FA’AOPOOPO E LE FONO LE MILIONA I LANA PAKETI

E tasi le miliona lea ua faaopoopo e le Fono Faitulafono i lana paketi mo le tausaga tupe fou 2014, e faatino ai ni isi o manaoga e pei ona talanoaina e le komiti soofaatasi a le fono i le vaiaso nei, lea e aofia ai ma se siitaga i totogi o senatoa ma faipule.

 

O le miliona lea ua faaopoopo e le fono i lana paketi o lo o faatupe mai i lalo o Polokalame Faapitoa, ina ua latou faaitiitia vaega tupe mai polokalame e 9 sa fuafuaina e le kovana i totonu o le paketi a le malo sa tuuina atu i le fono.

 

E na o le pau lava lea o le suiga ua faia e le Fono i le paketi atoa a le malo lea pasia e le fono.

 

I lalo o le $335,000 sa fuafua e tuuina atu mo le Sports Complex, ua aveese mai ai e le Fono le $135,000 mai vaega tupe lea; i lalo o le miliona sa fuafuaina mo le Matagaluega o Tupe, e $100,000 ua aveese mai ai e le Fono; o le $150,000 sa fuafua e tuuina atu i le polokalame a le kovana e faafou ai pepa o tagata mai fafo ua ova aso i le teritori, ua aveese mai ai le $50,000.

 

O le $500,000 sa fuafua e tuuina atu e faatino ai galuega a le Matagaluega o Aoga, ua aveese mai ai e le fono le $200,000, e faapena foi i le $500,000 sa fuafua e faaleleia ai le malae o le Si’ugaula o le Atuvasa, ua aveese mai ai e le fono le $200,000.

 

O le $150,000 sa fuafua mo polokalame a faipule i taimi o le palota, ua aveese mai ai e le fono le $50,000; $50,000 ua aveese mai i le polokalame e $300,000 sa fuafua e faaleleia ai le malae taalo i Tafuna.

 

O le isi $100,000 na aveese mai i le $500,000 sa fuafua e faaleleia ai le Fale Talimalo o le Rainmaker Hotel, ma le isi $100,000 na aveese mai i le $600,000 sa fuafua e faaleleia ai auala i totonu o le atunuu.

 

O le talitonuga o le komiti soofaatasi o le paketi a le fono ina ua talanoaina suiga nei, e le tatau ona toe aapa le fono e sui le paketi a le malo, ona o lo latou talitonuga, o le paketi lava ua tuuina mai e le kovana ma le faigamalo, o le paketi lava foi lea ua uma ona latou malilie i ai, sei vagana ai suiga laiti a le fono e tatau ona tuu ai i totonu.

 

O suiga a le fono mo lana paketi na faia ina ua talosagaina e le alii peresetene ia Gaoteote Palaie Tofau le komiti soofaatasi a le fono, e manaomia se faaopoopoga i le paketi a le fono ona o le tele o manaoga tautupe e le o i ai ma se tupe e faatupe ai.

 

Mo se faataitaiga o le saunoaga a Gaoteote i manaoga e le o mafai ona faatino e le fono ona e le o lava se tupe, e le o i ai se tupe e totogi ai le pili eletise a le fono, e le o i ai se tupe e faatau ai mea e faatino ai galuega (supply), e le o i ai se tupe e faatupe ai totogiina o malaga mo faipule ma senatoa e tatau ona o ai i fonotaga i fafo, atoa ai ma se faaopoopoga i totogi o senatoa ma faipule.

 

Saunoa Gaoteote e faapea, o le taimi lelei lava lenei ua ono mea ai ma tatau ona sii totogi o senatoa ma faipule, ma ua alaga tatau foi ona tuuina mai le paketi a le fono e iloilo ma faatulaga atu e le fono, aua o le fono le isi vaega maoti o le tafatolu o le faigamalo a Amerika Samoa.

 

Na fautua Gaoteote i senatoa ma faipule e le tatau ona fefefe e fai mea lelei mo le fono, aua o le nofoa senatoa ma le faipule, e le o se nofoa e alu ma se isi i sona aiga, ae o le nofoa e faasolo mai ai tupulaga o le atunuu i le lumana’i.

 

Sa fautuaina foi e Gaoteote sui o le komiti soofaatasi ina ia tutu faatasi e lagolago fuafuaga faataoto a le fono, aua o le tele o taimi e fetaiai ai le fono ma le tele o faalavelave e pei o maliu mo ni isi o afioga i senatoa faatoa mavae atu, ae leai se tupe e tagolima i ai le fono e faatino ai lana fatuaiga tausi i aso faapenei.

 

A’o lei tuuina mai le paketi a le malo i luma o le fono faitulafono, sa fautuaina e le kovana sili ia Lolo Matalasi Moliga faatonusili o matagaluega ma ofisa a le malo, ina ia aua nei misi se isi i taimi o iloiloga a le fono i le paketi.

 

Sa fautuaina foi e Lolo ana faatonusili, o le paketi lava ua latou tuuina atu i  luma o le fono, o le paketi lava lena e alu ai ofisa uma a le malo, ae le manaomia le toe o atu o faatonusili i luma o le fono ma toe talosaga i ai mo se isi faaopoopoga i a latou paketi, aua afai e tupu lea tulaga, lona uiga ua atagia mai ai e le o tasi le loto a le faigamalo i le faatinoina o ana galuega faatino.

 

O le tele o faatonusili sa fesiligia e le komiti soofaatasi a le fono i a latou paketi, po o i ai se isi vaega o lo o manaomia i le paketi, sa latou taua ai lava le tulaga lelei o a latou paketi ua i ai.

 

Sei vagana ai le faatonusili o galuega a le malo ia Faleosina Voight, sa ia talosaga i le komiti ina ia toe faaopoopo se isi vaega tupe e faatupe ma faaleleia atili ai auala i totonu o le atunuu, pe afai ua tele faasea a le fono ma le atunuu i tulaga faaletonu o auala o lo o i ai.

 

E ui sa finagalo ni isi o le komiti soofaatasi e faaopoopo ni isi vaega o le paketi a le malo, ae sa finagalo le fono e ala i le fautuaga a le afioga i le taitai komiti ia Laolagi Fonoti Savali Vaeao, e le tatau ona toe faia se suiga i paketi a ofisa ma matagaluega a le malo, aua o numera ua aumai i le fono, o numera ia ua maea ona malilie i ai le kovana ma le kapeneta, ae afai foi e finagalo le kovana e faaopoopo ni isi vaega tupe i matagaluega ma ofisa o le malo, e mafai lava ona toe tuu atu i le fono se pili mo se paketi faaopoopo, ma ua sauni foi le fono e tali mai i ai i lea manaoga.

 

O le vaiaso fou lea ua faamoemoe e tatau ona pasia ai pili a maota uma e lua mo le paketi, ma tuuina atu ai loa le paketi i le kovana mo le sainia, a’o le’i amataina le tausaga tupe fou 2014 i le aso 1 Oketopa, 2014.

Comment Here