Ads by Google Ads by Google

FA’APEFU SI FAFINE AE MATAMATA SI ANA FANAU

O le ali'i lea na ia fa'apefu ina si ona to'alua i fafo ma le fale, ina ua uma ona ia fasi fa'amo’amo’aina ao matamata i ai si ana fanau pei o lo o matamata i ata cartoon, ua molia nei e le malo i moliaga o le fa'atupu vevesi i nofoaga faitele ma le fa'ao'olima i le tulaga tolu.

E le mafai ona fa'alauiloa e le Samoa News le igoa o le ula lea ona o puipuiga lava i lalo o le tulafono, ina nei mafai ai fo'i ona iloa ma le igoa o le tina ma si ana fanau o lo o a'afia i lenei mata'upu.

I fa'amaumauga a le fa'amasinoga na ta'ua ai e fa'apea, na tifa atu le ‘ona a le ula lea i le fale i le aso Tofi na te'a nei, ma amata loa ona fa'apisapisa i si fafine ma tamaiti, ma i’u ai lava i lona la'a atu ma amata loa ona fasi lona to’alua a’o matamata i ai la laua fanau.

Ana le fa'alogo atu lava le fafine o le a tau 'ave mea a luga, e le tu i luga ma pefu loa i fafo ma le fale, ma iloa ane loa e aiga tua'oi ma latou viliina ai loa leoleo.

E lei umi lava ona fai le fia a'asa o le ‘ona ae taunu'u loa leoleo ma loka mai o ia ma auina atu i le ofisa mo su'esu'ega, mulimuli ane ai auina sa’o atu i le falepuipui i Tafuna e loka ai.

Na te'ena e le ula lea moliaga fa'asaga ia te ia ina ua tulai i luma o le fa'amasinoga fa'aitumalo i le taeao ananafi.

I lona te'ena ai o tu'uaiga a le malo, ua fa'atulaga ai loa lana uluai iloiloga e faia lea i le isi lua vaiaso.

Ua poloaina e le fa'amasinoga le ali'i lenei ina ia aua nei ona toe taumafai e fa'afeso'otai lona to'alua ma lana fanau i so o se auala, se'i vagana ua tu'u atu e le fa'amasinoga se isi ana poloaiga.

Ua fa'asa foi ona ia toe taumafai e fa'afefe pe faia ni isi lava gaoioiga e fa'amata'u ai lona to'alua ma lana fanau.

I fa'amaumauga a le fa'amasinoga o lo o taua ai, e le o se taimi muamua lenei ua faia ai e le ua molia nei gaoioiga i lona to'alua, ae o lea fa'atoa fa'ailoa i leoleo.