Ads by Google Ads by Google

FA’ATEIA TO’ATELE LISI MA LE PULEGA MANU SAMOA UA FAALAUILOA

O le to’atele o tagata e lagolagoina le taaloga lakapi ma le au a le Manu Samoa na faaalia lo latou faateia tele, ina ua faalauiloa mai e le faiaoga fou a le Manu Samoa ia Steven Betham le lisi o le au atoa ai ma le pulega, ua maea ona filifilia mo le malaga taamilo i le Atu Europa i le masina fou.

O nisi o vaega na faateia ai paaga masani a le au e le gata ua toe valaaulia le toatele o sui o le au na aofia i le au na auina atu i le Ipu o le lalolagi i Niu Sila i le tausaga na te’a nei, ae ua faapea foi ona filifilia ai ma se tasi o alo o le atunuu na taalo i le Manu Samoa e avea ma faiaoga lagolago, susuga Pat Lam.

O le susuga Lam lea na faatea ese e le au a le Auckland Blues a Niu Sila, sa avea muamua ma kapeteni o le Manu Samoa i tausaga ua mavae ao ia laeiina le ofu #8, ua tofia nei o ia e avea ma faiaoga o le mafaufau ma gaioiga osofa’i a le au (attack and mentor coach), ae o le susuga ia Tom Conventry, o le faiaoga lea o le au a le Chiefs lea o lo o umia le siamupini o le taamilosaga o le Super 15, ua filifilia e avea ma faiaoga mo le laina i luma (forward coach).

O le toatele o tama mai le toa 30 ua filifilia o lo o taaalo i a latou konekarate i Europa, sosoo ai ma nisi o loo i Niu Sila ma Iapani, ma le toalua o lo o filifilia mai i Samoa, o i laua ia e aofia ai Reupena Lavasa ma Robert Lilomaiava o nisi o sui o le au taitoa 7 a le Manu Samoa.

I se pepa o faamatalaga na tuuina mai i le Iuni lakapi a Samoa i le vaiaso nei, o lo o taua ai le avanoa mai o nisi o sui iloga o le au e pei o Seilala Mapusua ma Alesana Tuilagi o lo o taalo kalapu uma i Iapani.

E le o i ai i totonu o le pepa o faamatalaga na tuuina mai e le Iuni Lakapi a Samoa, se faamatalaga mai le alii faiaoga e faatatau i le tulaga ua i ai tapenaga a le au a le atunuu, peitai e le tau faailoaina le tulaga lauiloa o le alii faiaoga ia Betham ao avea ma faiaoga o le au taitoa 7 a le atunuu, ina ua siamupini i le taamilosaga taitoa 7 a le IRB i le 2009/2010.

E toa 6 sui o le au a le Manu Samoa o loo taaalo konekarate i Farani, toafa o lo o taalo konekarate i Iapani, toa 5 i Niu Sila, toa 8 i UK, toatasi i Aferika i Saute ma le toalua mai Samoa.

E toafa sui o le au taitoa 7 a le Manu Samoa ua filifilia i le au tele a le atunuu, o i latou ia e aofia ai Ofisa Treviranus,  Robert Lilomaiava, Reupena Lavasa, Paul Perez ma Faatoina Autagavaia.

O le aso 29-31 o Oketopa ua faatulaga e le alii faiaoga e feiloai faatasi ai le au i Niu Sila, ao lei tuuvaa atu mo lana taamilosaga, ae ua faamoemoe o le aso Gafua o le vaiaso fou, tusa lea o le aso Lua lena i Samoa, o le a tuua ai e le au le atunuu mo Niu Sila ma faaauau atu ai loa i Europa.

FORWARDS

SakariaTaulafo  - UK,  LogoviiMulipola – UK,  Census Johnston – FRA,  ViliamuAfatia – FRA,  Tii Paulo – FRA,  Ole Avei – FRA,  Daniel Leo – FRA,  Fa’atigaLemalu – NZ,  Joe Tekori – FRA,  Filo Paulo – NZ,  TaiasinaTuifu’a – UK, OfisaTreviranus – UK,  MaurieFa’asavalu – UK,  TivaniFoma’i – NZ,  Kane Thompson – JPN

BACKLINE

RopetiLafo, Kahn Fotuali’i – Wales, Jeremy Su’a – NZ, AuvasaFalealii – NZ, TusiPisi – JPN,  KiAnufe – NZ, Setaimata Sa – UK, SeilalaMapusua – JPN, Paul Williams –UK, Robert Lilomaiava – Samoa, David Lemi  – UK, ReupenaLevasa – Samoa, Paul Perez – SA, Fa’atoinaAutagavaia – NZ and AlesanaTuilagi – JPN

MANAGEMENT

Head Coach: Stephan Betham, Team Manager: Namulauulu Sami Leota, Assistant Coach (Backs): Daryl Suasua, Assistant Coach (Fwds): Tom Coventry, Scrum Coach: Mike Casey, Defense Coach: Greg Smith, Attack & Mentor: Pat Lam, Performance Analyst: Marcus Agnew, Video Analyst: Junior Narayan, Doctor: Sean Mauiliu, Physiotherapist: Matt Taylor, Trainer: Mike Deasley.   

O le taaloga muamua a le Manu Samoa o le a fetaui ai ma le au a Kanata i le aso 9 Novema, sosoo ai Wales i le aso 16 Novema, ae faaiu ia Farani i le aso 24 Novema.

Fesootai mai i le tusitala ia ausage@samoanews.com