Ads by Google Ads by Google

Fa’atino Autalavou Malaeloa - “Togi pa Tau i le ‘Ave!”

Mai le tala sa tusia i le tusi : “Samoa Ne’i Galo” lea e fa’atulafonoina lona fa’atauga e le Matagaluega o Talavou Ta’aloga ma le Aganu’u a Samoa, ae na lolomia mai e le Malua Printing Press i Tamaligi, 2001, ua mafai ona maua mai le auga o le alagaupu, “Ua Togi, Pa Tau i le ‘Ave!”

O le fa’atinoga lea sa faia e le Autalavou Metotisi mo le polokalama fa’apitoa a le AS Humanities, ia fa’amau lea tala, ae maise le alagaupu ma lona afuaga. O lea ua manino le mata o le vai, o se mea na tupu i le afio’aga o Ulutogia i Aleipata, i le vaitau o lo’o soifua ai TuiAtua Tualemoso. O ia lea sa ali’ita’i i ai tagata o lea vaega o le laueleele i Aleipata.

Ona o aga a tamali’i e moemiti i latou ina ia saili malo e ala i so’otaga o gafa, e masani ona latou taumafai e iloa patino aiga tamali’i, o lo’o mafai ona so’ogafa mai i ai o latou fanau, ae maise o latou alotama’ita’i ua ‘Augafa’apae, pe o aloali’i o lo’o fa’aea i ai aiga.

O usuga nei ma mafua ai ona fa’aa’e le ta’aloga o le togi’ulu ma ua fa’aigoaina “ulutautogia” ae uma ane ua avea ai ma igoa o lea afio’aga “Ulutogia” e o’o mai i le taimi nei. O lo’o i ai le alotama’ita’i lalelei tele, ua a’ave tala o lea alo o TuiAtua Tualemoso o Samalamamailagi ma ua atili ai ona tausinio mai le to’atele ina ia togia le ulu tautautasi i le ulu tutasi i le lotolotoi o le a’ai o lea afio’aga.

“E fai vae o tala” na matua a’ave tala i le lalelei o Semalamamailagi ma ua atili ona to’atele i latou e o mai, ma e fano uma lava, aua e mu le foaga ma lafoa’i i le ana i tuafale o Sagapolutele. O lo’o i ai fo’i le papa e fa’ao’o ai le sala i aloali’i uma e le tonu le togi ma e le pa’u ai le ulu tautautasi lea.

Na sau le malaga folau e fagota a le tautai o Alae le igoa, afea le nu’u o Tualemoso, ae fa’alogo ai i lea fo’i i le a’ave o lenei tala, o ia lea na ia lia’i lana pa fagota sili ‘ona ‘aina e i’a, ma lavea tonu ai le ula ma pa’u i lalo.

O le isi maga o lea tala, sa fa’apea ai, o Alae e le o se tautai fagota, ae o le manaia po’o le taule’ale’a o le Tuamasaga, ma ua fa’ailoa fo’i e lea afio’aga ua autu i ai lenei tala, e moni lava o le manaia mai Siumu na sau lava e tauva mo le tama’ita’i o Semalamamailagi, ma e pei lava o lona lea lava tofi aua na togi lava ma tau tonu i le au o le Ulu ma pa’u ai, ae ‘ave ai ma ia le tama’ita’i lalelei o Semalamamailagi!

E lua alagaupu ua maua mai lea tala, “ E fai vae o Tala,” ma le “Ua togi, pa tau i le ‘ave!” O se mea lava ua tautonu ma ua alagatatau ona taua’aoina le fa’ailoga!