Ua fa’alauiloa e le afioga i le alii kovana ia Lolo Moliga, lona faatauaina o le tatau lea i le atunuu ona ave la latou faamuamua, i auala e puipuia ai tagata uma mai le aafia i mala faalenatura, aemaise ai o le faalauiloa o fuafuaga i auala e puipuia ai soifua o tagata, pe a o o ina tuuina mai lapataiga o nei faalavelave faalenatura.

O le ulua’i fonotaga a le kapeneta mo le tausaga fou lenei 2014, ua faatulaga e le alii kovana e faalauiloa ai fuafuaga faataoto a Ofisa uma a le malo o lo o gafa ma le tali atu i taimi e tula’i mai ai faalavelave faalenatura, ina ia faalauiloa a latou fuafuaga i le atunuu, ona o lea ua o o atu le atunuu i vaitau e ono tulai mai ai ni faalavelave faalenatura.

“O le taua o le fuafuaga lenei, ina ia mafai ai e matagaluega uma a le malo ona galulue faatasi, i auala e tuu atu ai le fesoasoani i le atunuu, pe afai ae tula’i mai ni faalavelave faalenatura i se taimi o le tausaga fou (tausaga nei),” o le saunoaga lea a Lolo i le fonotaga mulimuli a le kapeneta i le faaiuga o le masina o Tesema na faatoa mavae atu nei.

Na faalauiloa atili e le alii kovana e faapea, e tatau ona silafia e tagata uma gaioiga e faia i taimi e o o mai ai faalavelave faalenatura, ae mafua ona silafia e tagata gaioiga e faia pe afai e lelei ona faailoa atu e Ofisa o le malo o lo o muamua tali atu i taimi o faalavelave auala ma gaioiga taitasi e tatau ona faia i taimi e tutupu ai faalavelave.

O Ofisa a le malo o le a galulue mo le tuuina atu o le latou folasaga i le isi fonotaga a le kapeneta o lo o lumana’i nei e aofia ai le Matagaluega o Leoleo, Matagaluega o le Puipuiga o le Saogalemu Faalotoifale, faapea ai ma le vaega a le EMS e pei ona saunoa Lolo.

Na taua e le sui komesina o Leoleo ia Leseiau Laumoli e faapea, o le mea taua e tatau ona maua e tagata uma o le atunuu ma aiga taitasi, o le tofu lea ma le leitio e faalogologo ai i tala o le tau, ma ia mulimulita’i foi le atunuu uma i lapataiga ma faatonuga e tuuina ai e le Ofisa o le Vaai Tau.

O se tasi o suiga o le tau ua molimauina e le atunuu i le taimi nei, o le toulu lea o timuga malolosi i le po o le tausaga fou na se’i mavae atu nei, ma vaaia ai le tau fai tatafe o vaitafe i vaega eseese o le atunuu, aemaise ai le to’a solo o alavai i luga o le alatele.

O nisi o tagata sa vaaia le amata faia o a latou faatau mo mea e manaomia pe a o o i le taimi e tutupu ai ni faalavelave faalenatura e pei o afa ma matagi malolosi, e pei ona vaaia ai le tau fai tofu o tagata ma moli uila, o moli ga’o aemaise ai o ituaiga oloa e manaomia i taimi o faalavelave faalenatura.