Ads by Google Ads by Google

Fa’asao ma puipui tatou Vaomatua

Ua mae’a taoto le fa’asao ua fa’alauiloa ma fa’ataua mai e le malo, “Ia Fa’asao ma Puipuia o tatou Vaomatua!” Ua le na’o se aso e tasi, e pei ona mafuli i ai le lalolagi, ae ua fa’atulaga e Amerika Samoa le vaiaso atoa Novema 18-23, 2013 e avea ma vaiaso e fulitasi ai tagata o le atunu’u e toto la’au aoga, ina ia fua mai ni fua lelei, e toe fa’aaoga i mea taumafa, pe fua mai fugala’au e aoga i teu ma fa’amatagofie atili ai lo tatou atunu’u.

 

O le tali atu i se lavea’iga mo le so’ona vevela o le lalolagi, - Ia toto ni la’au lau lanumeamata ia lava ma totoe e latou te pua’ina mai le okesene e olaola lelei ai manu, tagata ma so’o se meaola lava.

 

Lea ua feoa’i solo le vaega ale Folesi a le tatou Kolisi Tu’ufa’atasi e fa’atino a latou tima’iga mo le fanua a’oga, e afua mai a’oga tulaga lua, se’ia o’o i a’oga maualuluga.

 

“O le tima’i, ia iloa lelei la’au fa’alafua, e so’ona tutupu ma mamate atu ai la’au aoga tele i o tatou laufanua, o la’au na aua le toe totoina!” O se tautalaga lea ua fa’afofogaina e le fanau a’oga i Nu’uuli Vocational High School vasega 12, na saunia lea folasaga e le aufaigaluega a le Land Grant - vaega a le Folesi.

 

“O la’au aoga, e ala i vai fofo mo ma’i o gasegasea ai le atunu’u, la’au fua manogi ae le so’ona sosolo, la’au ‘aina ma matai’ai a le tatou atunu’u to’aga e toto, i so’o se taimi e va’aia e mo’omia ona fa’apaolo se vaipanoa o le tou laufanua, toto ai se la’au,” o le saunoaga lea a le Land Grant.

 

Na tufaina i le fanau a’oga se talafatai o se nu’u, ua i ai malumalu, ua i ai falea’oga, ua i ai le falema’i, ua i ai maota o aiga, ua i ai itu e totoina ai fa’ato’aga, ua i ai le apitagalu ma le matafaga, ua fa’ailoa i le fanau, la’au ua lisia e aoga, ma ua fesiligia i latou, ina ia latou fa’ailoa ane, po’o fea e talafeagai mo le totoina o la’au ua lisia.

 

O la’au tetele e ao ina totoina i autafa o pa o le malae ta’alo, o i si la’au e latou te gafatia ona tatali le pisisami e aofia ai le pu’a ma le ifilele, o le togo ma la’au e i’ila lava o latou lau, e toto lea i matafaga. O niu ma isi la’au ‘aina e toto lea i fa’ato’aga, o Ulu e mafai ona tutu i autafa o tunoa ma fa’asolo i tafatafa o pa e si’omia ai malae. O niu e toto i tua ane o tunoa e lava ma totoe ai popo mo le gaosiga o mea’ai.

 

O la’au e gaosia ai vai, e mafai ona toto i tafatafa o maota o aiga, e le tau sailia mamao ai la’au mo vaifofo o gasegase o tagata o aiga. Peita’i, o la’au fua matagofie e mafai ona toto i autafa o malae ta’alo e matagofie lona paolo e fa’amalu ai le aumaimoa, ae o la’au fua matala manogi sasala, e totoina lea i togala’au i lumafale ma autafa o maota o aiga.

 

Ina ua sasa’a le fafao a tama’ita’i ma ali’i sa fa’atinoa folasaga nei, sa fa’alologo le fanau ma fa’ailoa lo latou fiafia.

 

O lenei polokalama sa fa’atino mai le vaiaso atoa, e afua i le taeao o le aso Gafua na alausu ai le vaega a le Folesi lenei mo Afonotele Elementary, ma ua faia ai fo’i nei lava vasega. Fa’ailoa i ai la’au e leaga ma e tatau ona tape, ma la’au e tatau lava ona totoina i so’o se taimi e maua ai se avanoa.

 

Ona soso’o lea ma le avanoa sa tu’uina e o ai i le autalavou i Leone, peita’i, na toe soloia mai ona ua tuatuagia lea autalavou i se fa’aletonu le ma’alofia. O le aso Lua na o atu ai ma tima’ia le aoga i Alofau Elementary ae o’o ai i le afiafi, fa’atasi atu i le Autalavou EFKAS i Amouli. O lea fa’asoa sa matua fiafia i ai le susuga le Fa’afeagaiga ma le Autalavou, ma ua tu’uina ai la’au toto mo le autalavou latou te fa’afailele pe a mae’a totoina.

 

O le aso Lulu na fa’atulaga ai le a’oa’oga i le a’oga a Matafao Elementary ae o’o i le afiafi o le Autalavou i Aoloau.

 

O le aso ananafi sa faia ai le folasaga lenei i le Nu’uuli VocTech ma tufaina atu le mitiafu o lo’o tusia ai le ‘auga o le fa’amoemoe o le Folesi i lenei tausaga.

 

O le afiafi ananafi sa fa’atasi atu ai i le Autalavou i CCCAS Fagamalo mo le folasaga lava e tasi, e fa’ailoa atu i le fanau, a lelei ona tausia la’au o le tatou vaomatua, e tele la’au aoga i le fa’ato’aga o le a maua e fesoasoani i vaifofo o ma’i, fuala’au ‘aina, ma ola fiafia ai o tatou tagata, ae paleni fo’i le tele o le okesene i lo tatou si’omaga, e soifua maloloina ai o tatou tagata.