FA’ASALA ASRU KALAPU A FAGATOGO MA MAPUSAGA

Ua faia nei se faaiuga a le Iuni Lakapi a Amerika Samoa (ASRU), ina ia faasala kalapu lakapi a Fagatogo ma Mapusaga faatasi ai ma tama taaalo, na aafia i le vevesi lea na tula’i mai, a’o faagasolo le taamilosaga taitoa 7 a le Mosooi i le masina na te’a nei, ina ia tusa ai ma tulafono a le IRB o lo o lima taitaiina ai le faafoeina o taaloga lakapi i Amerika Samoa.

 

O le aso Lua o le vaiaso nei na fono ai le Komiti Faafoe a le Iuni Lakapi mo le talanoaina o sana faaiuga e faatatau i lenei mataupu, lea na taitaia e le afioga i le Sui Taitaifono a le ASRU, le afioga ia Aumoeualogo Te’o J. Fuavai faatasi ai ma nisi o sui o le Komiti Faafoe.

 

I le faaiuga a le ASRU mo Fagatogo, e $1,000 le salatupe lea ua faatonuina le kalapu lakapi a Fagatogo latou te totogiina, ma le tausaga e tasi lea ua nofovaavaaia ai, e le tatau ona toe aafia i se isi fusuaga poo se misa i taimi e faagasolo ai taamilosaga lakapi.

 

Ae mo tama taaalo e to’alua a Fagatogo na aafia i le vevesi, e ta’i $100 ua faasala ai i laua e le ASRU, atoa ai ma le faasa lea ona toe auai i ni taamilosaga a le ASRU, sei vagana ua maea a laua faamasinoga o lo o faagasolo i le taimi nei ona faatoa toe iloilo lea e le Iuni.

 

Mo le kalapu a Mapusaga, e $500 le salatupe lea ua poloaina e le ASRU i latou e totogi, atoa ai ma le nofovaavaaia mo masina e 6, e le tatau ona toe aafia i ni misa poo ni fusuaga i taimi o taamilosaga a le ASRU.

 

Ae mo le alii taalo e toatasi mai Mapusaga lea na ‘yellow card’ i le aso o le taaloga ona o le maualuga o lana pu’e, e $100 lea ua faasala ai o ia.

 

Ua mafua ona eseese faasalaga tupe a kalapu e lua e pei ona atagia i le faaiuga a le Komiti Faafoe, ona o le ulua’i taimi lenei ua aafia ai Mapusaga i se vevesi faapenei.

 

E talitonu le Samoa News o le vaiaso nei na tau aao atu ai e le ASRU kopi o tusi i kalapu e lua o lo o taua i le faaiuga, mo le faailoaina atu i ai o le faaiuga a le Iuni, faatasi ai ma le fautuaga, afai e le totogiina mai faasalaga e pei ona taua, o le a le mafai ona tausinio i le taamilosaga taitoa 7 a le Paramount 7’s lea ua faatulaga e faia i le aso 6 & 7 Novema, 2013.

 

O le amataga o le vaiaso nei na tutula’i ai i luma o le faamasinoga alii e toalua mai le kalapu lakapi a Fagatogo, ina ua faila e le malo moliaga faasaga ia te i laua, e mafua mai i le vevesi lea na manu’a ai se alii mai le au a Mapusaga i le aso 26 Oketopa, 2013 i Tafuna.

 

O sui e toalua o le au lakapi a Fagatogo ua molia e aofia ai Fatutoa Levi ma Talofa Faimoa, lea o lo o molia uma i laua i le moliaga mamafa o le faaoolima i le tulaga lua, atoa ai ma le moliaga mama faatupu vevesi i nofoaga faitele.

 

O le mataupu lenei na tula’i mai i le aso Toona’i, 26 Oketopa, 2013 i le taimi o le taamilosaga taitoa 7 o le Mosooi sa faagasolo i le Malae Taalo a le VA i Tafuna, peitai na faatoa tuuina atu i le Ofisa o Leoleo i le aso 30 Oketopa, ina ua faatoa taofia le alii na manu’a i le falema’i mo togafitiga, ma moomia ai loa e le pulega a le falema’i o le LBJ i Fagaalu se fesoasoani a leoleo, lea na tofia ai loa le alii leoleo suesue ia Det. Filemoni Amituana’i na te suesueina lenei mataupu.

 

Ina ua fesiligia e leoleo le alii na aafia i lenei mataupu, sa ia taua ai e faapea, o ia sa manu’a ina ua faaoolima ni alii se toalua mai le au lakapi a Fagatogo ia te ia, i le latou taaloga i le aso 26 Oketopa, 2013.

 

Na taua e le alii na aafia i leoleo e faapea, o se vevesi na tulai mai i le va o le latou au ma Fagatogo, ae faafuase’i ai loa ona faaoolima ni alii se toalua ia te ia ma manu’a ai. Na taua e le alii na aafia e faapea, o le tu’i muamua na tau i ona foliga, peitai ina ua toe tau le tu’i lona lua i lona auvae, o iina na pau ai loa i lalo ua matapogia.

 

O se video sa pu’eina i le taimi o le vevesi atoa ai ma ata sa pu’eina e ni tagata sa i ai, sa fesoasoani malosi lea i leoleo i le tau faamautuina o i laua sa faatinoina lenei solitulafono, ma i totonu o le ata video se pu’eina, sa mafai ona iloa ai ni alii taaalo se toalua mai le au a Fagatogo na aafia i lenei mataupu, o le isi sa ia ofuina le jersey #6 ae o le isi sa ia ofuina le jersey #11.

 

I molimau sa mafai ona tuuina atu e nisi sa i ai i le taimi o le vevesi i leoleo e faapea, o Levi na amataina le vevesi lea na aafia ai loa tama taaalo o au e lua, e le’i umi ona avau le misa i le va o au e lua, ae vaaia loa Faimoa ua ia tu’iina le na aafia ma pau ai loa i lalo o le malae.

 

Ae na taua e se molimau sa i ai i le taimi o le taaloga i le Samoa News e faapea, o le vevesi na tula’i mai ina ua toeititi lava mae’a le taaloga i le va o Fagatogo ma Mapusagafou i le ‘Quarter Final’ o le Ipu Autu o le taamilosaga, ina ua maualuga le pu’e a se alii mai Mapusagafou i se alii mai le au a Fagatogo, ma vaaia ai le pau i lalo o le alii Fagatogo ua manu’a, ma mafua ai loa ona tulioso mai i totonu le au maimoa a au e lua ma avau loa le fusuaga.

 

Ina ua fesiligia e leoleo ia Levi, sa ia ioeina ai lona tu’iina o le alii na aafia ma manu’a ai, ae ina ua fesiligia fo’i Faimoa e leoleo, sa ia ioeina ai fo’i lona tu’iina o le auvae o le alii na manu’a ma pau ai i lalo o le malae.

 

Na faailoa e le foma’i ia Dr. Leuta Pio Leota i leoleo e faapea, e le gata sa unaoa le pito i lalo o le itu taumatau o le auvae a le alii na manu’a, ae sa laulua fo’i le itu lava lea e tasi o le auvae na aafia i le faaoogalima, e pei ona faailoa mai i se Faata sa faia i le fale ma’i.

 

O le aso Tofi na te’a nei na tulai ai Levi i luma o le faamasinoga maualuga ma ia teena tuuaiga faasaga ia te ia.

 

I lona teena ai moliaga a le malo, ua faatulaga ai loa le isi ana iloiloga e faia lea i le aso 12 Tesema, 2013.

 

O ananafi na faataunuu ai le ulua’i iloiloga a le susuga Faimoa i luma o le faamasinoga faaitumalo, mo le iloiloina lea o mau a le malo, pe lava ma totoe e lagolago ai le tulafono o lo o tuuaia le ua molia sa ia faia.

 

I le mae’a ai o le iloiloga sa faia, na faamalieina ai le faamasinoga faaitumalo, o lo o lava ma totoe mau a le malo e lagolago ai sa soli se vaega o le tulafono, ma, o le alii fo’i o Faimoa o lo o tu’uaia i le soliina o lea tulafono.

 

O le itula e 9:00 i le taeao o le aso Gafua o le vaiaso fou lea ua faamoemoe e tula’i ai Faimoa i luma o le faamasinoga maualuga, mo le faaauauina ai o lana mataupu.

 

O le aso Tofi na te’a nei na tatala ai i tua Levi ma Faimoa ina ua la totogiina le ta’i $5,000 na faatulaga e le faamasinoga e totogi ona faatoa mafai lea ona tatala i laua i tua, e faatali ai taualumaga o le la mataupu.

 

I lalo o tulafono a le IRB (17.1.1 (a) o lo o manino mai ai “Soo se tagata taalo e faasa ona toe auai i se taaloga, e tatau ona matua faasa ona toe auai i soo se taaloga tau lakapi i le umi o lona faasalaga.”

 

O le tuutuuga ua faia e le ASRU, afai e le totogiina e au e lua a laua faasalaga e pei ona tuuina atu, e leai se avanoa e auai i le taamilosaga taitoa 7 a le Paramount 7’s lea ua faatulaga e faia i le aso 5 & 6 Tesema, 2013, ma faai’u ai loa fo’i ta’amilosaga lakapi o lenei tausaga.

 

Na taua e le Faiaoga o le au a Fagatogo i le Samoa News e faapea, ua maea ona faia se ifoga e matua ma aiga o alii e toalua mai le latou au, aga’i i matua ma le aiga o le alii Mapusagafou na manu’a, lea fo’i na talia ma le agaga fiafia e le aiga o le alii na manu’a le ifoga.

 

E le’i maua mai se finagalo mai le Taitaifono o le Iuni Lakapi a le atunuu, le afioga i le matua ia Togiola T. A Tulafono, ona o le aso Gafua na te’a nei na tuuvaa ese atu ai o ia mo le fonotaga faaletausaga a le IRB lea o lo o usuia i Aialani i le aso 18-20 o Novema.

Comment Here