Na fa’ato’ilalo e le au e i lalo o le 20 tausaga a Samoa le au malosi mai Sikotilani i se ta’aloga mataina i le afiafi o le aso Tofi na te’a nei, i ‘ai e 28-17 i le ta’amilosaga o le Ipu o le Lalolagi mo fanau e i lalo o le 20 tausaga le matutua, lea o lo o talimalo ai le atunu’u o Niu Sila i le taimi nei.

Na faiaina Samoa i lana ulua’i ta’aloga ma le au malosi a Niu Sila i le amataga o le vaiaso i ‘ai e 48-12, peita’i na vaaia le toe finau malosi mai o Samoa mo le sailia o sona manumalo, ma ia toe fa’ato’ilaloina ai Sikotilani, le au sa ia fa’ato’ilaloina fo’i i le sailiina o le tulaga 9 i le Ipu o le lalolagi o le 2011 i Enelagi.

Ina ua mae’a le ta’aloga i le aso Tofi na te’a nei, na taua ai e le kapeteni o le au a Samoa ia Henry Stowers ina ua fesiligia e le au fa’asalalau e fa’apea, “matou te le manana’o lava e fa’aita le tapuaiga a le atunu’u”.

Sa ia fa’afetaia le au maimoa sa mafai ona lolofi atu e tapuaia le latou ta’aloga i le malae i Pukekohe, aemaise ai uo ma aiga o lo o tapua’i mai i Samoa ma Amerika Samoa nei.

E tolu sikoa a Samoa na latou fa’atoilaloina ai Sikotilani i le ta’aloga na te’a nei, ma ua aga’i atu nei le au mo le la ta’aloga fa’aiu o le pool C ma le au malosi a Aferika i Saute i le aso Lua o le vaiaso fou.

O le susuga ia Semo Sititi o lo o avea ma faiaoga o le au a le atunu’u, ma o lo o finau malosi ina ia suia so latou tulaga i le fa’asologa o au a tama aoga e i lalo o le 20 tausaga le matutua, mai le tulaga 9 o lo o i ai nei i se tulaga e maualuga atu.