Ads by Google Ads by Google

FA’ATAUTO MATAILUPEVAO LEUPOLU AVEA MA LOIA

O le taeao o le aso Lulu na te’a nei na fa’ataunu’uina ai le fa’amoemoe maualuga o le susuga Matailupevao Leupolu, ina ia 'avea o ia ma se tasi o totino o le Asosi a Loia e tautua i Amerika Samoa.

Ua mae’a fa’atauto ma fa’amau lona suafa e 'avea ai ma Loia i Amerika Samoa i le sauniga fa’apitoa na osia e le afioga le Fa’amasino Sili Michael Kruse ao molimauina e lona faletua, Feagia’i Le’upolu, le afioga le Aloali’i Afoa Moega Su’esu’e Lutu ma ni isi o sui o lona aiga ma le Ofisa Loia o lo ’o galue ai i le taimi nei, Afoa Moega Su’esu’e Lutu Law Office.

O le susuga Matailupevao [Lupe] Leupolu o se alo e fa’asino ia Leupolu Maniti Leupolu o Uafato, Fagaloa ma Vafulisia Atualevao o Aoloau, Amerika Samoa. Na fa’atautoina o ia i le taeao o le aso Lulu na te’a nei, ma ua 'avea ai o ia o se sui fou lava o le American Samoa Bar Association, po ’o le Asosi a Loia i Amerika Samoa lea, ma ua agava’a ai o ia e tula’i mo ni isi i luma o le Vaega o Fa’amasinoga Maualuga o Amerika Samoa.

I le tausaga 2011, na mae’a fa’aulu ai le ali’i loia o Matailupevao Le’upolu i luma o le Fa’amasinoga Maualuga i Palau, ma ua mafai fo’i e ia ona tula’i mo ni isi i luma o lena fa’amasinoga mamalu, o se tasi o teritori o le Malo tele o Amerika.

O lona soifua a’oa’oina, na mae’a fa’au’uina o ia mai le Kolisi Tu’ufa’atasi o Amerika Samoa i le tausaga e 1984, peita’i, na fa’amanuiaina ana taumafaiga ma 'avea ai o se sikolasipi e a’oga i  Hawaii Loa College i Kaneohe, Hawaii.

Na fa’ai’u ma le manuia fo’i taumafaiga i lea lava kolisi i le tausaga e 1986 ma maua ai lona fa’ailoga o le Bachelor of Arts i le Political Science. Peita’i, na toe si’itia ana a’oa’oga fa’aloia mo lona fa’ailoga Juris Doctor mai le Iunivesite o Oaklahoma, College of Law, Norman Oaklahoma i le tausaga e 1989.

 Na amata faigaluega o ia o se Law Clerk i le Ofisa Loia o Roy Hall J.D. Jr. ina ua taliu mai i fanua, ma toe taliu ane ai faigaluega o se ali’i Loia Fesoasoani ma se Loia Clerk i le Ofisa Loia o Afoa Moega Su'esu'e Lutu e pei ona tumau ai pea e o’o mai i le taimi nei ma ua atoa ai lona 12 o tausaga o lana tautua.

O lo ’o 'avea fo’i o ia ma Faia’oga i Mata'upu Fa’a-loia i le ASCC e afua mai le tausaga 1997 e o’o mai ia Ianuary 2012. A’o i ai o ia i le Kolisi, na avea ai o ia ma Taitaifono o le Criminal Justice Dept mai le tausaga e 2004 se’ia o’o ina fa’amavae aloa’ia o ia ia Ianuari, 2012.

Peita’i, o lo ’o 'avea pea o ia ma sui o le Assessment & Curriculum Committees, ma e ia te ia le agaga fiafia tele e faia’oga i le tupulaga talavou lea e tausa'ilia o latou fa’ailoga fa’aloia mai la tatou kolisi. O lea galuega, ua latalata ona atoa ai le 15 o tausaga o lana tautua i le fanau tausa'ili atamai.

Ua mae’a fa’aipoipo le ali’i loia i lona faletua o Feagia’i Leupolu, ma e to’afitu lana fanau. O i la’ua ma le faletua ma le fanau o lo ’o tautua i le Atua e ala i le Ekalesia Assembly of God i Faleniu, ma o lo ’o 'avea fo’i o ia ma Failautusi o le A’oga Aso Sa i latou itumalo i Amerika Samoa, ma o se tofiga lea ua matua fa’afiafialoto ia te ia, aua ua ono tausaga o ia umia pea.

O mata'upu ua mafai ona fa’asifo 'augafa i ai tomai fa’apitoa o le susuga Matailupevao Leupolu e tula’i ai mo ni isi o le atunu’u ma le malo, e aofia ai: Workmen’s Compensation, Personal Injuries, Suafa Matai, Fanua, Feagaiga Fa’apisinisi , Uili ma isi lava ala o le Tulafono o lo ’o fa’afailele ai lo tatou malo ma lo tatou va tu’utu’u nonofo ai.