Ads by Google Ads by Google

Fa’asala Tone Pulou i le falepuipui mo le 28 masina

E ui i se talosaga na fa’aulu e le loia a le ali’i o Tone Pulou, i le aso ananafi, ina ia na’o le 10 tausaga le maualuga o se fa’asalaga mo ia, ae peita’i, ina ua lauina le fa’ai’uga a le Fa’amasinoga Maulauga i le taeao ananafi, e 28 masina o le a tuli e lenei ali’i sa avea ma faiaoga, i le to’ese i Tafuna.

Sa talosagaina e le loia a Pulou ia se avanoa e mafai ona tatala ai lenei ali’i i tua, e faigaluega, a’o tuli lona fa’asalaga, ina ia mafai ona totogia tupe ua poloa’iina ai o ia e le fa’amasinoga.

Na taua e le alii faamasino sili lagolago ia Lyle L. Richmond lea na vaavaalua ma le alii faamasino lagolago ia Mamea Sala Jr i lenei mataupu, e ui ua tele talanoaga a le faamasinoga ma loia e uiga i lenei mataupu e talitonu lava le faamasinoga o se tasi lenei o mataupu e pito sili ona matuia ua i luma o le faamasinoga.

“E foliga mai o le ua molia i lona olaga o  ia o se tagata na te maua se lumana’i manuia, peita’i ua sasi le faaiuga ua ia faia lea ua mafua ai ona ta’usala o ia i lenei solitulafono,” o le saunoaga lea a le alii faamasino ia Richmond.

E 10 tausaga na manatu le fa’amasinoga e ao ona nofosala ai Pulou, peita’i, ua fa’amalumalu lea fa’asalaga, ae o le a fa’anofova’ava’aia o ia mo le lima tausaga, tuli le 28 masina i le to’ese.  Ae to’ese mai ai le valu ma le afa masina, ua mae’a ona tuli i le tausaga ua te’a.

Ua poloaina foi Pulou, na te toe totogia le tupe na faaalu e le malo e toe faafoi mai ai o ia i le teritori, e $5,651.20, ae e le’i atoa le tolu tausaga.  Toe fa’aopoopo i ai ma le ta’i $100 i masina ta’itasi, e fesoasoani ai i le tausiga o le tama a le teineititi lea na ma’itaga ia te ia.

O le a mafai ona iloilo e le faamasinoga se talosaga e faaulu e le loia a Pulou mo se poloaiga a le faamasinoga e tatala ai o ia i tua e faigaluega ao tuli ai lona faasalaga, pe afai e faamaonia ua maua se galuega tumau mo ia.

O le aso 5 Aperila 2012 na tali ioe ai Pulou i le moliaga e pei ona tausala ai o ia e le faamasinoga, i lalo o se maliliega sa ia sainia ma le malo,  ona o le faalavelave lea na ma’itaga ai se teineititi aoga e 13 tausaga le matua sa aoga i le aoga lea na faiaoga ai i le 2010.