Ua pasia e le Komiti o le Paketi a le Maota o Sui le taofi o sa latou faaiuga i pili tupe e lua ia na tuuina atu e le kovana i luma o le Fono, sei vagana ua maua muamua mai ripoti o loo manaomia e le komiti, ona faatoa faia lea o se latou faaiuga mautu.

O pili tupe e lua na tuuina atu e le afioga i le matua ia Togiola Tulafono i luma o le Fono i le vaiaso na tea nei, e aofia ai le faasoasoaina o le $50,000 e faamaea ai galuega o le Fale Samoa lea o loo fausia nei i le taele o le Su’igaula a le Atuvasa i Utulei, ma le $50,000 e fesoasoani i le faatupeina o le au taalo a alo ma fanau o le atunuu, lea ua masii atu i Ausetalia  mo le taamilosaga o loo faia.

O pili tupe ia e lua ua i luma o le Fono o loo fuafua e faatupe mai i le vaega tupe e $253,000 lea na toe fesuiai e le Fono i totonu o le Paketi a le malo mo le Tausaga tupe lenei 2012 mai vaega tupe o Polokalame Faapitoa, lea na teena e le alii kovana.

O suiga a le Fono na teena e le kovana i le paketi a le malo, e aofia ai le faasoa atu o le tupe lea e fesoasoani ai mo femalagaaiga i Swains Island, atoa ai ma le faaopoopoina lea o totogi o leoleo nuu.

O le ripoti o loo manaomia e le komiti, o le faaaogaina lea o le $250,000 mai le Ofisa o le Initeria lea na aumai e fausia ai le fale Samoa lea ua maua tala ua maea le tupe ae le’i uma le galuega o le fale.

O le faaiuga a le komiti e tolopo sana faaiuga sei maua atu ripoti, na faia lea ina ua maea se iloiloga sa molimau ai le Failautusi o le Ofisa o Mataupu Tau Samoa, le afioga ia Lefiti Pese, faatasi ai ma le sui o le au malaga o le au football a tama aoga, le susuga ia Peter Gurr i le vaiaso na tea nei.

Ina ua fesiligia e le komiti e uiga i le au football i lalo o le 19 tausaga a le atunuu mo Ausetalia na saunoa ai Gurr e faapea, e na o le $30,000 le tupe na mafai ona maua i le sailiga tupe a le komiti, o matua ma le au taaalo, ae $91,000 le tupe o loo manaomia e faatupe ai le faamoemoe.

“Afai ae manuia le taaloga a le tatou au, ona sauni loa lea e malaga atu i le isi taamilosaga lea o le a faia i le setete o Texas,” o le molimau lea a Gurr i luma o le komiti ina ua fesiligia o ia.

Saunoa Gurr, na savalia e le komiti le alii kovana mo se fesoasoani tau tupe aua le faamoemoe a le fanau, e faatupe ai manaoga uma mo le malaga atu i Brisban i Ausetalia.

O le po o le aso Faraile na tea nei na taaalo ai Amerika Samoa ma le au a Ausetalia, ma i se ripoti na mafai ona maua mai e uiga i lenei taaloga na taua ai le manumalo o le au Football a le atunuu i le au fili a Ausetalia i ‘ai e 93-7.

O le sikoa e tasi a Ausetalia na maua ae ua toe lava o ni nai minute maea le la taaloga finau ma Amerika Samoa.

O le itula e 9:00 i le taeao nei lea ua faamoemoe e taunuu mai ai i fanua le au fili a le atunuu ma le aumalaga atoa sa masii atu mo lenei faamoemoe, e tapena ai mo le malaga atu i le isi taamilosaga lea o le a faataunuuina i le setete o Texas i le masina fou e taua o le ‘International Federation of American Football championship’, ma ua i ai le faamoemoega o le a faatali aloaia lo latou taunuu mai e matua, e ala i se sauniga lotu puupuu e faia lea i le fale Samoa i le malae vaalele.

Ae i le $50,000 e faamaea ai le fale Samoa i Utulei na saunoa ai Lefiti e faapea, o le tupe lea o loo manaomia e faamaea ai vaega laiti o le fale o loo totoe, e pei o le sima e si’omia ai fafo  o le fale, o le kapeta aemaise ai foi o le faamaeaina o nisi o vaega laiti o loo manaomia le faaumaina.

O le galuega o le fale Samoa na fausiaina lea e tufuga faufale mai Fagaloa i Upolu peitai e tusa ai ma le molimau a Lefiti, o le Matagaluega o Galuega Lautele a le malo lea ua latou faamaeaina galuega o loo totoe, ao lumanai ai le faaulufaleina o lenei galuega tele i le aso 16 o Aperila, lea e soso’o ma le aso e sisiina ai le fu’a mo le faamanatuina o le 112 tausaga talu ona osi feagaiga Amerika Samoa ma le malo tele o Amerika.

E ui o lea ua taoto i luma o le fono manaoga e pei ona folasia e le kovana, ae i ai le talitonuga o afioga i faipule, afai e i ai se isi mataupu tau tupe e tatau ona ave i ai le faamuamua a le fono i le taimi nei, o le mataupu i le falemai o le LBJ.

Fai mai le komiti, o manaoga e pei ona faatulai mai e mafai ona foia i se isi taimi peitai o le tausiga o le soifua o le tagata e le mafai ona tolopo i ai se faaiuga.

E i ai le faamoemoe o le komiti e tatau ona taunuu atu i le vaiaso nei le ripoti mo le faaaogaina o le tupe sa fausia ai le fale samoa.