O le aso Faraile ua te’a sa fa’atautaia ai le sauniga o le Fa’apinega o le fanau a’oga, ua mataituina le latou agava’a i le Polokalama a le JROTC, po’o a’oa’oga fa’ata’ita’i i tautua eseese a le militeri.

O le to’atele o fanau ua mae’a fa’apine a latou galuega lelei ma le aga’i i luma o le ola taumafai i a’oa’oga fa’amiliteri, o le fanau a’oga ua i ai nei i tausaga fa’ai’uaso, ae to’aititi lava nisi o le vasega 11 ua fa’apine fa’atasi atu ai, ona ua iloga fo’i le latou taumafai ma agava’a ua ausia.

Faia’oga o le Polokalama JROTC i Kanana Fou, SSG Tarrant, sa ia saunoa mai, “O nei fa’ailoga, e fa’amau fa’ailoga ai le maoa’e o taumafaiga a fanau ua ausia agava’a e tatau ai ona umia sana pine, ma  oi latou fo’i nei, ua mataituina, e gafatia e i latou ona toe fesoasoani e a’oa’o nisi o fanau i le polokalama i tausaga o mulimuli mai ia i latou i Kanana Fou lava.”

I le sauniga sa va’aia le sagasagai atu o matua ma aiga, aua e fiafia tele i latou ua fa’apine o latou alo ona ua i ai i o latou fanau agava’a ua alagatatau ai ona fa’apine lo latou taumafai. E le gata i lea, ae sa auai uma le vasega o fanau e tau’avea lea mataupu mai tausaga ta’itasi o le a’oga maualuga a Kanana Fou, fa’atasi ai ma le taupulega a le a’oga ma ona faia’oga.

“Ua alagatatau ona faia lenei si’itaga o tofiga ma fa’ailoga o le fanau, e fa’amautinoa ai, le lelei a’ia’i ona fa’atautaia o a’oa’oga fa’amiliteri i totonu o Kanana Fou,” o le tala lea a le Faia’oga Sinia a le JROTC SFC Ala.

Ua fa’ailoa mai fo’i, o le ulua’i fa’apinega lenei o le tausaga a’oga, ma ua mautu nei fo’i ta’ita’i o le a fa’atautaia le polokalama i totonu o Kanana Fou i le 2014-2015.

O tiute o le a latou fa’atautaia e aofia ai le va’ai toto’a o isi sui fa’ato’a ulufale i le JROTC, fesoasoani i ai ina ia tumau lo latou naunau ma ia aga’i i luma le latou ola taumafai i lea fo’i polokalama aoga tele i lo latou lumana’i.

O le avanoa lelei fo’i lea, e fa’aaogaina ai e i latou aoaoga sa a’otauina ai i latou mai le fa’ato’a ulufale i le JROTC. O tulaga fa’ata’ita’i, e sili ona mata’ina le agava’a ai o nisi o nei fanau ua mae’a fa’apine.

I le polokalama atoa, sa fa’atautaia lava e le fanau, e fa’ailoa mai ai i matua ma le a’oga atoa, ua agava’a i latou.

“Matou te fa’afetaia fo’i le fesoasoani malosi mai a le a’oga maualuga i Kanana Fou ma lona taupulega, i le matou faamoemoe e fa’ailo le tomai ua mafai ona utufia i loto ma agaga o le fanau, ua iloga ua gafatia e i latou ona faia le galuega fa’ata’ita’i o vaega au,” o le tala ata lea a Tarrant.

“O i latou nei ua faapine mo tulaga fou i lenei tausaga a’oga, o i latou lava na o le a latou mataituina le fanau i le polokalama ma latou faia fo’i suiga i sui agava’a o le fanau o tau’avea le JROTC i Kanana Fou High,” o se fa’apupulaga atili mai lea a le ali’i faiaoga ia Tarrant.

Ua fa’afetaia fo’i e le vasega o faia’oga ma le fanau a’oga i le polokalama a le JROTC le vaega o matua i lo latou auai mai i le latou fa’amoemoe i lea aso.

O fanau na maua o latou pine i lea aso: Joseph Tuliau; Jared Afalava; Lipano Vele; Emelita Esau; Bob Faitele; John Scanlan; Stacy Gaisoa; Anastasia Magalo; Faaoloolo Faavevela; Peniamina Seelua; Anthony Poasa; Selaina Afo; Vaipuna Tunoa; Kealoha Schuster; Moana Auvea; Kirikiti Aulaumea; Kennedy Hanipale; Stella Foots; Michael Elisara; Tamirah Taeatafa; James Scanlan; Tristan Kim; Demilio Tua; Salote Leute; Maima Taelevai; Washington Ameperosa.