E i ai ni isi o le atunuu ua latou faaalia lo latou le fiafia ona o lea fo’i ua amata ona toe tuuina mai faasilasilaga a le Faalapotopotoga o le Eletise ma le Suavai (ASPA), e faapupuna ai le suavai taumafa e ui o lo o totogi tupe mo lea tautua i masina ta’itasi.

Na taua e Limu Tuiasosopo o Taputimu e faapea, “O le taimi lava e tuu mai ai le faasilasilaga a le ASPA e faapupuna muamua le suavai, lona uiga ua ta’u mai ai e manaomia le faaalu o tupe e faatau mai ai faguvai i faleoloa mo le aiga, poo le utu mai fo’i i masini vai o lo o i luma o faleoloa”.

Fai mai Tuiasosopo, “Afai o le tulaga lea ua i ai le suavai a le ASPA, e le tatau la ona totogi e lo’u aiga atoa ai ma isi aiga o le atunuu o lo o aafia i lenei tulaga le ta’i $12 i le isi masina, aua e foliga mai o lea ua gau matou, e le gata o le totogi o le tupe e faalelei ai le suavai ao lea lava e leaga, toe faaalu tupe e faatau ai faguvai mai faleoloa”.

Ae na taua e le tina o Fiailoa Toomalatai mai le itumalo o Alataua e faapea, e ui i le tele o tupe a lona aiga e alu i le tau toe faatauina mai o vai mai le faleoloa ona o lea foi ua faaletonu le suavai taumafai, peitai o le itu taua ia te ia o le saogalemu ma le soifua maloloina o le atunuu.

Fai mai Fiailoa, e tatau i le ASPA ona matua galulue e saili auala e foia ai le toe tulai mai o le faaletonu i le suavai taumafa i le lumanai.

“E le o se taimi muamua lenei ua tuu mai ai lenei faasilasila e faapupuna le suavai, na fai mai lava i le tele o tausaga ua mavae, o lea lava e oo mai i le taimi nei o lo o tupu pea, lona uiga e faaauau pea i le lumana’i, ae o le fesili, o le a se auala e foia ai le faafitauli o le leaga soo o le suavai,?” o le saunoaga lea a Fiailoa.

O afioaga o lo o aafia i lenei lapataiga, e aofia ai Taputimu, Lepuapua, o se vaega o Malaeloa ma faasolo atu ai lava i le itumalo o Alataua seia tau i Poloa.

Na taua e le ASPA i lana faasilasilaga e faapea, o le fautuaga ina ia faapupuna le suavai faatoa taumafa ai, e mafua mai ina ua faia ni suesuega i le pamu vai o lo o latou pamuina mai le suavai mai le manava o le eleele, ma maua ai o lo o i ai se faaletonu i le suavai.

Fai mai le ASPA, o lo o faaauau pea a latou suesuega i le suavai i le taimi nei ma le lumanai ina ia mautinoa, e toe i ai se suiga ma saogalemu mo le fofoga taumafa.

Ua fautuaina e le ASPA le atunuu ina ia faapupuna muamua le suavai ona faatoa faaaoga ai lea, poo le faatauina mai foi lea o faguvai mai faleoloa mo le fofoga taumafa, atoa ai ma isi manaoga i le aiga e pei o le kukaina o taumafa.

Ina ua fesiligia e faipule le pulesili o le ASPA i le lua vaiaso talu ai i le mafuaaga e ala ai ona tula’i soo mai le faafitauli i le suavai ma moomia ai le faapupuna muamua, na saunoa ai le afioga i le Matua ia Utu Abe Malae e faapea, e mafua ona faaletonu le suavai o lo o taoto i lalo o le manava o le eleele, ona ua sao i ai siama mai alavai o lo o to’a i luga o le eleele.

Fai mai faasea a ni isi o le atunuu, soo se taimi lava e tuu mai ai e le ASPA le faasilasila e faapupuna muamua le suavai, e le gata e alu ai le kesi ae alu ai fo’i tupe.