Ads by Google Ads by Google

Fa’ateia Peresetene ASRU faaiuga ulua’i ta’aloga au fili tama aoga

Na matua faateia le Peresetene o le Iuni Lakapi a Amerika Samoa (ASRU) i le faaiuga o le ulua’i ta’aloga a le au fili a tama aoga a le atunuu, ma le au a Samoa e pei ona faataunuuina ai i le Apia Park i le Lua na te’a nei (taimi Samoa), a’o le aso Gafua lea i Amerika Samoa nei.

Ua toe faiaina foi le au fili a tama aoga e i lalo o le 19 tausaga le matutua i lana taaloga lona lua i le aoauli ananafi, ina ua faamo’amo’a e le au fili mai Papua Niu Kini i ‘ai e 46-0.

Na taua mai i se ripoti mai Samoa le mataina o le taaalo a le au a Amerika Samoa, le Talavalu Laiti i le taaloga atoa, peitai o osofaiga mataina a Papua Niu Kini ma vaaia ai le maua o a latou avanoa e laasia ai le laina sikoa a Amerika Samoa.

Na faiaina mataga Papua Niu Kini i lana uluai taaloga ma Tonga i le aso Gafua o le vaiaso nei, i ‘ai e 58-0.

E 14 sikoa na maua e Samoa i le la taaloga ma le Talavalu Laiti i le ulua’i taaloga, ae 8 sikoa na maua e Papua Niu Kini i le la taaloga ma le tatou au i le aoauli ananafi i le itula e 1:00.

O le vaiaso fou lea ua faamoemoe e faagasolo ai le taamilosaga lona tolu, lea o le a taaalo ai loa Amerika Samoa ma Vanuatu, ao lumana’i ai lana taaloga faai’u i le Aso Tofi mo le sailia lea o tulaga o le taamilosaga.

O le lona fa ai lea o tausaga talu ona faagasolo le taamilosaga a le Oceania U19s Championship, mo au a tama aoga e i lalo o le 19 tausaga le matutua.

O le faiaina mataga ai o le au fili a tamaiti aoga i lalo o le 19 tausaga le matutua i le au fili a tama aoga a Samoa, i ‘ai e 92-0 na saunoa ai le afioga i le Anava o Taua ia Te’o J. Fuavai e faapea, e tatau ona toe silasila toto’a le Iuni Lakapi i le filifilia o Faiaoga latou te tauaveina au filifilia a le atunuu i soo se taamilosaga.

“E lagona lo’u faanoanoa i auala o lo o filifilia ai e le Iuni faiaoga o au fili a le atunuu, aua e i ai lo’u talitonuga e le o le tulaga lea sa tatau ona i ai le taumafaiga a le au fili a tama aoga a le atunuu, sa tatau ona sili atu se isi laasaga latou te oo i ai,” o le saunoaga lea a Te’o i se faatalatalanoaga ma le Samoa News i luga o le telefoni i le taeao ananafi.

O le 2010 na ulua’i ofi atu ai se au fili a Amerika Samoa i le taamilosaga lenei, lea foi na tatou taalo ai ma Samoa ma tatou faiaina ai i ‘ai e 52-0, a’o le tausaga nei o lea ua sili atu ai ua faiaina ai le au a le atunuu ia Samoa.

“E leai lava sa’u tala o faia i nei mau filifiliga o lo o fai, ae ou te talitonu e tatau ona toe iloilo toto’a e le Iuni faiaoga lelei e tauaveina au fili ma le igoa o Amerika Samoa i soo se falaga maea faavaomalo faapenei, e le gata i le au a tamaiti aoga ae faapena foi i le au fili a tama matutua,” o le saunoaga lea a Te’o mai lona maota i Nuuuli i le taeao ananafi.

Ina ua fesiligia i sona finagalo i auala o lo o tofia ai e le Iuni faiaoga atoa ai ma le filiina o au fili a le atunuu, na saunoa ai Te’o e faapea, “e le o lelei ona tofia faiaoga, e le o lelei foi ona fili au a le atunuu, e foliga mai o lo o fai lava i luga o le masani gaioiga uma o lo o faia i le taimi nei.”

O le au fili a tama aoga e i lalo o le 19 tausaga le matutua, o lo o auai atu i le taamilosaga a le Pasefika o lo o faia i Samoa, le “2012 Oceania U19s Championship” mo le taimi lona lua lenei.

Ole 2008 sa siamupini ai le au a Tonga i le taamilosaga lenei, sosoo ai Fiti i le 2009, Samoa i le 2010, lea fo’i la ua toe alo atu Samoa e puipui lona tulaga siamupini ina ua leai se taamilosaga na faia i le 2011.

A’o le’i tuuvaa ese atu le au fili a le atunuu i le vaiaso na te’a nei, na taua e le faiaoga o le au ia Leaupepe Jerry Chang i le Samoa News e faapea, ua lava tapena le au a le atunuu mo le taamilosaga lenei, e ui o le toatele o tama o le au o le taimi muamua lea ua ofi atu ai i se au faavaomalo.

O le aoauli ananafi i le itula e 1;00 i Samoa, ae o le itula lea e 12:00 i Amerika Samoa nei na faia ai le taaloga lona lua a Amerika Samoa ma le au a Papua Niu Kini.

O le taaloga lona tolu a Amerika Samoa o le aso Gafua o le vaiaso fou i le itula e 2:30 i le aoauli (taimi Samoa), a’o le 1:30 lea o le aoauli o le aso Sa i Amerika Samoa nei, ma lana taaloga faai’u i le aso Tofi (taimi Samoa), a’o le aso Lulu lea i Amerika Samoa nei, e faatulaga ai au mai le tulaga muamua e oo atu i le tulaga 6 mo au uma o lo o i ai i le taamilosaga.

Talosia le alo faiva atu a au tama fanau Amerika Samoa mo ana taaloga faaiu o lo o totoe i le taamilosaga a le Oceania o lo o faia i Samoa.