Ua tuuina atu nei se faasalalauga faalauaitele a le vaega a Lolo Matalasi Moliga ma Lemanu Peleti Mauga, mo i latou uma e fia talosaga i avanoa o Faatonusili o Matagaluega ma Ofisa Tumaoti a le malo, ina ia amata tuuina atu loa a latou tusi talosaga mo avanoa e fia galulue ai.

E 19 Matagaluega ma Ofisa Tumaoti e 19 a le malo ua faasalalau avanoa mo Faatonusili latou te tauaveina le galuega pe a nofoia le Faigamalo a Lolo ma Lemanu, lea ua faamoemoe e amata i le aso 3 Ianuari 2013.

Na taua e Lolo ma Lemanu i se pepa o faamatalaga e faapea, o avanoa faigaluega ua faasalalau o galuega i tulaga tau polokiki, lona uiga o le tagata o le a tofia e galue, o le a galue lea i lalo o le faigamalo a Lolo ma Lemanu.

O le a faavae le iloiloina o avanoa faigaluega i agavaa ma le faatinoina o galuega, ina ia laina tutusa uma tagata Amerika Samoa i avanoa e galulue ai mo le malo.

Na taua foi e Lolo ma Lemanu e faapea, o i latou uma o le a faamanuiaina i avanoa faigaluega nei, o le avea i latou ma tagata e galulue mo se suiga o le faigamalo a le atunuu, atoa ai ma le galulue mo ni suiga i totonu o matagaluega taitasi, ina ia mafai ona faasoa atu tomai eseese o lo o latou maua ina ia mafai ai ona tautua le atunuu.

Ua talosagaina foi le tuuina atu faatasi ma tusi talosaga o pepa e lagolagoina ai le tusi talosaga, ina ia mafai ai ona lautele le silasila i le taimi o le filifiliga.

O le aso 15 Tesema i le itula e 4:00 i le aoauli ua faamoemoe e faamuta ai tusi talosaga uma lava e tuuina atu, o tusi talosaga uma e taunuu atu ae ua tuanai le taimi faatulagaina, o le a le mafai ona taliaina.

O Matagaluega ua faasalalauina a latou avanoa o Faatonusili e aofia ai le Mataaluega o Aoga; Matagaluega o Tupe; Matagaluega o Fefaatauaiga; Matagaluega o Galuega; Matagaluega Vaomatua ma Faigafaiva; Matagaluega o Tautua Lautele; Matagaluega o Pulega;  Matagaluega Puipuiga Lotoifale; Matagaluega Tautua Eseese; Matagaluega Tina ma Tamaitai; Matagaluega Soifua Maloloina ma le Matagaluega o Leoleo.

O Ofisa o le malo ua faasalalau a latou avanoa mo Faatonusili e aofia ai le Ofisa o Faamaumauga; Ofisa EPA; Ofisa Enetia; Ofisa Tagata Matutua; Ofisa Mataupu tau Faamasinoga; Ofisa Puipuia Aia o i latou aafia gasegase mafaufau; Ofisa Faletusi; Ofisa Mataaga; Ofisa Pulea Oloa malo; Ofisa Oloa malo; Ofisa Palotaga; Ofisa Paketi ma le Ofisa Galuega a le malo.

I le fonotaga a le komiti a Lolo ma Lemanu i le aso Lulu na te’a nei i le latou nofoaga autu i Matuu, na saunoa ai le afioga i le alii kovana filifilia e faapea, e le o tagata uma sa aofia i le la faamoemoe ma Lemanu e maua avanoa e galulue ai i le malo.

Sa ia fautuaina tagata faigaluega a le malo o lo o i le la komiti ma Lemanu e aua le vave faamavae mai a latou galuega, ina nei emo ane le ata e le maua se avanoa e toe galulue ai i le malo, ona latou tuuaia lea o laua ma Lemanu o laua ua mafua ai ona le maua ni a latou galuega.

O le talitonuga o le afioga i le alii Kovana filifilia e pei ona faailoa i lana komiti, o le la agaga maualuga ma le afioga i le alii Senatoa ia Lemanu, tusa lava pe o se tagata e lei auai i le amataina mai o le la faamoemoe poo taimi o le faatosina, ae afai o lea tagata o lo o i ai le agavaa ma le tomai e mafai ai ona ia faatinoina galuega mo le manuia o le malo, e tatala le avanoa e talosaga atu ai.

Saunoa Lolo, o le agaga maualuga ia mafai ona aapa atu le latou komiti i alo ma tama fanau a le atunuu i tua ua i ai le tomai ma le poto e faatino ai galuega mo le manuia o le malo.

Sa fautuaina foi e le tofa Lolo i latou uma sa auai i le la komiti ma Lemanu e faapea, afai e i ai se tasi e fia talosaga i se avanoa ua faasalalau, ia tusi lelei le tusi talosaga faatasi ai ma pepa faamaonia e lagolagoina ai le tusi talosaga, ona tuuina atu lea mo le iloiloina.

Na fautuaina foi e le tofa Lolo i latou uma ua tofia e avea ma taitai o Komiti o Suiga a le latou vaega, e le faapea ua tofia se tasi e fai ma taitai ona leai ai lea o sana tusi talosaga e tuuina atu i totonu.

“Ia manino lelei le mea lea, e le faapea ua tofia oe ete taitai ona leai lea o sau resume e aumai i totonu mo le filifiliina o tatou taitai, e leai, fai lelei lau tusi ma tuu mai i totonu, o lea o le a tofia le komiti latou te iloiloina uma tusi talosaga ma aumai sa latou fautuaga ia maua ma Lemanu,” o le saunoaga lea a Lolo.

Na pau Ofisa e lua na taua e Lolo ua taoto atu le filifiliina o ona taitai ia laua ma Lemanu, o le Ofisa o le Loia Sili ma le Ofisa o Mataupu Tau Samoa.

O le aso 3 Ianuari 2013 i le itula e 12:00 i le aoauli ua faamoemoe e amata tauave ai e le faigamalo fou le taitaiina o le malo mo le isi fa tausaga, ma amata ai loa ona faagasolo suiga e pei ona valoia e sui tauva ua manumalo mai i le tofi kovana ma le lutena kovana.