Ads by Google Ads by Google

Fa’atali se fa’aiuga fa’amasinoga mo Selefuti Tago

Ua taoto atu nei le tali ioe a le ali’i o Selefuti Tago e ala i se maliliega sa ia sainia ma le malo, i se fa’aiuga a le Fa’amasinoga Maualuga, pe afai e tauaao e le fa’amasinoga le ripoti lea o le a tapena e le Ofisa Fa’anofova’ava’aia.

 

O Tago o lo o molia e le malo i le solitulafono mamafa o le fa’ao’olima i le tulaga lua, ona o le fa’alavelave lea na manu’a ai se ali’i laufali mai Samoa i le masina o Iulai na te’a nei, i le taimi na ta’aalo ai Nu’uuli A ma le au a tama tuai a Avele i le talita.

 

O le taeao ananafi lea na toe fa’aauau  ai le fofogaina o le maliliega a Tago ma le malo, ona o ni isi o tali sa ia tu’uina atu i le Aso Gafua lea na ulua’i fofogaina ai lenei maliliega, e le’i nofo lelei i le finagalo o le Fa’amasinoga.

 

Ina ua fesiligia e le fa’amasinoga Tago i le Aso Gafua na te’a nei, pe fa’amaonia sa ia tu’ia le ali’i laufali, na tali Tago, na te le’i tu’ia, ae sa ia fa’alava i lona lima ma pa’u ai i lalo, peita’i ina ua toe fesiligia o ia e le ali’i fa’amasino sili o Michael Kruse i le taeao ananafi, pe fa’amaonia sa ia tu’ia le ali’i laufali, na tali le ua molia, “o lea lava”. Na taua e le ua molia, o le au taliga o le ali’i laufali na tau ai lona lima.

 

Na toe fesiligia o ia e Kruse pe talitonu, o le gaioiga sa ia faia na o’o ai le tiga i le tino o le ali’i laufali, na tali le ua molia, “o lea lava”.

 

Na teena e le fa’amasinoga le talosaga a Tago mo se avanoa se’i ona fa’amatalaina ai le mea sa tupu, a’o le’i tu’uina atu ana tali ioe i fesili a le fa’amasinoga, na fa’ailoa e Kruse ia Tago, o tala uma ia sa ia mana’o e fa’ailoa i le fa’amasinoga, o le a mafai ona ia fa’amatala i le Ofisa Fa’anofova’ava’aia, ina ia tapena ai le ripoti e tu’uina atu i le fa’amasinoga, e fuafua ai se fa’aiuga.

 

O le aso 30 o Novema lea ua fa’amoemoe e tatau ona o’o atu i ai ua mae’a ona tapena e le Ofisa Fa’anofova’ava’aia le ripoti, ma toe valaauina ai loa lea o lenei mataupu i le aso 2 Tesema, o iina lea o le a tu’uina mai ai se fa’aiuga pe talia pe teena le maliliega, afai ae talia e le fa’amasinoga le maliliega, ona tu’uina atu loa lea o lana fa’asalaga i le aso lava lea, ae afai e teena, ona fa’atulaga loa lea o se aso e faia ai le fa’amasinoga autu a Tago e pei ona saunoa le ali’i fa’amasino sili.

 

Ua fautuaina fo’i e le fa’amasinoga le Ofisa Fa’anofova’ava’aia ina ia tu’uina atu se kopi o le ripoti ia Tago ma lana loia o Marie Alailima, ina ia mafai ai ona tapena i laua mo so’o se fa’aiuga a le fa’amasinoga e tu’uina atu.

 

Na talosaga Alailima i le fa’amasinoga ina ia tatala Tago i tua e aunoa ma se tupe e totogi, e fa’atali ai le aso lea ua fa’atulaga e toe valaauina ai lana mataupu, peita’i na teena e le fa’amasinoga lea talosaga.

 

Saunoa Kruse, e ui o lea ua ioe Tago i le moliaga mama o le fa’ao’olima i le tulaga tolu, peita’i o lea e le’i taliaina e le fa’amasinoga, o lona uiga, o lo’o tumau pea le moliaga mamafa o le fa’ao’olima i le tulaga muamua fa’asaga ia te ia.

 

E $20,000 le tupe ua mae’a ona fa’atulaga e le fa’amasinoga e tatala ai Tago i tua i le taimi nei, peita’i ua fautuaina e le fa’amasinoga loia ina ia toe tu’uina atu se isi fa’afinauga mo lenei mataupu i se taimi o i luma, pe afai e i ai nisi mau maumaututu e lagolagoina ai le tatala i tua o Tago e fa’atali ai taualumaga o lana fa’amasinoga.