Ads by Google Ads by Google

Fa’asea faipule i le tele o galuega tetele e le’i fa’ataunu’uina lava

O le vaiaso na te’a nei na faaalia ai e ni isi o afioga i faipule lagona fa’asea ma le le fiafia i le tele o galuega tetele a le malo ua leva ona folafola mai o le a fai, peita’i e o’o mai lava i le taimi nei e le’i vaaia lava se mea e tasi ua amata.

 

O ni isi o nei galuega tetele e aofia ai taligalu i Aua ma Nu’uuli; laina mo lapisi lafoa’i i Fagatogo ma Aua; auala tetele ma auala laiti i totonu o itumalo eseese; moli o auala ma auvai; aemaise ai talosaga mo pemita e faagaioi ai galuega.

 

O le fia malamalama atili ai o faipule i tulaga ua o’o i ai galuega eseese nei, na talosagaina ai loa e ni isi o i latou le ta’ita’i komiti o Galuega Lautele a le malo ia Atualevao Gafatasi Afalava, ina ia fa’atulaga se iloiloga ma le Fa’atonusili o Galuega Lautele a le malo, se’i tu’uina mai sana saunoaga e tusa ai o mataupu o lo o fesiligia e sui mamalu.

 

Na saunoa le ali’i faipule ia Taotasi Archie Soliai e faapea, ua leva ona taoto le i’ugafono na pasia e le fono e talosagaina ai le vaega a le Army Corps ina ia fa’anatinati le iloiloina o le talosaga mo se pemita e fausia ai le taligalu i Nu’uuli, ae foliga mai o lea lava e le o i ai se tulaga vave o vaaia i le taimi nei.

 

“O lo o fa’aauau pea ona pagatia tagata o lo’u nu’u ma le itumalo i le faaletonu o le sami ma le ‘aia o laueleele o lo o nonofo ai, ae na pau lava le fa’amatalaga sa tuuina mai, o lea e fa’atali le pemita, o afea e vaai ai lo’u nu’u i se taligalu pe afai e tumau pea lava le leai o se pemita,?” o le saunoaga lea a Taotasi.

 

Na tula’i le ali’i faipule mai Fofo ia Puletuimalo D. Koko ma faaalia sona finagalo faanoanoa i le tuai ona faatino o se galuega i le auvai i Leone lea ua maea ona pasia le i’ugafono e faatinoina ai lea fa’amoemoe.

 

Na taua e Puletuimalo e faapea, o le taua o le fausia lelei o le auvai lea ina ia fesoasoani ai i le saogalemu o le nuu i le taimi e tetele ai tafega ma lologa.

 

Fai mai Puletuimalo, o lenei lava o le a mae’a atu lenei tausaga e le’i tino mai lava lea galuega.

 

O faaletonu i moli auala aemaise ai totonu o nu’u, o le mataupu lea na laga e le ali’i faipule mai Pago Pago ia Va’amua Henry Sesepasara, lea foi na ia laga i le nofoaiga a le Fono ua tuana’i atu.

 

Na saunoa Va’amua e faapea, ua maea ona folafola e le Faatonusili o Galuega a le malo i luma o le maota, o masina amata lava o le tausaga nei e mae’a ai ona faapipi’i ma toe fa’aola uma moli i totonu o afioaga ma luga o le auala, peita’i o lea ua a’e le tauaofiaga lona lua a le fono ae o lo o tumau pea le pogisa o le tele o vaega o le alatele ma ni isi o afioaga.

 

“E tatau ona toe fesiligia le fa’atonusili o galuega a le malo po o fea moli na ia folafola ua maea ona taunuu o le a faapipi’iina fo’i,” o le saunoaga lea a Va’amua.

 

Ae na tula’i le tama’ita’i faipule ia Vui Florence Vaili Saulo ma fa’ailoa ni isi o faaletonu o lo o tula’i mai i auala i lona itumalo lea e o’o mai i le taimi nei.

 

Na taua e Vui e faapea, o se tasi o faafitauli o lo o ia maitauina i auala, e le o lelei ona tausi e le matagaluega o galuega auala i le taimi e mae’a ai ona fausia, e pei o le salu ese o le pefu ma le poloka ai o alavai pe a tetele tafega, faapea ai ma le i ai o ni isi auala e le o mae’a lava ona fausia.

 

Na faafetaia e Vui le faatonusili o le matagaluega o galuega lautele a le malo i ni isi o auala i lona itumalo ua maea ona fausia, peitai sa ia taua le manaomia pea o le fesoasoani mo le tele o isi auala o lo o manaomia le faaleleia i le taimi nei.

 

I le auala o le malae vaalele ua tele i ai fesili ma faasea a sui o le fono, na tula’i ai le ali’i faipule ia Faimealelei Anthony Fu’e Allen ma saunoa e faapea, e tatau ona silasila toto’a le maota i le galuega o le auala lea po o fea ua o o i ai, ona o lea ua maua ripoti e tusa ai o le fa’aletonu o le kamupani o lo o latou fausiaina.

 

Saunoa Faimealelei e faapea, afai o lea ua i ai se faaletonu i le tulaga o le konekarate o lo o fausia le auala i le malae vaalele, e tatau ona malamalama faipule i le isi laasaga lea o le a soso’o nei, po o ai le isi konekarate o le a sauni e faamae’a le galuega.

 

O le Aso Tofi o le vaiaso nei ua faatulaga e feiloa’i ai le maota o sui ma le fa’atonusili o galuega lautele a le malo ia Faleosina Voight.