Ads by Google Ads by Google

FA’ATAUA NUUULI POLYTECH AGANUU A SAMOA

O le aso Faraile na alausu ai le fanau a’oga a Nuuuli Polytech i latou aso e fa’atino ai fe’au fa’asamoa, o tiute fa’ale-aganu’u, ae maise o le gaosiga o mea taumafa ma galuega taulima fa’asamoa e fa’aaoga i ai taimi i totonu o le aiga ma nuu.

Na amata lava le taeao ina ua mae’a le tatalo ma le sauniga lotu na si’itia ai le fa’amoemoe o le fanau a’oga i le Atua i le ‘ava usu o feiloa’iga a le fanau a’oga ma i latou na totofi e fa’amasinoina a latou gaoioiga fa’aleaganu’u ua saunia, ae tainane fo’i le vasega o matua na auai atu, ma le lasilasi o le pulega ma taupulega a le A’oga Maualuga o Matata Eseese.

O le ava usu sa tapena lea e le vasega o fanau a’oga ua sauni e fa’au’u mai le Polytech i le fa’ai’uga o lenei tausaga a’oga. O le taupou na palua le ‘ava o le usu, o le Tausala a le a’oga Matata Ese’ese 2012, Sharon Leota. Na agaia le ‘ava e le aumaga a le vasega 12.

I le Sula Toga a tama’ita’i sa tauva ai le tama’ita’i o Natiailefatu Misipati mai le vasega 9, Paese mai le vasega 10 na iloga le atamai tele e faia lea matata, Tafaoga Asiata mo lana vasega 11 ma Mele Taliga mo le vasega fa’ai’uaso.

O le folafola ‘ava po’o le sufi ‘ava a taulele’a sa fa’atino ai e le ali’i talavou o Joseph Taufete’e Fa’atiga le folafola ‘ava mo le vasega 9, soso’o ai ma le susuga La’asia La’asia mo le vasega 10, misi atoa se sui mai le vasega 11 ae na fa’ai’u i ke taumafaiga a le ali’i o Demetris Ulberg mo le vasega 12.

O le folafolaga o Sua sa soso’o ai ma sa iloga lava fo’i ona saofa’i ai le tama’ita’i mo le vasega 9, o le ali’i o Shaun Faiai mo le vasega 10, Philip Toilolo mo le vasega 11 ma le sui fo’i o le vasega 12. O le Folafola To’ona’i sa oso mai ai le ali’i o Lei Sam Sioka mo lana vasega 9, o Setu sa ia taumafai mo le vaseg 10, Patolomeo Maugaotega mo le vasega 11 ae o Tago mo lana vasega fa’ai’uaso.

Na soso’o lea o na fa’aaliga, ma le alo loa o fanau e faia fe’au fa’asamoa e masani ona fa’atino i totonu o aiga, e i ai le Lalagaina o le Ato Fu’e Umu i le launiu. Na matua matagofie le maimoa i le fanua e masani e faia nei tiute ae matua alolofa atu lava i fanau e le o masani ai, aua o lo’o taumafai. Na mua mamao le ‘ato a le tama’ita’i o May Taliga mo lana vasega 10, ae o le sui o le vasega 9 o Natia Misipati, Vasega 11 Paea’i Milikini ma le vasega 12 o Fa’agoto Tauiliili.

O le lalaga ma’ilo mo mea tausami na soso’o ai a le fanau teine ma tama, ma sa iloga la ona faigofie lea meataulima i le fanua, ma sa vave tele lea itu o ta’aloga fa’atauva Na manumalo le vasega 12 i le itu  teine ae manumalo le vasega 9 i le itu a tama i lena ta’aloga.

O le o’aina o le popo a tama’ita’i na maua lea e teine o le vasega 9 ma le o’a popo a tama sa maua lea e le vasega 11. I le fofo’e fa’i o le saka sa manumalo ai le vasega 10 i le itupa o tama’ita’i ma le vasega 12 sa manumalo i le fofo’e fa’i a tama.

O le paga na soso’o ai o Alexander ma Sia sa la’ua laeia le lau o le Suipi. O le paga tauva mo le vasega 11 o le tama’ita’i o Tepora ma lana soa sa laei fo’i e i la’ua lau o le suipi. Peita’i o le paga tauva a le Vasega fa’ai’uaso o le ali’i o Fano Suka ma le tausala o Taisamasama sa la’ua laeia le lau o le Teuila ma ona fua e saunia lelei ai o la’ua sei ma ula.

O fa’afiafiaga i Sasa, Mauluulu ma Taualuga na fa’ai’u ai le polokalama fa’apitoa a le a’oga maualuga i Polytech i le aso ananafi, ma sa iloga ona matagofie ma lava tapena lelei o latou sao i lea fo’i itu i a latou toniga felanulanua’i sa fa’afetaia ai fo’i le sao o matua i nei fo’i aso iloga o a’oga a le fanau.