O le ta o le 12:00 i le aoauli ananafi sa fa’ataunu’uina ai se sauniga mamalu a le Vaega Au 411th Engineer Battalion Forward Support Company e taualoa ai le fa’amauina o le Fa’ailoga Captain a le susuga Capt. Afuola, Aoatoa.

O le tofa Afuola Nanai Kalasa sa ia fa’apineina lona alo Kapeteni, ma o se fa’aeaga sa naunau mai le ali’i kapeteni e faia lava e lona tama.

“Na ou ausia lea fa’ailoga a’o i ai i Hawaii, peita’i, sa ou talosagaina lava e fa’ao’o mai i le aso ma i lotoifale o le tatou atunu’u, ina ia mafai ona fa’aea ai a’u e si o’u tama, aua e ui lava ina malaga le tina, ae o lo ua fa’ao’o mai e le Atua lona soifua na te molimauina ai lenei fa’aeaga a le vaega au mo a’u!” O se fa’amatalaga lea a Capt. Aoatoa Afuola.

O Aoatoa o le ui’i lea o le fanau a le tofa Afuola ma le faletua le tofa Filiofaleupolu Meloma Afuola, ua malolo mai i ti’asa. O ia sa amata ana a’oga i le a’oga tulaga lua a Manumalo i Malaeimi, soso’o ai ma le au atu i Leone High school ma fa’ai’u lelei ai fo’i ana a’oa’oga. Si’itia mai a’oa’oga i le Kolisi Tu’ufa’atasi i Malaeimi ma fa’aauau ai mo fa’ailoga maualuluga i Chaminade University i Hawaii lea na fa’au’u ai i le tausaga e 2009.

O lona auai i le Vaega Au ua atoa nei le 10 ma le afa tausaga, ma sa a’oga o ia ae fa’aauau lava i le polokalama a le ROTC, lea ua maua ai fo’i lona avanoa e avea ai ma Ta’ita’i o le Polokalama o le Army ROTC i le Iunivesite o Hawaii i Manoa.

Mai lona fa’ailoga o le 2LT, sa ia fa’amautuina ai lona avanoa faigaluega lea, peita’i, o lea ua si’itia nei i le “Captain.” I le vaega a le 411th Engineer Battalion, sa fa’amautu ai lona fa’apinega e le tama’ita’i Capt. Hanna Tusiesea Vaouli, o le alo e fa’asino ia Su’a ma Tia Seloti o Petesa Uta.

O Capt. Hanna Vaouli na ia mauaina le tulaga Ta’ita’i  o le 411th Engineering Battalion ia Setema 2012 ma ua fa’aauau mai ai pea lana auaunaga i lenei vaitau i lea lava tofiga.

I se manatu fa’aalia o le tama ia Afuola e tusa ai o le fa’aeaga o le atali’i, sa ia fa’apea ai, “E fa’afetaia le Atua ua ou mafai ona molimauina lenei aso tele mo lo’u atali’i, o mea nei e afua ai ona fa’ailo e le Upu a le Atua, e le tutupu fua mea fa’apenei, o ala o fa’amanuiaga mo fanau, o se fiafiaga tele lea mo le matua! Fa’afetai la ia te Ia!”

E ese mai le taimi sa a’otauina ai Aoatoa Afuola, sa ia tautua fo’i i le tafa o taua i Iraq i le tausaga e 2005, peita’i, o lea ua saga fa’aea pea o ia e le vaega au, o le fa’afetai tele lea mai ia te ia, ona ua mafai ona aulia e si ona tama lenei vaitaimi o fa’amanuiaga mo ia.

Sa tu’uina fo’i ia te ia se avanoa matagofie na te tima’i ai i le Palatuni atoa a le 411th Engineering i le aoauli ananafi ona fa’ato’a ta’ape ai lea. I le taimi nei, ua galue Capt. Afuola, Aoatoa i le polokalama a le ROTC i le tatou Kolisi Tu’ufa’atasi - ASCC.