Ads by Google Ads by Google

FA’ATAUA AGANUU I TUPULAGA TALAVOU TOTONU EKALESIA

O le faatauaina o talatuu ma le aganuu a Samoa i totonu o ekalesia, sa faatinoina ai e le polokalame a le Amerika Samoa Humanities se aoaoga mo le autalavou a le ekalesia EFKAS i Vailoatai, i lalo o le taitaiga susuga Rev. Faletoi Uso.

Na fa’atasi sui iloga o le ASHC i le amataga o lenei polokalama i le Malumalu EFKAS i Vailoatai, le fa’atonu Taua Niualama Taifane, le Taitaifono o le Komiti Fa’afoe Iuli Alex Godinet ma le tasi o sui o le Komiti Rev. Si’ulagi Solomona ma sui fa’amaumau o le ASHC ina ia fa’afofoga, tamau ma fa’amautu le latou fo’i filifiliga, e fa’alogo ai i se tapenaga amata o le sao o le Autalavou a Vailoatai i le latou galuega fa’atino.

Ina ua mae’a sa usuina le vi’i o le latou polokalama, “Taeao o Samoa!” I le fa’ai’uga o lenei polokalama ia Oketopa 31, 2012 o le a fa’ailo atu ai lenei polokalama i lona atoaga ona tapena ma fa’atino e le Autalavou, ae maise o le fa’amaumauga o le tala atoa ua mae’a sailia ma tusia e fatu aga’i i ai le latou fa’atinoga matagofie ua amatalia nei.

Fa’ai’u Polokalama Humanities - SDA Leone

Na iloga ona fa’afiafiaina agaga o matua, le mamalu o sui na asia ma tapunia aloa’ia ai le fa’atinoga a le Kalapu Su’eala a le SDA Leone o le latou polokalama “Ia toe a’otauina le Fanau i Tu & Aga ae maise le Gagana Samoa!”

Ua tautala fa’asamoa mai le fanau talavou matutua e fa’afeiloa’i mai le aofia na auai, ua faia a latou solo ma tauloto o le Tusi Pa’ia e fa’amausali ai le tupuga ma le afoaga o mea uma mai le amataga e le Atua Soifua.

E le gata i lea, ae ua fa’atino e i latou mea uma ua mae’a a’oina, e amata mai i le latou gagana samoa e tautala manino ai. O le gagana samoa e tusitusi ai ma fa’aalia o latou lagona i solo ma tala pupu’u sa latou laulauina.

O le isi itu atoa o le fa’atinoga, o pesega fa’asamoa o aso ua mavae, ae maise o pesega i vi’iga o le Atua. Sa latou amata mai i le sipela o Upu Samoa ma latou fa’aleoga e sipela aga’i i ai. O le fa’aleo o mata’itusi, ma sipela mai Upu Samoa tusa lava po’o le a le u’umi, pe pupu’u.

Ua latou fa’ailoa mai, pe fa’apefea ona tu’ufa’atasia upu e maua ai le fuaiupu, ma fa’aaoga fuaiupu nei e tu’ufa’atasia ai se solo matagofie ma le fa’aleoga tutusa.

Ina ua mae’a sa faia le sao o le fanau laiti e faia ai latou tauloto ma pesega matagofie ma le malie i le fa’afofoga. O nisi pese ua faia fa’afaleaitu mai o latou sikaili, ae fa’anofo filemu ai le aofia.

O le fiafiaga o le Humanities, ua va’aia le aoga o le polokalama na fa’atino ua mafaia e le fanau ona agaga e tautala i le gagana samoa, lea e mataituina, ia le mou atu i tupulaga fai mai o le atunu’u.

O le tala na fa’atino e tomuli i ai a latou fa’atinoga, o le tala ia Sina ma lana Tuna. O le ola taumulimuli o le tuna ia Sina na i’u ai ina fasia ae tagi ane o ia ia Sina ia toto i le palapala lona ao, o le afuaga lea o le olaola o Niu i o tatou laufanua. Ioe, le malosi o le alofa! Ae peita’i, sa toe fa’atepa e le fanau le aofia, “Ua mausali lo tatou iloa, na foafoa e le Atua Soifua mea uma i le amataga!” O mau tauloto na sa latou fa’asoa maia i le amataga o le latou polokalama.

O se ‘aiga fiafia na saunia lelei mo lea mafutaga, ua mae’a le polokalama sa alofaiva i ai lea fo’i autalavou ma ua fa’afetaia fo’i le ali’i sikola o le polokalama Teleiai Fanaea Christian i lona tomai sa fa’asoa i le fanau, ua tofusia ai i latou ma tusi pasi i lea afiafi.