Ads by Google Ads by Google

Fa’apaia le malumalu fou EFKAS i Malaeloa

O le taeao o le aso To’ana’i, Apelila 4, 2015,  sa fa’apaiaina ai le malumalu fou ‘Satauro o le Ola’ o le Ekalesia Faapotopotoga Kerisiano i Amerika Samoa (EFKAS) i Malaeloa.

 

O le sauniga sa ta’ita’ia e le susuga i le Toeaina o Tautalatasi Fanolua o le pulega. Sa amata i fafo o le malumalu le sauniga i se saunoaga a le faifeau toeaina i upu mai le Tusi Paia ma talosaga ai le lipoti mai ia Faleosina Voigt, le faatonusili o le Matagaluega o Galuega Lautele a le malo, i le tulaga o le galuega.

 

Ina ua ma’ea ona tauaao le pemita e faatagaina ai le faaaogaina o le falesa, sa tuuina i le faletua o le faifeau ia Rosapa'epa'e Manase le avanoa na te tatala aloaia faitotoa o le falesa ma gasolo atu loa le 'au faigaluega a le Atua i totonu - e aofia ai le Ta'ita'ifono EFKAS, le susuga ia Leatulagi Faalevao.

 

I le sauniga faapitoa i totonu o le malumalu sa saunia le tatalo e le faafeagaiga a Futiga o Vilirupu P. Mauigoa, ae na saunia e Faletoi L. Uso le lauga. O le molimau sa faaleoina, e Faigata Manase, o le faafeagaiga a le EFKAS Malaeloa.

 

I le tulaga o le galuega sa ia saunoa Manase e faapea, “o lenei galuega na faia e aunoa ma se aitalafu, e fai lava e tagi lava i lima, o le Mafutaga a Tina e fai le ponesi ma 'car wash' ae i le faaumaina o totonu na ofo mai e aiga lotu a le 'aulotu, pei a moli tetele ma le pulela'a ma le tele o mea, na aumaia e tagata ona o le agaga fiafia ma le loto fiafia."

 

"Ia o lenei ua tini taunuu le galuega lea sa outou mafatia ai, ma 'osi'osia ai, na tau ilo le lelei o faamoemoega, ma o lo outou silasila lava i le Atua ma le lona finagalo, ua maea ai,” o se vaega lea a lana saunoaga.

 

E moni lava le mafatia o lenei galuega, aua e le’i fausiaina Roma i se aso e tasi, i le vaavaaia atu i le toe tu mai o le Malumalu o le Alii, o se vaaiga e faa'eaina i luga o outou ulu, pe'a e alu atu nei i totonu o Malaeloa o tu mai le Malumalu.

 

Sa faaiu i lalo i le Aitulagi, aua o lenei afioaga e lua faalupega, o le Aiga Aitulagi, ma le nu'u o Ituau o Tofiga.

 

Lena la e i ai pitonu'u nu'u e lua, o Aitulagi ma Ituau, lea o loo alalatai ai le Faifeau i Aitulagi ae tu le Falesa i Ituau.

 

Na faaiu mai i'ina le 'au faigaluega a le Atua ma o latou faletua, i feagaiga a Malaeloa i fata faitaulaga e fia sa auai uma, na auai foi le 'au valaaulia.

 

Sa auai atu foi sui o le malo, afioga i Senetoa ia Tuiasina Esera mai le itumalo Tualatai ma Faletagoai Tuiolemotu, o le itumalo Alataua, ae maise le afioga i le Fofoga Fetalai o le Maota o Sui, Savali Talavou Ale.

 

Sa auai foi afioga i faipule ia Atalina Asifoa na Timusa Tini Lam Yuen. O afioga i faipule nei e i ai i totonu o le Malaeloa, a le aiga Aitulagi e fai itumalo i le luga ma Alaoau ma Asu, ao le Ituau o Tofiga e fai Itumalo ma Futiga, Taputimu ma Vailoa.

 

O le ala lena e lua ai Itumalo faapalota e o ai le pitonuu nei a Malaeloa.

 

O le faaili a le Siliva Band sa faafiafia i lenei faatasiga lea sa auai le susuga i le Tama Matua ia Tuilefano le tiakono toeaina a Sisifo ma le mamalu e i ai Emau ma le faletua lea ua malolo manumalo mai i le 'aulotu a Leone, ma le anoano o le Ekalesia.

 

O le fofoga o le aso i taimi o faaaloaloga sa tuuina atu i le failautusi o le ekalesia ia Seigafo Vaipuna Pati, ia ma le tapuaiga i le Ekalesia a Malaeloa ia Aitulagi ma Itua'au.