O le ali’i pagota lea o loo tuli sana fa’asalaga fa’a falepuipui e 20 masina i le toese i Tafuna i le taimi nei, ina ua ta’usala o ia i lona ave fa’agaoi o le silia i le $200,000 mai le Kamupani o le Pacific Shipping Services ao avea ai o ia ma Pule i le 2012 e oo mai i le 2013, ua fa’ataga e le Fa’amasinoga Maualuga o ia e malaga i Samoa e auai i toe sauniga o le maliu o si ona Tina.

O le taeao ananafi na talia ai e le afioga i le ali’i fa’amasino sili lagolago ia Lyle L. Richmond ma ana Fa’amasino Lagolago ia Mamea Sala Jr ma Tunupopo Alalafaga le talosaga a Lepuiai Allen Mayer, mo se avanoa e tatala ai o ia i tua e alu i le maliu o si ona Tina i le motu o Manono, Samoa, e ui sa matua tete’e malosi ai le itu a le malo.

Na taua e le loia a Lepuiai o Marcellus T. Uiagalelei i le taimi na ia fa’aleoina ai le talosaga a le ua molia e faapea, e leai se fa’amoemoe o lenei ali’i e alu i Samoa ma nofomau ai e le toe oo mai i le teritori, pau le mafua’aga o lana malaga, o le fia auai lea i toe sauniga o le maliu o si ona Tina pele.

Ae na taua e le loia a le malo ia Tiffany Oldfield i le fa’amasinoga e fa’apea, e le tatau i le fa’amasinoga ona latou taliaina le talosaga a Lepuiai e malaga ese atu ai ma le atunu’u, ona o loo tuli sona fa’asalaga fa’a falepuipui i le toese i le taimi nei, ma le isi itu, o loo i ai se isi tagi i mataupu savili (civil) o lo o i luma o le fa’amasinoga fa’asaga ia te ia.

Na finau atili Oldfield e faapea, e ao i le fa’amasinoga ona fa’aeteete i sana faaiuga e tuuina mai, e talia ai le talosaga a le ua molia e malaga ese atu ai ma Amerika Samoa.

Ae na taua e Uiagalelei e fa’apea, e ui ua ta’usala le ua molia i lona faia o se solitulafono, peita’i e le o ia o se tagata leaga pe fa’atupu vevesi fo’i, ae o ia o se tagata e loto alofa i lona aiga, toe ta’uleleia e lona nu’u ma lana ekalesia.

Na finau atili Uiagalelei e fa’apea, afai o loo popole le malo ina ne’i le toe fo’i mai Lepuiai pe a malaga i Samoa, e mafai e le fa’amasinoga ona fa’atonu ni leoleo se to’alua e malaga fa’atasi ma lenei ali’i i Samoa, ina ia mautinoa ai lona toe fo’i mai, peita’i na faauilavea Oldfield ma finau i le fa’amasinoga e fa’apea, e le faigofie ona fa’ataunuu le fuafuaga lea ua finau atu ai le itu tete’e, o le malaga lea o ni leoleo e momoli Lepuiai i Samoa ma toe fo’i mai ai.

Na finau atili Oldfield e faapea, e eseese mataupu e mana’omia ai le malaga o ni leoleo i isi atunu’u e pei o Samoa, ona o le mataupu a Lepuiai, e le fa’apea o ia o se tagata o loo tipoti i Samoa e ala ai ona tau mana’omia ni leoleo e malaga, ae o ia o le tagata o loo malaga i Samoa ma le fa’amoemoe e toe fo’i mai.

Na taua e Oldfield lona popolega, ina ne’i alu atu le ua molia ma a’afia i ni fa’alavelave e pei o ni fusuaga ma nisi tagata, ona le iloa lea e leoleo o le a latou malaga poo fea o le a tutu ai.

E silia i le 15 minute o iloilo e ali’i fa’amasino la latou fa’aiuga, ae ina ua mae’a, sa latou fa’ailoaina mai ai lo latou taliaina o le talosaga a Lepuiai mo le malaga atu i le maliu o si ona Tina i Samoa, e aunoa ma ni leoleo latou te malaga.

O le aso 25 o Iuni e malaga ai Mayer i Samoa mo aso e lua, ma toe taliu mai ai i le aso 27 Iuni.

E lei talia e le fa’amasinoga le talosaga a lenei ali’i mo sina taimi umi e nonofo ma mafuta ai ma lona aiga.

O le masina o Fepuari 2015 na fa’asala ai e le fa’amasinoga ia Lepuiai e taofia i le toese mo le 28 masina, o se tasi lea o tuutuuga o lana nofovaavaaia e 7 tausaga, peita’i e na o le 20 masina lea ua poloaina e le faamasinoga o ia e tuli, ae fa’amalumalu le isi 8 masina.

O le taimi nei, o loo tatala i tua lenei alii e faigaluega i se tasi o kamupani e pulea e se tasi o ana uo, i le mae’a ai lea ona talia e le fa’amasinoga o lana talosaga ina ia tatala o ia i tua e faigaluega ma toe fo’i i totonu o le falepuipui e tuli lana fa’asalaga, ina ia faigofie ai ona maua le avanoa e toe totogi ai lana salatupe i le fa’amasinoga.