Ua i ai le fa’asalalauga fa’alaua’itele a le afioga le Kovana Sili o Amerika Samoa, ina ia silafia e le lautele o le atunu’u, ua avea nei le masina o Mati ma masina e fa’ataua atili ai e le atunu’u le “Tala’aga o Tina” o le tatou atunu’u.

Ua toe fafagu mai ai i agaga o aiga ta’itasi, fa’alapotopotoga ta’itasi, ae maise o Matagaluega o le Malo ma le aotelega o Ekalesia ‘ese’ese ina ia latou fa’ataua le Ta’alaga o Tina o lo tatou atunu’u.

O lenei fe’au taua, e ‘auga mai le Matagaluega o Tagata Faigaluega a lo tatou Malo, lea e tutula’i mai ai le tama’ita’i Evelyn Vaitautolu Langford o lona fa’atonu sili.

O se anava taua i le atunu’u ona fa’ataua o latou tupuga, aua o le atunu’u o se tina lea i ona tagata o soifua ai, aua o ia sa ia fofoaina le ola o tagatanu’u ua fa’afailele i ona siomaga ma ona sosia po o puna’oa ua fa’a’oaina e le Atua lona sami, lau’ele’ele ma le ‘ea. Pe ana leai se Tina, po o leai se tagata soifua e foa’ina i ai e le Atua le manava ola i lenei lau’ele’ele. O le mamana fo’i lea o ana galuega na fai, ua tatou maua i lana fa’asoa o taleni ma tomai ‘ese’ese e tatou te tua i ai, e sa'ili ai le tamaoaiga ma le atamai mo’omia e fa’aauau ai ana galuega na fa’atula’ia ma le foafoaga o lenei paneta mai lona amataga.

Fa’afetai i le va’ai mamao ma le silafaga manino na afua ai ona fa’aa’e nei fa’aeaga tatau ma agava’a mo tina. Peita’i, o le manulauti o lea fa’amoemoe, e pei ona matau atu i le auau o le fa’asalalauga, “O A’ao’oga mo Tama’ita’i, o le latou lea Malosi’aga!”

Ua augani mai le Fa’aulu o le tatou Malo, i so o se Sosaiete, Fa’alapotopotoga, Ekalesia i ana Autalavou, ma le atunu’u atoa fo’i i ona Aiga, pe afai e faia ni fa’atasiga, manatua le “Tala’aga o Tina” ia avea ma ‘au’au o tatou fa’afiafiaga o so o se ituaiga, ina ia salalau le tala ma ia ausia le fa’amoemoe e pei ona amatalia nei, i le masina lava o Mati, ia fa’ataua ai le Tala’aga o Tina.

Ua pipi’i mai le YWCA Amerika Samoa i lea fa’amoemoe, ma ua fa’atulaga fo’i a latou mea e faia i le toe aso o le Masina, 30 Mati 2012, ia fa’ataua ai le Tala’aga o Tina.

Aua e te misia, o le a fa’ataunu’u lea fanoga o le afioga le Kovana ma le Faigamalo, ina ia fa’ataua le tala’aga o Tina, ma ua fa’ailoa mai, pe afai e sopo atu i lena ituvai le folauga, o le a toe fa’aauau fo’i lea masina ma lona ‘au’au, ae o le a fa’alautele ai le matata e fa’atino e le DHR mo le fa’apolokalamaina o le masina o Mati ma mea e fa’alauiloa atili ai le tala’aga o tina i totonu o lo tatou malo.

I le fa’asalalauga fa’alaua’itele, ua latou fa’ailo mai ai le gapatia o tina i le Galuega a le Atua, i totonu o le lotoifale o lona  aiga o ia lava o le pae ma le auli i so o se mea, i totonu o fa’alapotopotoga ua sili ona aoga i le atina’e o le atunu’u, i totonu o matagaluega ‘ese’ese o lona malo, o lo o tutula’i mai ai i latou i so o se faiva ma so o se matata, ua iloga ma ua fa’amauina lo latou sao i lo tatou malo.

“Ina ne’i galo ia te’i tatou, o lo o ua sili ona fa’amaumauina nei mea uma i le silafaga ati a lo tatou Atua.”

Pe a e fetaui i se tina o galue pea i lana fautua, ia e popo i lona papatua ma ‘ave i ai sau fa’amalo, o le tiute lea sa ‘auga i ai fa’amoemoe o le Atua, na ia foafoaina le Tina i totonu o lona aiga! Po o le a lava se tomai ua tatou maua ma ua tatou sa'ilia tina ma tama’ita’i uma o le atunu’u, ia e mausali i lau lea na to mai e le Silisili ‘Ese mo ta’ua.