Ads by Google Ads by Google

Fa’asala e le Fa’amasinoga le ali’i faifeau i le $1,000

O se tasi o tuutuuga o le nofovaavaaia e lua tausaga a le susuga i le ali’i faifeau ia Nikolao Fa’asala sa tuuina mai e le fa’amasinoga maualuga i le vaiaso nei, o lona totogiina lea o se salatupe e $1,000, faatasi ai ma lona toe totogiina o le tupe sa ia gaoiina mai i le lala o le Falemeli a le Iunaite Setete i Amerika Samoa nei, lea sa galue ai mo le tele o tausaga.

 

E tusa ai ma fa’amaumauga a le fa’amasinoga, o lo o taua ai le mae’a lea ona toe totogi e Fa’asala le tupe sa ia faaaoga e $2,977.06.

 

O le aso Gafua na te’a nei na toe tula’i ai Fa’asala i luma o le fa’amasinoga maualuga mo le tuuina atu o lana fa’asalaga, ina ua ia ioeina le moliaga lona lua na toe teuteu e le malo, lea e pei ona ia ioeina ai le solitulafono mama o le gaoi.

 

O le solitulafono mama o le gaoi, e mafai ona faasala ai se tasi i le toese mo le umi e le sili atu i le tausaga atoa, pe faasala foi i se salatupe e le sili atu i le $1,000, po o le faasala foi i faasalaga uma ia e lua.

 

A’o le’i tuuina atu le faaiuga a le faamasinoga mo le ua molia, sa ia faatoese i le faamasinoga e tusa ai o lana solitulafono sa faia.

 

Na taua e Faasala e faapea, i le avea ai o ia o se tagata faigaluega a le feterale, ua ia lagona e le o se fa’ata’ita’iga lelei ua ia faia i isi tagata faigaluega o le feterale.

 

Sa ia taua foi e faapea, o se tulaga le mea sa tupu, ua o o atu i totonu o le Iunaite Setete tala a nusipepa e tusa ai o lenei mataupu.

 

Na taua e le alii loia ia Mark Ude na tula’i mo Faasala e faapea, ua lagona e le ua molia le salamo e tusa ai o le mea sese sa ia faia, ma ua ia aoaoina mai ai fo’i se lesona taua.

 

Sa taua foi e Ude i le faamasinoga e faapea, atonu o lea ua manino le mafuaaga na aveese ai e Faasala tupe a le Falemeli, e le faaaoga mo ia lava, ae sa ia faaaoga e fesoasoani atu ai i isi tagata sa latou fia maua se fesoasoani.

 

E le gata na faamaonia e Ude i luma o le faamasinoga le maea lea ona toe totogi e Faasala o le tupe sa ia toesea, ae sa ia talosaga foi i le faamasinoga ina ia faanofovaavaaia le ua molia.

 

E lei finau le loia a le malo ia Camille Phillipe mo se faasalaga mo Faasala, ae sa ia manatu e taoto atu pea i se finagalo o le faamasinoga.

 

E tasi le tausaga i le falepuipui ma le salatupe e $1,000 na manatu le faamasinoga e faasala ai le ua molia, peitai o le a faamalumalu le tuliina o le faasalaga faa falepuipui, ae o le a nofovaavaaia o ia mo tausaga e lua i lalo o poloaiga a le faamasinoga.

 

O ni isi o ia poloaiga e aofia ai le totogi o le salatupe e $1,000, avea o ia ma tagatanuu lelei e le toe solia se tulafono, asiasi i le Ofisa Nofovaavaaia faatasi i le kuata, ma ia toe totogi le tupe a le Falemeli sa ia faaaogaina.

 

Na faailoa e le alii faamasino sili ia Michael Kruse ia Fa’asala e faapea, “e te fesoasoani i isi tagata e ala i le faaaogaina i ai o au lava mea totino, ae le o lou faaaoga o mea totino a le malo.”

 

O afioga i alii faamasino lagolago ia Logoai Siaki ma Faamausili Pomele na lagolago i le alii faamasino sili mo le iloiloina o lenei mataupu.

 

O le mataupu ua nofosala ai le ua molia, na afua mai i le faalavelave lea na tula’i mai i le va o Ianuari ma Setema 2009, ina ua ia toesea se vaega tupe mai le falemeli i Fagatogo sa galue ai, e aunoa ma se faatanaga faaletulafono.

 

Na taua i faamaumauga a le faamasinoga le ave fa’agaoi e Faasala o se tinoitupe ma ni fa’ailoga tusi (postage stamps) mai le falemeli, i le aofaiga e $2,977.06.