FA’ATAU TINA PUSA PIA MO LANA TAMA 17 TAUSAGA MA ANA UO

Ua fautuaina e le Faamasino Sili ia Michael Kruse le loia a le malo ia Tony Graf, ina ia vaavaai toto’a i le mataupu lea ua toe faasala ai e le faamasinoga maualuga se alii e 18 tausaga i le toese i Tafuna, ona o lo o feta’uaina ai le faatau e se tagata o le aiga o lea ali’i o fagupia na inu ai le ua molia ma ana uo, i le aso na tula’i mai ai le solitulafono lea fo’i ua toe molia mai ai.

 

E foliga mai o le fagupia lava o le Tausala lea ua mafua ai ona faaletonu le olaga o le alii talavou lenei, lea ua i’u ina ma’imau ai le silia i le 5 tausaga o lona olaga i le toese i Tafuna.

 

O se tasi lea o vaega o saunoaga a le alii faamasino sili, i le taimi na tuuina mai ai le faasalaga a le faamasinoga faasaga i le alii o Titio Titio Jr, lea ua ta’usala i le moliaga o le talepe gaoi faapea ai ma le moliaga o le faaleaga meatotino i le tulaga tolu.

 

Na faailoa e Kruse ia Graf e faapea, o lo o manino le tulafono i tulaga faapenei, e le gata e faasa ona faatau ese tagata matua se ‘ava malosi i soo se fanau e laititi i lalo o le tulafono, ae fai mai fo’i le tulafono, e tatau foi ona molia i le tulafono tagata matutua e maua o latou faatauina atu le ‘ava malosi i fanau e laiti i lalo o le tulafono.

 

I totonu o le ripoti a le Ofisa Nofovaavaaia na tuuina atu i le faamasinoga e faatatau i le mataupu a Titio Jr, o lo o taua ai se faamatalaga i totonu o le ripoti a Leoleo i le taimi na su’esu’eina ai lenei mataupu, faapea o se tagata o le aiga o Titio Jr na ia faatauina pia mai le faleoloa ma tuu atu i le ua molia ma ana uo.

 

Na faailoa e Titio Jr i leoleo ina ua fesiligia o ia i lenei mataupu e faapea, sa fai i lona tina e alu e faatau mai ni fagupia mo ia ma ana uo, ona alu lea o lona tina ma faatau mai fagupia Tausala e 6, ona alu lea ma nana i lalo o le Mago e tu latalata i le latou fale, mulimuli ane o atu Titio Jr ma ana uo ua aveese mai fagupia nei ae inu.

 

Ae na taua e le uo a Titio Jr o A. Leiofi i leoleo e faapea, sa tofu laua ma Titio Jr ma le ta’i $7, ona la tuu faatasi lea o lea tupe ma tuu atu i le tina a Titio Jr, o ia lea na alu ma faatau mai fagupia Tausala e 6 ma nana i lalo o le Mago, mulimuli ane latou o atu ma lana tama o Titio Jr ma piki fagupia ae fai ai le latou inuga.

 

O le popolega a le faamasinoga i lenei mataupu, e foliga mai o le alii o Titio Jr e i ai se faafitauli tau i le ‘ava malosi e aafia ai lona olaga, ma, e pau le auala e foia ai lea faafitauli o le taofia lea o ia i le toese i Tafuna mo se taimi umi.

 

E na o le tasi le masina talu ona magalo Titio Jr mai tua o le toese i le tausaga nei o moliaga o le gaoi ma le talepe fale sa ta’usala ai o ia e le faamasinoga, ae toe loka fo’i o ia e leoleo ma tuuaia i le moliaga o le talepe fale, gaoi atoa ai ma le faaleagaina o meatotino a se isi tagata.

 

O mataupu uma nei e pei ona saunoa le alii faamasino sili ia Kruse, o lo o aafia ai le ava malosi.

 

O le aso 3 Iuni, 2013 na magalo ai Titio Jr ae toe loka atu o ia i le aso 15 Iulai, 2013, ina ua masalomia lona talepeina o se ta’avale sa paka i le Fale Tifaga i Nuuuli, ae gaoi ai ni meatotino sa i totonu e pei o iPod touch e $400 le tau; LG cell phone e $200 le tau, ma se iPad Mini e $600 le tau.

 

A’o faagasolo taualumaga o lenei mataupu, sa tautino ai loa Titio Jr i le masina na te’a nei, e faamaonia tuuaiga faasaga ia te ia, o ia na osofaia le taavale sa paka i le Fale Tifaga ae gaoi mea aoga e pei ona taua i faamaumauga a le faamasinoga.

 

Ina ua maua le avanoa e faatoese ai i luma o alii faamasino, na tautino ai loa Titio Jr i le faamasinoga, o ia ua salamo moni e tusa ai o le solitulafono sa ia faia, ma ua ia manaomia foi se isi avanoa sei toe fo’i atu ai i tua i lona aiga e tausi ona matua ma saili sana galuega e tausi ai ona matua.

 

Na talosaga Titio Jr mo se avanoa se tasi mo ia, se’i ia faamaonia atu ai i le faamasinoga o ia ua salamo moni e tusa ai o lana solitulafono sa faia.

 

Na fesili Kruse ia Titio Jr, pe faamaonia le ripoti a le Ofisa Nofovaavaaia, e le o se taimi muamua lenei ua molia ai o ia i luma o le tulafono, ae o ia taimi uma e aafia ai lava le ava malosi, na tali le ua molia ‘ioe’.

 

“Sa maua la sau faguia a’o e i ai i le toese i Tafuna,?” o le fesili lea a Kruse ia Titio Jr, ae sa tali le ua molia, “leai.”

 

“O le isi lena auala e mafai e le faamasinoga ona faaaoga ina ia puipuia ai le tula’i soo mai o le faafitauli o le ‘ava malosi ia te oe, o le taofia lea o oe i le toese mo se taimi umi,” o le saunoaga lea a Kruse ia Titio Jr, ae na tali le ua molia, “e pule lava le faamasinoga i lana faaiuga mo a’u.”

 

E ui na finau le tamaitai loia fautua ia Karen Shelly i le faamasinoga ina ia nofovaavaaia le ua molia, peitai na finau le loia a le malo ia Camille Phillipe, e tatau ona faasala le ua molia i le toese mo sina taimi, ona e foliga mai na te lei aoaoina lava se lesona mo lona olaga i le ulua’i taimi na molia ai o ia i le faamasinoga.

 

Saunoa Kruse e faapea, o le alii o Titio Jr, e le’i leva atu nei lava ona faamanatu lona 18 tausaga, ae foliga mai i faamaumauga ma talaaga o lona olaga, ua tele solitulafono mamafa ua aafia ai o ia, aemaise ai foi lona tagofia o le ava malosi.

 

Na faailoa e Kruse ia Titio Jr e faapea, “e fai lava si tele o faafitauli o lo o fetaia’i ma le faamasinoga ao tau sailiina ai se faasalaga talafeagai mo oe, afai matou te tuuina i le falepuipui se tagata talavou e pei o oe, e i ai lo matou talitonuga e le o se nofoaga lelei lea mo oe, ae afai foi matou te tatalaina o oe i tua, o le a toe maua ai foi le avanoa e te toe foi ai i le nofoaga na afua mai ai nei mau solitulafono,” o le saunoaga lea a le alii faamasino sili.

 

Mo le moliaga o le gaoi, e lima tausaga ua faa falepuipui ai Titio Jr i le toese i Tafuna, ma o lea faasalaga e tuli atoa, ae mo le moliaga o le faaleaga meatotino i le tulaga tolu, e tasi le tausaga e loka ai o ia i le toese, ma o lea foi faasalaga e tuli atoa, ae tuli faatasi la ma le isi faasalaga, lona uiga, e 5 tausaga le umi lea ua taofia ai Titio Jr i le toese i Tafuna, ae faatoa tuli lana faasalaga lea pe afai e maea ona tuli le umi o lo o totoe o lana faasalaga muamua.

Comment Here