Ads by Google Ads by Google

Fa’ato’ilalo Manu Samoa ia Wales i luma o le to’a 65,000 tagata

Na matua gugulu le fale matamata o le Millenium Stadium i Cardiff le laumua o Wales i le taeao ananafi, i le pisapisao o le to’a 65,000 o tagata na molimauina le taaloga mataina lea na fa’ato’ilalo ai e le au malosi a le Manu Samoa le au a Wales, i ‘ai e 26-19.

I totonu o le atunuu ananafi, o le toatele o tagata faigaluega e fiafia i le taaloga lakapi sa le’i lelei ni a latou galuega, ina ua faamuamua le tapuaiga o le Manu Samoa, e i ai le talitonuga e faapena foi i Samoa.

O le faatolu ai lea ona faatoilalo e le Manu Samoa ia le au a Wales i luma o ona tagata, atoa ai ma luma o le malae lenei, lea e 74,500 le aofai o tagata e ofi ai i totonu, ae na o le 65,000 na mafai ona  maimoaina le taaloga ananafi.

O le uluai taimi na faiaina ai Wales i le Manu Samoa o le taamilosaga o le Ipu o le Lalolagi i le 1991 i ‘ai e 16-13, o le faiaina lona lua i le Ipu o le Lalolagi i le 1999, sosoo ai loa ma le faiaina ananafi.

O le toilalo popo ai o Wales i lima malolosi o le au a le Manu Samoa ananafi, ua faaopoopo lea i lana faiaina i le au a Agentina i le vaiaso na te’a nei, e ui o lo o avea Wales ma siamupini o le taamilosaga a le Six Nations i le atu Europa, lea e aofia ai Farani, Aialani, Sikotilani, Argentina ma Enelagi.

O se taaloga na amata finau mai lava i ulua’i sekone o le afa muamua seia oo atu lava i toe sekone o le afa mulimuli, ona o le mataina ma le mata’utia o le taaloga i le va o au nei e lua.

O le taaloga a le Manu Samoa ananafi, e le gata e siitia ai le tulaga o Samoa i le faatulagaina o au mai le lisi a le IRB, ae o se taaloga foi e toe totogi ai le to’ilalo popo a le Manu Samoa ia Wales, i le la taaloga i le malae a Waikato Stadium ao faagasolo ai le taamilosaga o le Ipu a le Lalolagi i le tausaga na te’a nei, i ‘ai e 17-10

E na o le 64 sekone o le afa muamua ae laasia loa e Faatoina Autagavaia le laina sikoa a Wales, i se osofaiga mataina na amata atu e le #8 o Taiasina Tuufua, ma maua ai ‘ai e 7 a le Manu Samoa, peitai sa finau mai fo’i Wales i se latou sikoa faatasi ai ma sala e lua na ova i le pou, ma tulai mai ai loa ‘ai o le taaloga i le afa muamua, Samoa 10 - Wales 13.

Ina ua faaauau le afa mulimuli o le taaloga, sa vaaia avanoa na maua uma e au e lua e faatino ai a latou osofaiga, peitai sa le’i manuia.

O se ruck sa faia i le afao le malae a’o ia Wales le polo, na faafuase’i ai ona gaoi mai e Kahn Fotuali’i le polo mai lima o le alii o Beck, lea la te taaalo i le kalapu a le Ospreys, ma tamo’e atu ai loa i le tulimanu o le malae, ao faatali mai e le alii o Jamie Roberts o ia, peitai o le poto o le mafaufau a le alii o Fotuali’i ma le lelei o le taimi na ia pasi ai le polo ia George Pisi, ma faasasa’o atu ai loa Pisi i le fu’a tulimanu ma tatao ai le polo i se tasi o ana sikoa mataina ma le mata’utia, ma tulai mai ai, Samoa 15 - Wales 13.

E lua sala a Wales na ova e mafua mai i ni gaioiga sa faia e le Manu Samoa i totonu o le malae, faapea ai foi ma sala e lua a le Manu Samoa na ova, ma sui ai ‘ai o le taaloga, Samoa 21 - Wales 19.

O le osofaiga mulimuli a le Manu Samoa ina ua toe 78 minute o le taaloga, na kiki ai loa Tusi Pisi le polo agai i le laina sikoa, ma tamo’e atu ai le alii o Johnny Leota ma tatao le polo, ina ua misi mai i lima i ke #9 a Wales, ma tula’i mai ai loa ‘ai faai’u o le taaloga, Samoa 26 - Wales 19.

 Na taua e le flanker a Wales o Ryan Jones, lea na sui tulaga i le latou kapeteni o Sam Warburton na alu i tua e lei uma le taaloga ina ua fesiligia e le au faasalalau, o pu’e misi ma ni isi o mea sese ua mafua ai ona faiaina lana au ia Samoa.

“E lei talitonu le au e mafai ona matou manumalo ia Samoa, afai o lea faatoa maea mai la matou faiaina ia Argentina, sa tatau ona faagalo na mea ae alo e feiloa’i ma Samoa,” o le molimau lea a le sui kapeteni a Wales o Jones.

Sa ia faamatalaina le faiaina i le Manu Samoa, o se tulaga ua matua pagatia ai le pulega a le au, ona o lea ua sosoo a latou faiaina e lua i totonu o le lua vaiaso, ae o lea foi ua sauniuni mai Niu Sila latou te feiloa’i i le vaiaso fou.

Na faamatala e ni isi o le au faasalalau sikoa e tolu a le Manu Samoa, o ni sikoa sa faatinoina e sui a Samoa o lo o taalo lakapi i eleele o Europe e aofia ai ma Wales.

O le taua o malaga taamilo a au a atunuu eseese o le lalolagi o lo o faagasolo i le taimi nei, e mafai ai ona toe fesuia’i tulaga e tatau ona i ai i le lisi o au a le lalolagi, ina ia maua ai ni tulaga lelei mo i latou i le taamilosaga o le Ipu o le Lalolagi, lea o le a faia i Enelagi i le masina o Tesema 2015.

E le na o le Manu Samoa lea o lo o faagasolo lana malaga taamilo i totonu o le atu Europa i le taimi nei, ae o lo o i ai faatasi ma Niu Sila, Ausetalia, Aferika i Saute, Fiti ma Tonga.

Ua maea le uluai taaloga a Niu Sila ma Sikotilani, ma manumalo ai Niu Sila i ‘ai e 51-22. O le ulua’i taaloga a Ausetalia ma Farani na faiaina ai Ausetalia i ‘ai e 6-33.

E lua taaloga a Fiti ua maea i le taimi nei, e lua fo’i ana faiaina. O le taaloga muamua a Fiti na fetaui ai ma le au malosi a Enelagi (England), ma faiaina ai i ‘ai e 54-12, sosoo ai loa ma le la taaloga ma le au a Gloucester, o se tasi o kalapu i totonu o Enelagi, ma toe faiaina ai i ‘ai e 31-29.

O le taeao nei lea o le a taaalo ai Tonga ma USA, ma e lomia lenei ripoti e le’i maua mai se faaiuga o lea taaloga.

Ua alo atu nei le Manu Samoa mo lana taaloga faaiu o lana taamilosaga, lea o le a taalo ai ma Farani i le aso Toona’i o le vaiaso fou.

Lisi o le au a Samoa: F Autagavaia (Northland); P Perez (Eastern Province), G Pisi (Northampton), P Williams (Stade Francais), D Lemi (Worcester, captain); T Pisi (Suntory), K Fotuali'i (Ospreys); S Taulafo (Wasps), O Avei (Bordeaux-Begles), C Johnston (Toulouse), D Leo (Perpignan), T Paulo (North Harbour), O Treviranus (London Irish), M Fa'asavalu (Harlequins), T Tuifua (Newcastle).

Faaleoleo:T Paulo (Clermont Auvergne), V Afatia (Agen), J Johnston (Harlequins), F Lemalu (Mont de Marsan), T Fomai (Hawke's Bay), J Su'a (Tasman), J Leota (Sale), R Lilomaiava (Laulii).