Ads by Google Ads by Google

FA’ATALI LAUINA FA’ASALAGA SE’I A’E MAI LE FAIVA

Na tau le mau le afa i le finagalo o le alii faamasino sili ina ua valaau atu le mataupu a se tasi o alii ua sauni le faamasinoga e tuu mai i ai lana faasalaga, ae fai atu i ai lana loia o si alii lea o loo i luga o le sami i le taimi lea, e le’i a’e mai lana faiva mai le vaa fagota o loo galue ai.

Na faanunumi laititi le muaulu o le alii faamasino sili o Michael Kruse i le faamatalaga lea a le tamaitai loia o Leslie Cardin e foliga mai e le o manino lelei le faamasinoga  i le uiga o lea faaupuga, ae toe faapea atu le tamaitai loia, “O Hefa Vahe o loo i ai o ia luga o le sami i le taimi lenei, e le’i fo’i mai lava i fanua le va’a fagota lea o loo galue ai o ia o se fai faiva, o loo fuafua e fo’i mai i le isi 30 pe 45 fo’i aso.”

“E tatau ona iloa e lau client o nei e lau ai lona faasalaga, ae o loo tatala fo’i o ia i tua i lalo o tuutuuga e ao ona usita’i i ai,” o le saunoaga lea a le alii faamasino sili, ae na toe tali le tamaitai loia e faapea, o se faaletonu i le afi o le va’a ua mafua ai ona tuai lona toe fo’i mai i le atunuu.

O Vahe na fuafua e lau lona faasalaga i le vaiaso nei, ina ua ta’usala o ia i le moliaga o lona umia faasolitulafono lea o vaega o le laau faasaina o le mariuana.

O lea moliaga na afua mai ina ua faafesootai e le leoleopo sa tiute i le Uafu o Vaa Faila i leoleo se alii sa latou vaaia o loo alu atu i totonu o le uafu e ‘ona, ma se sikaleti mariuana o loo sili i lona taliga.

Na aga’i atu leoleo i le alii lea ae maua atu ai ma Vahe faatasi ai ma le isi fo’i tamaitai e to’atolu i ai i latou o loo tuuaia i lenei mataupu.

Na ulua’i tuuaia e le malo Vahe i le moliaga mamafa lea e mafai ona faasala ai o ia i le falepuipui mo le umi e le itiiti ifo i le 5 tausaga, poo le salatupe e le itiiti ifo i le $5,000, peitai i le maliliega sa ia sainia ma le malo ma talia e le faamasinoga, ua ia tali ioe ai i le moliaga lava lea e tasi peitai e mama atu lona faasalaga e pei ona faatulaga mai e le tulafono, lea e mafai ona faasala ai o ia i le toese mo le umi e le sili atu i le 5 tausaga, poo le faasala foi i le salatupe e le sili atu i le $5,000.

O se tasi o tuutuuga o loo tatala ai Vahe i tua mai le toese, ia auai i soo se taimi e valaauina ai lana mataupu i luma o le faamasinoga, ma ia fesootai vavalalata ma lana loia i soo  se taimi lava mo le talanoaina o lana mataupu.

Ua toe tolopo le lauina o le faasalaga a Vahe ae o lea ua poloaina lana loia ina ia valaau le Ofisa Autu o le kamupani lea e ana le vaa fagota o loo faigaluega ai Vahe, ina ia oo atu i le faamasinoga e faailoa atu le tulaga o le va’a, o le mafuaaga ua ala ai ona tuai le toe fo’i mai, ae o afea fo’i lea e tatau ona toe fo’i mai ai.