Ua faamaonia mai e le Taitaifono o le Iuni Lakapi a Amerika Samoa (ASRU) ia Togiola T.A Tulafono, le maea ona sainia o se lisi e iva tausaga, 11 masina i le va o le malo o Amerika Samoa ma le ASRU i le masina o Novema, 2012, mo le nofoaga tuai lea sa i ai le Ofisa o Fitafita Tuai (VA) i Tafuna.

E talitonu le Samoa News, e o o lava fo’i i le alii kovana ia Lolo Matalasi Moliga na faateia o ia i le vaiaso na te’a nei ina ua fesiligia e faatatau i le lisi lenei.

O ni isi o tuutuuga o le lisi e pei ona saunoa Togiola, e le na o le ASRU latou te faaaogaina le fanua ma fale o lo o i ai, ae mafai ona fa’aaoga e Asosi o Taaloga uma i le atunuu ina ia faaleleia ai tulaga tau atina’e o taaloga i le atunuu, ma o lea tuutuuga o le lisi o lo o usitaia e le ASRU e pei ona saunoa Togiola.

Na mafua ona fesiligia e le Samoa News le afioga i le matua e faatatau i le lisi, ona o se tulaga le femalamalamaa’i na tula’i mai i le Aso Faraile na te’a nei, ina ua aga’i atu Togiola ma faailoa i ni tagata faigaluega a le malo sa galulue i le faamamaina o le fanua ma fale, o le fanua ma fale o lo o latou faamamaina ua maea ona i lalo o le lisi a le malo ma le Iuni Lakapi.

Na taua e se molimau i le Samoa News e faapea, o le Matagaluega o Talavou ma Tina na galulue i le faamamaina o le fanua ma fale o lo o i ai, ma le faamoemoe e faaaoga i aoaoga mo tina ma tamaitai.

Na saunoa Togiola e faapea, o ia na alu atu e piki mai lona afafine ua manava i le aso Faraile na te’a nei, ae tau atu ai lana vaai i tagata faigaluega a le malo o lo o galulue mai i le teuina ma le faamamaina o le fanua ma fale o lo o i ai, o lea na afe ai loa ma ia faailoa i ai tulaga o le lisi ua taoto i luga o le fanua lea.

“E tele atina’e ua fuafua e fausia i totonu o fale ua lisiina atu e le malo i le ASRU, ma o nei atina’e e felagolagoma’i ai le ASRU ma isi Asosi o Ta’aloga i le atunuu, ona o le agaga ia mafai ona atina’e taaloga uma i le atunuu ina ia lelei,” o le saunoaga lea a Togiola.

Talu ona maea le sainia o lea lisi, o le ASRU, Asosi Judo ma le Vaega o Fusuaga lea ua latou faaaogaina se tasi o fale e faatino ai a latou taaloga ma koleniga.

“Ua faalua ona api le au lakapi a le atunuu o lo o faamoemoe mo taamilosaga i fafo, ae o lea fo’i o lo o faaaoga e le vaega o fusuaga ma le Judo le fale lapo’a mo a latou faagaioiga ma koleniga i aso taitasi, lona uiga o lea lava o lo o tausisi le ASRU i tuutuuga o le lisi, e le na o latou e faaaogaina le fanua ma fale ae tatala le avanoa i soo se Asosi o taaloga i le atunuu,” o le saunoaga lea a Togiola.

O le fale lapo’a lea sa masani ona fai ai Bingo ua faamoemoe o le a tuu ai masini mo toleniga a tagata ta'a'alo, ae o le fale laititi o lo o pito i luma o le auala tele, lea na faaaoga e le polokalame a le NEG i tausaga ua mavae, ua fuafua e fausia ai le Ofisa autu a le ASRU, ae o isi potu e lua o lo o sosoo atu ai ua faamoemoe e tuu ai i totonu T.V tetele e lua e faaaoga i aoga (training) a Faiaoga ma Laufali mo so o se taaloga.

Saunoa Togiola e faapea, e i ai se vaega tupe fesoasoani (grant) o lo o fuafua e maua mai i le IRB, lea ua faamoemoe e faatau ai mea faigaluega e koleni ai au taaalo ma toe faafou ai fale ua tele ina fa’inaelo ma talepe e tagata.

Na asia e le Samoa News lea nofoaga ananafi ma molimauina ai le matua faaleagaina o totonu o fale e tagata, e ala i le tata’e o fa’amalama atoa ai ma le faapupu o puipui i totonu.

O le fale tele lea sa masani ona fai ai taaloga Bingo, o le isi itu o lo o i ai le maea fusu ae o le isi itu o lo o fola ai kapeta o lo o faaaoga e le Asosi Judo i a latou koleniga ma ta’aloga

O le a faaopoopo i le vaega tupe fesoasoani mai le IRB le isi foi vaega tupe lea o lo o fuafua e maua mai i le Komiti Faavaomalo a le Olimipeka (IOC), ma faamaea ai loa le faafouina o nofoaga e pei ona taua.

Ina ua fesiligia Togiola po o i ai se fuafuaga e fausia ni isi fale fou i luga o le fanua mo le faaleleia atili o koleniga a au taaalo, sa ia taua ai e faapea, o le isi lea fuafuaga o lo o vaavaai i ai le ASRU, o le fausia lea o se fale koleni lelei e faaaoga e au taaalo.

“Ua atoa nei le 4 masina o faia fesoota'iga ma kamupani e gaosia fale u'amea (Steel Buildings), o lo o faamoemoe e gaosia ai se fale tele e mafai ona koleni ai ni taaloga eseese se lua pe tolu i le taimi e tasi.  E leai ni fale lelei a le atunuu po o le malo o i ai i le taimi nei, o le ala lea o le faamoemoega i a te a'u, e taumafai, e ala i porokalame a le IRB, se fale faapenei, a le o lea, o le faatuina lea o se "High Performance Center", pei fo'i ona faamanuiaina ai Samoa i lena fuafuaga a le IRB,” o le saunoaga lea a Togiola.

Sa ia taua foi e faapea, o lo o faatagaina mai e le Iuni a Samoa le o atu o la tatou au ta'ito'a fitu e a'oa'o ai pei ona faia i le tausaga ua te'a, peita’i o le faamoemoe maualuga, ia maua fo'i sa tatou lava fale, poo le fausia fo'i i ni alagatupe e maua lava i lenei itu, se fale e aoga mo le a'otauina o taaloga ma tausinioga mo alo ma fanau talavou e le gata mo le taaloga lakapi, ae fa’apea fo’i isi faaagatama o lo o tauva i tausinioga faa-Olimipeka.

O le lisi e pei ona taua e Togiola, e le gata ua maea ona lesitala ae ua maea foi ona totogi atoa le tau o le lisi i le malo.