O le fonotaga a le Au Toeaiina o le Ekalesia EFKAS i le vaiaso fou, o le a iloiloina ai i mataupu o le a talanoaina sa latou faaiuga, faasaga i le alii faifeau ia Rev. Ali’ioaiga Filoiali’i ona o le mataupu e pei ona aafia ai o ia i le tulafono. O Rev. Filoiali’i o loo avea pea ma faifeau o le ekalesia EFKAS i le afioaga o Faleniu.

Ina ua fesiligia le Ofisa Autu o le Ekalesia i Kanana Fou i le vaiaso nei, na faamaonia mai ai e le Failautusi a le Ekalesia, susuga Rev. Reupena Alo lea tulaga i le Samoa News.

Saunoa Rev. Alo, e le mafai ona tuuina mai se faamatalaga e uiga i le tulaga o le alii faifeau, se’i vagana ua maea le latou fonotaga o loo faamoemoe e usuia i le vaiaso fou, lea foi o le a talanoaina ai ma le mataupu e uiga ia Rev. Filoiali’i.

E faatolu ona taumafai se avanoa mo le Taitaifono o le Ekalesia ia Rev. Leatulagi Faalevao i lona ofisa ananafi, peitai e le’i manuia.

Na tuu ai foi le feau ina ia toe valaau mai peitai e lomia lava lenei ripoti e lei toe valaau mai lava le alii faifeu, ae na taua e le tamaitai sa taliina mai le telefoni, o le aso Gafua lea ua faamoemoe e usuia ai le fono a le Au Toeaiina mo le talanoaina o nisi o mataupu, aua le agai i luma o le galuega, ma e le o mautinoa pe o aofia ai ma le mataupu faatatau ia Rev. Filoialii.

O Rev. Filoialii sa tuuaia e le malo i le moliaga o le ave taavale faatautala ua mafua ai ona oo le maliu i se isi tagata, ona o se faalavelave na tulai mai i le aso 19 Setema 2010, ina ua so’a e le ta’avale a le alii faifeau se teineititi sa savali i luga o la auala, ma taofia ai o ia i le falema’i ona o le tulaga tuga o manu’a na aafia ai o ia, mulimuli ane maliu ai lava i le falema’i.

E ui sa tete’e le alii faifeau i le moliaga faasaga ia te ia, peitai o le faaiuga o le masina na te’a nei sa ia sainia ai se maliliega ma le malo, ma ia ta’utino ai i le faamasinoga maualuga, e le tete’e o ia i le tagi a le malo, ina ua suia e le malo le moliaga mamafa na ulua’i tuuaia ai o ia i le moliaga mama.

Sa taua i faamaumauga a le faamasinoga le saoasaoa tele o le taavale a le alii faifeau, le ituaiga o le F-150 na malaga ai i le aso lea, ina ua ia alu i le saoasaoa e tusa ma le 25-35 maila.

O le aso 3 Aokuso lea ua faamoemoe le faamasinoga maualuga e tuu mai ai sana faaiuga pe talia le maliliega lea ua maea ona saini e le alii faifeau ma le malo, ma o loo tumau poloaiga o loo tatala ai Rev. Filoialii i tua e faatali ai le aso e toe fofogaina ai lana mataupu.

Na taua e le susuga Rev. Faatui Laolagi, o se tasi o faifeau ua loa lana tautua i le galuega faafaifeau atoa ai ma le malo mo le silia i le 40 tausaga, e ui e leai ni faiga faavae a le Ekalesia mo mataupu faapenei, peitai i lona talitonuga, e i ai lava faaiuga e faia e le Fono a le Au Toeaiina pe afai e tulai mai ni mataupu faapenei i le aufaigaluega.

Na siitia e le alii faifeau le tala o loo i le Tusi Paia e faatatau i le Aposetolo o Paulo ma lana amio sa fai o le faasaua lea o tagata Kerisiano ma fasioti, peitai na faamagalo le Atua ma filifilia o ia e avea ma Aposetolo o lana galuega.

“Ou te talitonu, e na o le Atua na te faamagaloina le tagata ua sese ma agasala, pau le eseese o le tala ia Paulo ma le alii faifeau lea, o Paulo e le o se faifeau ae o Rev. Filoialii o le faifeau ua faauuina e galue,” o le saunaoga lea a Rev. Laolagi.

Na taua e Rev. Laolagi, o le tiute lava ia o le Ekalesia o le faamagalo, peitai e i ai foi taimi e fai ai ana faaiuga, faavae lea i faaiuga a le malo e tuuina atu, pe afai e i ai se auauna ua aafia i le tulafono, ae o le faaiuga i le toe galue i le galuega faa faifeau ma le le toe galue, o le faaiuga lava lena a le faifeau latou ia, faavae i luga o lona talitonuga ma le musumusuga a le Atua i lona loto.

Na amata galue mai Rev. Laolagi i le galuega faa faifeau ina ua faatoa 23 tausaga o lona soifua ao aumau ai i fafo, ma tofia ai loa o ia na te tausia le ekalesia i Fagasa i le 1973, o lana uluai ekalesia foi lea na vaai.

Na maea lea ona tofia lea o ia e galue i totonu o le ofisa o le ekalesia i le tele o tofiga, e aofia ai le Failautusi Aoao o le ekalesia, atoa ai ma le tele o komiti na galue ai, ao le’i toe tofia o ia na te vaaia le ekalesia i Fagaalu.

Sa toe faaauau lana tautua i le malo e ala i le Ofisa o le Arts Council, Matagaluega o Mataupu tau Faamasinoga, Sui o le Komiti o le Palola, ma faaiu ai loa i le filifilia o ia avea ma Faatonu o le aoga i Fatu ma Futi.