O le aso ananafi sa fa’atuina ai le nofoaga fa’apitoa e fesoasoani ane ai le PAIMI [Protection & Advocacy for Individuals for Mental Illness] i le mamalu o le atunu’u, o lo’o ua matauina, ua le mataituina a latou aia tatau e so’o se tasi, pisinisi ma so’o se Ofisa e ao ina tautuaina ai i latou.

Ona o le aso lea sa patino i le lalolagi mo i latou ua fa’agasegasea i ma’i fita tau le Mafaufau, o lea ua fa’atautaia ai lea nofoaga ina ia toe fa’ao’o fo’i le tautua i le mamalu lautele o le atunu’u.

O le falema’i, ua i ai nei le foma’i fa’apitoa mo gasegase o le mafaufau, ma e tatau lava ona i ai se foma’i fa’apea i le tatou Falema’i po’o le atunu’u fo’i, ina ia mafai ona va’aia gasegase ma fa’amauina, le to’atele ua a’afia i gasegase tumau fa’alemafaufau.

I le taimi na faia ai le a’oa’oga fa’apitoa mo tausima’i uma ma foma’i e togafitia so’o se gasegase, ina ia tima’i i latou i tulaga o faila ia le mafai ona iloa fua e nisi fa’amaumauga i faila o e mama’i, sa patino ai le tautalaga i gasegase nei o le Mafaufau.

“Pau lea o tagata e matua le mafai e se tasi ona fa’ailoa atu i fafo ni fa’amaumauga o i ai, se’i vagana ua mae’a fa’ataga mai e le tagata lava ia e ona le faila, e o’o fo’i i le foma’i e le mafai ona ia fa’ailoa atu se fa’amaumauga o nei gasegase i so’o se tasi e mana’o ai.”

I le fa’amatalaga mai le tama’ita’i sa tautuaina le lautele i lea nofoaga i le falema’i, Denise Thomsen, sa ia fa’ailoa mai ai, “E tusa ma le 50 i latou na asia le Ofisa o le PAIMI ina ia fesoasoani ia i latou i tulaga o latou aia tatau ua sofa’i e nisi o matagaluega ma tagata ta’ito’atasi, ma ua le tutusa ona tautuaina i latou fa’atasi ma isi sa latou sulufa’i atu mo se fesoasoani!”

“O le tausaga lea e 2011, peita’i, i le tausaga lenei e 2012, ua fa’aititia mai na’o se 40 pe a, ae o le a maua tonu mai se taimi e le o toe mamao le aofa’iga tonu. O le tele fo’i o nei fa’asea, o le sui lava e to’atasi ae tolu pe fa ana mataupu e fia finaua’ia o lo ia fa’aulu mai!”

Ina ua fesiligia e tusa o nei uso ma tuagane ua va’aia pea le nofonofo solo ma ua talosaga mai i ni tupe e fa’atau ai se mea’ai i nofoaga faitele, ma se latou fo’i fesoasoani o lo’o fa’avasega mo sui nei, ae fa’ailoa mai, “O lena vaega o le tautua o lo’o lafo atu lea i le Pualele Center, lea e feso’ota’i a latou tautua ma le DHSS ina latou fesoasoani i sui na, aua e mautinoa lava ua le atoa le malosi o le mafaufau.”

O le faletua o Masele Iafeta, o le Pua Center, o se Fa’alapotopotoga o lo’o fa’atautaia fa’atasi mai i le fa’amalu o le Matagaluega mo Alagamanuia mo Tagata Lautele, DHSS, sa ia fa’apupula le tele fo’i o le tautua o lo’o ofoina mo i latou nei e va’aia pea e tagata lautele, o nofonofo solo, aisi sina tupe mo se mea’ai, ma ua palapala fo’i lavalava, e foliga mai e le o tausia lelei.

“O le vaega lena o le atunu’u e le o to’atele na’ua, e le silia i le to’a 10 i latou, ae fai lava si o latou faigata. E tele ina va’aia e tagata o tutu solo, e palapala la’ei, ae aisi fo’i mo se mea’ai.”

Ona o le vaega tonu lea e tatau ona tautuaina, o lea ua fa’ailoa mai ai e Iafeta, “O lo’o tautuaina e i matou i latou na! E matua o atu lava ta’avale, aumai i latou pe a va’aia i nofoaga faitele ua tutu po’o nofonofo ai, fa’ata’ele i latou i le matou nofoaga i Paka Liona, ae fa’aofu i ofu mama, selu ulu ona fa’ato’a ave ai lea i le falema’i mo latou tui e fa’anofo filemu ai. O galuega nei e faia ta’i vaiaso. Peita’i, e avea lava i latou i latou aiga, ma o i’ina lea e toe o ese mai ai fo’i ma toe faia fo’i lea masani e va’aia e le mamalu lautele o le atunu’u!”

Ona o lenei aso ua patino mo nei uso uma, alofa ane oe, fai se galuega alofa ia i latou pe a va’aia o tutu solo, momoe solo, vala’au le numera a le Pua Center - 699-4144, 699-4155 mo se fesoasoani e avea ai i latou e ta’e’ele ma fai ni ofu mama, ma faia fo’i togafitiga, e nonofo filemu ai mo sina taimi i latou aiga!

Fa’afetai fo’i ia i latou uma e foa’i ma le loto i nei uso, o mea nei o ma’i tiga fa’apenei, e le mailoa lava le a’afia ai fo’i o se tasi o i tatou lautele, o lo’o manatu lava e le o’o i gasegase nei i lona olaga, ae a o’o mai, a’o i ai se isi na te faia se galuega lelei mo oe, le ua afaina!