E lua itu malie na tutupu ananafi ao faagasolo le mataupu a James Barlow i luma o le faamasinoga maualuga, e le gata na tula’i Barlow ma faailoa i le faamasionaga lona mana’o e faate’a lana loia fautua o lo o i ai, ae na faasala foi e le faamasino sili ia Michael Kruse le loia a le malo, i lona le usitaia o le poloaiga a le faamasinoga sa tuuina atu ia te ia muamua, e aua ne’i faalavelave i le taimi e tautala ai le loia a le itu tete’e.

Na fa’ateia le faamasinoga ina ua sauni e faafofoga i molimau a le malo mo le mataupu faasaga ia Barlow, ae tula’i faafuase’i le ua molia ma faailoa i le faamasinoga, ua mana’o e tuli lana loia fautua o lo o i ai ae saili se isi ana loia fou.

“Lau afioga, ua ou mana’o e tuli ese le loia lea ae aumai se isi a’u loia fou,” o le tala lea a Barlow i alii faamasino, a’o tula’i i tafatafa o lana loia fautua ia Mark Ude.

“O ai lena ua e mana’o e fai ma au loia,?” o le fesili lea a Kruse ia Barlow, ae na tali le ua molia, “O lea matou te vaavaai i le lisi mai fafo ma totonu o le teritori, mo se loia na te fautuaina a’u.”

“O le a le umi e te mana’o e tuu atu e le faamasinoga e saili ai sau loia, ?” o le isi fesili lea a Kruse, ae na tali Barlow, “lua masina....”

Na faailoa e Kruse ia Barlow e faapea, o le atugaluga o le faamasinoga o lo o i ai i lana mataupu, ua fai si umi o taofia o ia i le falepuipui e aunoa ma le faagaioi o lana mataupu, ui o lea, e i ai fo’i lona aia faaletulafono na te filifilia ai se loia e mana’o o ia na te fautuaina o ia.

O ananafi na faatulaga e faia ai le faamasinoga autu a Barlow (Bench Trial) i luma o le faamasino sili ma alii faamasino lagolago ia Logoai Siaki ma Faamausili Pomele, talu ona taofia ai o ia i le aso 8 Mati, 2012, ona o tuuaiga i lona faia lea o uiga mataga i ni tamaiti se toatolu e talavou i lalo o le tulafono, ae ina ua faailoa e Barlow lona mana’o ina ia suia lana loia, ua manatu ai loa le faamasinoga e tolopo lenei mataupu seia aulia le tausaga fou.

O Barlow, lea sa galuega o se faiaoga i le Kolisi Tuufaatasi a le malo, o lo o tuuaia i moliaga mamafa e fitu, lea e aofia ai le faia o uiga faasotoma i fanau laiti, faia o uiga mataga i fanau laiti, atoa ai ma le tagofia o itutinosa o fanau e talavou i lalo o le tulafono.

Ina ua valaau le mataupu a Barlow ananafi, na muamua faafofoga le faamasinoga i talosaga sa faaulu e Ude, e pei o le talosaga e solofua ai moliaga faasaga ia Barlow, ona o le latou faamatala o le malo i le le tuuina atu o faamaumauga uma e uiga i lenei mataupu.

Sa i ai foi le isi talosaga na faila e Ude i le faamasinoga, ina ia aua nei iloiloina e le alii faamasino sili ia Kruse le mataupu a Barlow, ona o nisi o tulaga e manatu le itu tete’e e feteena’i ai ma faaiuga a le alii faamasino talu ona ia amata iloiloina maia lenei mataupu.

Na taua e Ude e faapea, talu lava ona amata mai lenei mataupu, sa ia talosagaina pea le loia a le malo ia Mitzie Jessop ina ia tuuina atu mau faamaonia uma o le mataupu sei vaavaai i ai ma tapena mai ai mo le faamasinoga, peitai e oo mai lava i le taeao ananafi e i ai isi faamaumauga e lei tuuina atu lava e le malo.

Sa ia talosagaina foi le faaiuga o le suega sa faia i le taimi na faamanava ai Barlow i le masini mo le sueina o le ‘ava malosi i lona tino, peitai e lei tuuina atu e le malo.

Na finau Ude i le faamasinoga e faapea, na mafua ona ia talosagaina faamaumauga a le malo, ina ia lava tapena ai laua ma Barlow i le taimi e finauina ai le la mataupu, a’o lea ua oo mai lava i le taimi e amata ai ona iloilo e le faamasinoga le mataupu e le’i tuuina atu uma e le malo faamatalaga e tatau ona la iloa.

Na tuuaia foi e Ude le malo i lo latou faaaogaina lea o ni tamaitai loia se toalua mai le Ofisa o Loia Fautua a le malo, e fesoasoani i le suesueina o lenei mataupu, e ala i le fai lea i loia e fesili i alii talavou na aafia i le mea moni sa tupu.

A’o faaleo e Ude lana faafinauga, sa fai lava ma tali atu Jessop e ui e le’i tuuina atu e le faamasinoga le avanoa e saunoa ai, ma ina ua toe fai faalua e Jessop le tali atu a’o saunoa Ude, na faasala ai loa e Kruse o ia i le $100.

Na taua e le itu a le malo e faapea, ua uma ona tuuina atu ia Ude faamaumauga uma sa ia talosaga mai i ai e uiga i lenei mataupu, ma e le iloa poo ai isi faamaumauga o lo o manao ai.

Na teena foi e le malo tuuaiga a Ude faapea, sa faaaoga e le malo loia a le Ofisa o Loia Fautua latou te suesue ma fesiligia alii na aafia, mo le tuuina atu o nisi faamatalaga mo le malo.

Na teena uma e le faamasinoga talosaga na faaulu e Ude, ae poloaina le malo ina ia valaau a latou molimau mo le amataina o le faamasinoga, ae talu ai o le tula’i faafuase’i i luga o Barlow ma faaali lana talosaga i le faamasinoga mo sana loia fou, ua mafua ai loa ona toe tolopo lenei mataupu e toe fofogaina i le aso 3 Fepuari, 2014.

O lo o taofia pea i le toese Barlow ina ua le mafai ona ia totogiina le $100,000 sa faatulaga e tatala ai o ia i tua.