O le fesili pe faapefea ona taofia le faatupulaia ma le saoasaoa o le ulufale mai o tagata mai fafo i totonu o le teritori, aemaise lava i tagata mai Asia, o se fesili lea ua lu’itauina ai le Ofisa o le Loia Sili ma le Pulega fou o le Ofisa o Femalagaaiga ua i ai, i le sailia lea o ni auala e foia ai lenei faafitauli.

Na maua le avanoa e feiloai ai le Samoa News ma le afioga i le Loia Sili a le malo i le vaiaso na te’a nei e faatatau i lenei mataupu, lea na ia faailoa mai ai ni isi o gaioiga a le Ofisa o le a faia e foia ai lenei faafitauli, e ui e le’i finagalo le afioga i le Aloalii ia Afoa L. Suesue Lutu e faalauiloa gaioiga ua tapena i ai le Ofisa e faatino ina ia foia ai lenei faafitauli.

“Ua i ai le auala ua maea ona tapena e le Ofisa e foia ai le faafitauli lenei, ma sailia ai ni isi o auala o lo o mafua ai le televave o le ulufale mai o tagata mai Asia i le teritori, pau la’u tatalo, e le mafai ona faailoaina atu i le taimi nei sei vagana ua tuuina atu muamua la’u ripoti i le alii Kovana Sili, ona faatoa mafai lea ona ou talanoa i tulaga e pei ona ou taua,” o le saunoaga lea a le afioga Afoa i le Samoa News.

O se tasi o auala na taua e ni isi o sui o le Fono ua maitauina le televave ai o le aofa’i o tagata mai Asia ua nonofo ma aumau i Amerika Samoa, o le vaega o le tulafono lea e mafai ai e Pisinisi ona sponsor tagata mai fafo i le teritori.

O se tasi o itu na faapupula e Afoa faasaga i ni isi o faasea mai le atunuu, o le mafuaaga ua ala ai ona tuai le valaauina o Fono a tagata mo a latou pepa nofomau.

Saunoa Afoa, e le o taofia iloiloga mo fono a tagata e fia faafou a latou ID i le taimi nei, sei vagana ai fono mo i latou faatoa talia talosaga mo le aumau i le teritori, lea o lo o faatelegese teisi ona o ni isi o fuafuaga e moomia le faamautu muamua a le Komiti Faafoe.

O se tasi o atugaluga mai ni isi o Senatoa, o le toatele lea o tagata mai Asia ua vaaia le galulue i le tele o faleoloa i le atunuu.

Saunoa le alii Senatoa ia Leatualevao Soli e faapea, i tausaga ua mavae sa maitauina ai ni isi o faleoloa e pulea e tagata mai Asia o lo o galulue ai nai tagata Samoa, peitai afai e toe asia nei pisinisi i le taimi nei, ua na o tagata Asia lava ua galulue ai ae ua faamalolo uma nai tagata Samoa.

O atugaluga o le alii Senatoa, afai e faaauau pea le agai mai o tagata mai Asia ma ave avanoa faigaluega mo tagata o le teritori, o le isi 10 tausaga o lo o lunana’i nei o le a tulaga faaletonu ai le toatele o tagata Samoa i le tau saili lea o ni a latou galuega.