Mai le tu’ufa’atasiga o sao o Ofisa o Fitafita Tuai a le Malo Tele i le Setete o Hawaii, Le Ofisa o Fitafita Tuai a le Malo o Amerika Samoa, Le Ofisa o Faleomavaega Eni fa’apea ma tautua a le OPAD sa mafai ona ona fa’alauiloa mai ni fua o fa’ato’aga ua fa’atautaia e Fitafita Tuai a Amerika Samoa, i latou na fa’aaogaina nei fesoasoani mo fa’ato’aga e totoina i le vai.

O se tasi o fitafita tuai o Apela Afoa sa ia fa’aalia mai le tapenaga o lana fa’ato’aga o lo’o totoina i le vai, ae o lo’o fa’aola ai fo’i le i’a vai o le Tilapia i le vai lava lea e fa’ata’amilo mai ma toe toto ai le toga kapisi lakisi, strawberry, ma isi fuala’au aina fa’apena.

O le eleele ua ova i luga ane o le iliili, ua mafai ona tafe atu i paipa nei ma toe fo’i i le tane vai o lo’o fa’ata’a ma fafaga ai le i’a. O le iliili fo’i lea, e fa’aaoga e ola ai le siama lelei e toe fa’aleleia atili le palapala mo le ola ai o toga la’au ‘aina.”

E i ai pamu e fa’aola mai le eletise e ao ina fa’aaoga i lea fa’ato’aga, ae ua fa’alua nei ona selesele Afoa i lana fa’ato’aga e fa’atau atu lea i le School Lunch Program a fanau a’oga.

Mai le fa’ato’aga a le susuga Ed Avegalio, sa matua folasia le tele o ana fuala’au ‘aina sa toto ae maise o tipoli Tahiti lapopo’a ma le matagofie. O nei oloa uma, sa totoina e fa’aaoga ai le “Hydroponic” po’o le isi fo’i ituaiga o fa’ato’aga e totoina fo’i i le vai. E o’o lava i le talo, sa se’i mai ina ia va’aia le mapo ma le lapopo’a o talo, o fua o lana fa’aeleeleaga ua ‘aina nei.

E ese mai lea to’alua, sa molimauina fo’i le tele o La’au toto i totonu o fale, o se tasi o galuega fa’atino a Aniani Sili. O lea sui sa ia fa’aalia le olaola lelei o ana la’au toto, ma ua tele fo’i ana tagata ua gasolo atu i lana fo’i matata ona o latou teuga falesa, aso fiafia o fanau ma aso o maliu. E mafai ona teuina malumalu i la’au toto, ae maise fo’i o fua o ana la’au toto ua fa’aaogaina mo teu fugala’au ma o latou lau.

O nei mea uma, ua fa’aa’e mai e le vasega o Sui VA po’o fitafita tuai, tulaga o ituaiga o fa’ato’aga fa’aonapo nei e le toe tele na’ua se vaega o laufanua e fa’aaogaina ai, ae ua selesele fo’i i le ta’i 4 i le lima masina fua o latou fa’ato’aga. O le a i ai se taimi o i luma e faia ai se isi fa’aaliga fa’apenei, ae ua to’atele atu nisi o VA ua mafai ona fa’atautaia fa’ato’aga fa’apenei, ma e tatau fo’i ona maimoaina e le mamalu lautele o le atunu’u, ina ia fa’ata’ita’ia mo le lelei lautele o aiga ta’itasi.

“Ona o lenei vaitaimi, ua tau le fiafia tagata e fa’apalapala atigilima, masalo o le ituaiga o fa’ato’aga lenei o le a mafai ona fiafia nisi e fa’atino, e le toe velea ni vao ma tiga ai le tua e punou i lalo.” O le tala ata lea a le susuga Apela Afoa o Taputimu.