Ads by Google Ads by Google

Fa’aopoopo Semina ma A’oa’oga mo Tupulaga Talavou, Tina ma Tama’ita’i 2014

Ua manino i le polokalame fa’ataoto a le Matagaluega o Tupulaga Talavou, Tina ma Tama’ita’i mo le Tausaga Tupe 2014, le faaopoopo lea o ana auaunaga e pei o Semina ma A’oa’oga i so o se matata aua le a’otauina tupulaga talavou ina ia lava tapena i latou mo le lumana’i manuia o le atunuu.

 

I le Paketi fuafuaina a le Matagaluega o Tupulaga Talavou, Tina ma Tama’ita’i lea ua tuuina atu i le Fono mo le pasiaina, ua faatulaga mai ai le aofaiga e $640,000 e faatino ai ana auaunaga masani mo le isi tausaga tupe o le a sosoo nei, tusa lea e $300,000 ua maualuga mai nai lo lana paketi mo le tausaga tupe lenei 2013.

 

I le manulauti a le Matagaluega e pei ona taua i totonu o lana paketi fuafuaina o le tausaga tupe 2014, o lo o taua ai e faapea, e le gata o le tiute tauave a le Matagaluega le faataoto o fuafuaga atoa ai ma le aoaoina o polokalame mo le lumanai manuia o tupulaga talavou, tina ma tamaitai, ae latou te faia foi semina e aoaoina ai agavaa eseese, faapea ai ma le faia o polokalame mo le toe faaolaolaina o tu ma aganuu.

 

E lima ni isi o polokalame o lo o faaauau pea ona faia e le matagaluega i le taimi nei, ae o lea ua faamoemoe e faaopoopo le aofai o ia polokalame i le tausaga tupe fou 2014.

 

Mo se faataitaiga o polokalame o aoaoga mo tupulaga talavou (youth leadership training), e lua polokalame na faataunuuina i le tausaga tupe lenei, ae fa lea ua fuafua e faataunuuina i le isi tausaga tupe fou.

 

O le polokalame o le ‘Afa Weaving Making Training/Le Leo Project/ Fatuga, e na o le tasi le polokalame sa fuafuaina mo le tausaga tupe lenei, ae o lea ua fuafuaina polokalame e lua mo le tausaga tupe fou.

 

I le polokalame e fesoasoani ai i tina talavou (Teen Mothers Rehabilitation & Skills Training), o le a tumau pea le aofai o polokalame e lua o lo o faia i le tausaga nei mo le tausaga tupe fou.

 

E fa polokalame mo le aoaoina o le kuka, su’isu’i faapea ai ma aoaoga faapitoa mo tina o le a faia i le tausaga tupe fou, mai le tolu polokalame sa fuafuaina mo le tausaga tupe lenei, ma le aoaoina o le lalagaina o measina a le atunuu po o le ietoga, ua faamoemoe ai e na o le lua polokalame o le a faia i le tausaga tupe fou, mai le fa polokalame o lo o faagasolo i le tausaga lenei.

 

O ni isi o faaopoopoga i le paketi a le matagaluega e aofia ai le totogiina o tagata o le a faakonekarate i le faatinoina o ni isi o aoaoga ua taua i luga, ina ia mafai ai ona fesoasoani i le faaaupegaina o tupulaga talavou, tina ma tamaitai i tomai ma agavaa eseese, e fesoasoani ai i le atinaeina o latou aiga, aemaise ai o le sailiga o ni galuega fou po o le faatutuina foi lea o ni a latou pisinisi.

 

Ua fuafuaina foi e le matagaluega le auai atu o ni ona sui e auai i ni aoaoga e faia i le malo tele ma le motu o Manu’a, mo mataupu e faatatau i tupulaga talavou, tina ma tamaitai.

 

E pei ona taua e le afioga i le Faatonusili filifilia o le matagaluega i le Samoa News ia Pa’u Fuiavailiili Roy Ausage i le taimi na faia ai ni isi o a latou polokalame i ni nai masina e lei mamao atu, o le agaga autu o le matagaluega ma lana tautua, ia mafai ona faatinoina aoaoga eseese mo tupulaga talavou, tina ma tamaitai, ina ia mafai ai ona fesoasoani i le atinaeina o latou aiga i le itu tau tupe.

 

Saunoa Pa’u e fa’apea, o le tele o aiga o le atunuu e malolosi tele matua e galulue e saili tupe e tausi ai le aiga ma le fanau, ma e tatau foi ona i ai le agavaa i le tina ma le tama e faasoasoa lelei ai le tamaoaiga, ina ia aua ne’i mamafa pito tasi le fa’aaoga a ia mafai ona sefe mo manaoga taua o le aiga.

 

O ni isi o aoaoga sa mafai ona faatinoina e le matagaluega i ni nai masina e lei mamao atu, ma ua toatele foi ni isi o le atunuu na faauu mai ai, e le gata o aoga kuka ma su’isu’i, ae sa faapea foi ona i ai ma aoaoga e iloa ai e le tagata faasoasoa ma sefe tupe i totonu o le aiga.