tua le pasese a le MV Lady Naomi mai Samoa.

“Avea lenei avanoa e fai ai a’u ma sui o lo’u Ofisa e fa’atoese atu ai i tagatanuu o le malo o Samoa atoa ai ma Amerika Samoa nei, pe afai sa a’afia se tasi ona o se fa’aletonu na tula’i mai i le tautua a lo’u Ofisa i se taimi ua tuana’i, e leai se manatu e fa’atauagavale i uso mai Samoa, ae o se feeseeseaiga i taimi e taunu’u mai ai le va’a na mafua ai ona tula’i mai lea fa’aletonu laititi”, o se vaega lea o le saunoaga a le loia sili.

O le mataupu lenei na tula’i mai i le masina na te’a nei, ina ua silia ma le itula talu ona taunu’u le Lady Naomi mai Samoa, ae fa’atoa taunu’u sui o le Ofisa o Femalagaaiga ma kilia loa le pasese, e ui ua leva ona taunu’u isi sui o Ofisa o le malo e masani fo’i ona tiute i luga o le uafi e pei o le Ofisa o Tiute, Ofisa o Fa’atoaga atoa ai ma le Matagaluega o le Soifua Maloloina.

Na avea lea fa’aletonu ma itu na saunoa ai ni isi o tama matutua sa malaga mai i le va’a i lea taeao, ma fa’ailoa lagona le fiafia i le fa’atamala o le Ofisa o Femalagaaiga i le fa’atinoina o le latou tiute, ma taua ai e ni isi o i latou e fa’apea, o latou o tagata matutua ma matai o aiga, e le tatau fo’i la ona faia fa’apea i latou.

Saunoa Talauega e fa’apea, o se fa’afitauli na mafua mai ina ua eseese fa’amatalaga na maua e ofisa o le malo i le taimi e taunuu ai le va’a, e ui e i ai lava tulafono ma ta’iala e tatau ona mulimulita’i i ai lona Ofisa i le taimi e kilia ai le pasese a le va’a mai Samoa.

Ina ua fesiligia le loia sili i sona finagalo i saunoaga a ni isi o le pasese o le va’a mai Samoa i le aso lea, fai mai ua pei le faiga o i latou o le faiga o ni ta’ifau, na saunoa Talauega e fa’apea, e leai se manatu fa’apena i lona Ofisa e fai fa’apena tagata mai Samoa.

“E le o latou fo’i o ni ta’ifau po o ni manu (tulou)”, o le saunoaga lea a Talauega

“Matou te le o manatu fo’i fa’apena ia te i latou, pau la matou galuega e fai, o le fa’atino lea o le matou tautua mo le atunu’u, ma le talitonuga ia atoatoa ma lelei la matou tautua, ae afai ua le tusa ma le silasila a le atunu’u la matou tautua, ou te fa’amalulu atu, fa’amagalo mai a outou auauna”, o le saunoaga lea a le loia sili.

O suesuega sa faia e le Ofisa o le Loia Sili e pei ona saunoa Talauega, na maua ai, o le faaletonu na mafua mai ina ua eseese faamatalaga na maua e le Ofisa o Femalagaaiga i le taimi e taunuu ai le va’a, ae ua atili ai ina ua taunuu atu sui o le Ofisa o Femalagaaiga i luga o le uafu, ae tulai mai ai se vevesi ma se sui o le Ofisa o Tiute, ae o lea ali’i e le masani ona i ai i luga o le uafu, e le malamalama fo’i o ia i auala e fa’atino ai galuega a le Ofisa o Femalagaaiga.

Saunoa Talauega e fa’apea, o faiga masani i taimi e taunu’u ai le va’a, e muamua fa’afesootai atu e le Ofisa o Va’a le latou ofisa i le taimi e taunu’u ai le va’a, atoa ai ma le sauni e kilia le va’a, ona fa’atoa aga’i atu loa lea o lana aufaigaluega e fa’atino la latou pito laau.

Sa ia taua fo’i e fa’apea, o le naunautaiga a lona Ofisa, ia latou faia le mea sili e tautua ai le atunu’u.