Ads by Google Ads by Google

Fa’ataua lou Tala Fa’asolopito: Fa’amau ma Fa’atumau

Pe afai o e soifua pea i le aso, o le tala fa’asolopito o lou olaga o lo ’o fa’aauau pea, ae afai ua mou atu mai lenei olaga, o lona uiga ua mae’a lou tala fa’asolopito! I tatou uma o lo ’o soifua ma faia tiute masani e fa’aauau ai le galuega tima’i, galuega e tautua ai isi, galuega e fa’aleleia ai lo tatou atunu’u i lona aotelega, ae maise galuega e te fesoasoani ai e fa’aauau lo tatou ola i lenei lalolagi, o i tatou o lo ’o fa’aauauina lo tatou Tala Fa’asolopito!

O le a se mea ua e faia, e fa’amau ai, ma fa’atumau le lelei o lo tatou tala fa’asolopito, ina ia tatou mou atu, ae o i ai ni isi latou te maua tala i o tatou sao sa fa’atautaia, ina ia mautinoa, o sao atu le Sa o Amerika Samoa i le isi tausaga o lumana’i, a’o tumau pea lona lelei mo ona tagatanu’u o lo ’o soifua saogalemu ai.

Lea ua toe timata le upega fagota a le Ofisa o lo ’o fa’amauina ma taumafai e fa’atumau atili ni isi o fa’amaumauga ma ata o lo tatou Tala Fa’asolopito. O la latou matafaioi, ia fa’atumau ona va’aia pea ni isi o nei fa’amaumauga, ma e ao ina iloa lelei e o tatou tagatanu’u uma, e i ai le aoga o lo tatou iloa o lo tatou tala’aga ma mea sa tatou savavali mai ai, e fotua’i ai la tatou malaga i le lumana’i, ae ua tatou iloa e na uia ala fita i le folauga ua mavae.

O tausaga ta’itasi, e fa’ata'oto ai le alafua o le fa’atautaiga o le Ofisa mo le isi lima tausaga o lumana’i, ma sa vala’aulia le mamalu lautele o le atunu’u, ina ia o’o ane e tausoa ma fa’asoa i ni mea e fa’aleleia ai la latou ‘au’aunaga.

Ua 'iloga mai e ao ina i ai sa latou “Akiolisi” o se tasi su’esu’e i tausaga o mea e mafai ona maua mai ma ua 'iloga o mea anamua mai le 'ele'ele po ’o ni isi fo’i o fausaga o fale o tutula’i pea o latou fa’avae, ae ua le malamalama ai se tasi, pe fia ni tausaga sa mua’i fa’atula’ia ai.

 O lea tagata o le si’itia atili ai la latou galuega ma fesoasoani atili e fa’alauiloa i le fanau talavou o le atunu’u, ni isi o tomai e mafai ona latou sa'ilia, ae a lau toe tepa i tausaga amuli ma ona ‘oa sa i ai. O le aso Tofi na te’a na tatala ai faitoto’a o le matagaluega, ina ia asia e le mamalu lautele, ma ia fa’aaoga tatau lea taimi e fetufa’i ai ma le 'au Ofisa o i ai, i ni ala e fa’aleleia atili ai le 'au'aunaga.

Peita’i, i le o’o atu i ai, o lo ’o tapena fo’i le sao o lea matagaluega e fa’ao’o atu i le fonotaga fa’apitoa fa’aletausaga a le National Park Services ma lala uma lava o lea matagaluega tele  a le feterale o le a faia lea i Guam e afua lea i le vaiaso a sau, Mati 12, 2012 ma e na’o le 5 aso o lea fonotaga taua, ae ua tu’ua nei e le susuga le ali’i Pule, David Herdrich, ma se tasi o le 'aufaigaluega le atunu’u mo lea sao taua.

O le tala mai, i le fonotaga fa’aletausaga i le 2011, na maua fo’i e Amerika Samoa se fa’ailoga ona o lo latou fa’ailoga sa taua’aoina i lea fonotaga, o le Kalena o Masina, lea e tufatufaina atu i le atunu’u e le totogia, ma ni isi o CD o lo ’o i ai fa’amatalaga au'ili'ili e tusa o le tele o nofoaga o le atunu’u sa tutupu ai meataua na’ua o lo tatou tala fa’asolopito, o fale tetele ua le toe atoatoa lo latou lelei, sa mua’i tapua’i ai tagata, faia ai a’oga mo tama ma teine ua autausaga e le o toe fa’afoua ma isi mea fa’apena. O le lona tolu o sao sa i totonu o lea paketi i le tausaga ua te’a, o le DVD o ata fa’asolo o mea na tutupu i la tausaga ua te’a, ma e ao ina fa’aleleia atili lo latou fa’atumauina mo le maimoaga a tagata mai fafo, ae maise tagata fo’i o lo tatou atunu’u sa i ai i na taimi, ae laiti i latou, fa’apea ma i latou sa latou le iloa lava nei mea sa tutupu i lo tatou atunu’u, ae ua na’o tala ua logoa i latou ua fa’amatalaina so’o e o latou matua.

O lenei tausaga, ua i ai se ‘oa tele ua masi’i atu fo’i ma le 'au usufono fa’apitoa lea, aua fo’i se fa’asoa i lea fonotaga taua. O le National Park Service o se tasi lea o fa’amalu o lo ’o mafai ona fa’asoa mai ai lo latou tamaoaiga fa’aletausaga, e fa’atautaia ai latou tiute fai fa’atasi ai ma le totogia o le 'aufaigaluega, ma e leai se vaega tupe a lo tatou malo o fa’aagaaga mo lea Ofisa, ae ua fa’atupe i lona atoga lea Ofisa i tupe toina mai le Malo tele po ’o lala ‘ese’ese o le feterale.

O se tasi lea o tofiga aoga tele mo lea Ofisa, o le tama’ita’i o lo ’o nafa ma le sa'ilia o ala e fa’atupeina ai le Ofisa lea, le faletua o Mrs. Folole Iongi Filiaga. Afai e tele ni alagatupe mo lea Ofisa, o le a tele fo’i ni ala e tautua ai i latou ma fa’atino ni isi o fuafuaga fa’ata'oto mo lenei lima tausaga ua savalia, e lo latou ofisa.

O le sao o le malaga ua aofia ai le ‘ato na foa’ia mai e fale'oloa ua mae’a lomia ai le igoa “SAMOA” teuteuina lea i fugala’au pua felanulanua’i, a’o i totonu ua i ai le Ie solosolo fa’ameaalofa, o le CD e tasi ua mae’a tu’ufa’atasia o ata o taimi tuana’i o le atunu’u ma ona tagata, ae maise o le sosia i tusitusiga i le gagana peretania ma le gagana samoa, i le tusi, “Ua Tala le Ta’ui.” O se tusi ua fa’ailoa mai, sa tu’ufa’atasi e le tama’ita’i faia’oga o le Gagana Samoa i la tatou Kolisi Tu’ufa’atasi, Okenaisa Oka Fauolo ma ana vasega Samoa i le ASCC.

O le a maua se avanoa o la tatou nusipepa nei e fa’amatala ai lea tusi pe afai o le a mae’a to’ai taunu’u mai le faigamalaga ma le manuia, ma maua ai se avanoa e faitauina ai lea tusi, ma toe fa’alauiloa atu ai. O se fa’afetai tele i le galuega tima’i a Faia’oga i le gagana, tu ma agaifanua a Samoa i la tatou Kolisi mo lea sao matagofie.