Ads by Google Ads by Google

Fa’aopoopo aofa’i aufai faatoaga o lo o sapalaia taumafa mo Aoga

I le faaiuga o le ripoti o le Kuata Lua i le Tausaga Tupe 2013 a le Matagaluega o Faatoaga ua i luma o le Kovana Sili, o lo o taua ai le siitia i luga o le aofa’i o le aufai faatoaga ua mafai ona tuuina atu la latou fesoasoani i le sapalaia lea o taumafa mo le polokalama o le "School Lunch" mo fanau aoga.

 

Mai le aofa’i e 287 sa i ai le Kuata Muamua o le Tausaga Tupe lenei, e 21 faifaatoaga fou ua mafai ona faaopoopo, ma o se ata vaaia lea ua mafai ai ona faamaonia le faaopoopo pea o tagata o le atunuu ua aga’i atu e atina’e fa’atoaga i lenei vaitau o le soifuaga, e pei ona saunoa le Faatonusili o le Matagaluega, le tofa Leala M. Purcell.

 

E ova i le 10 ituaiga fua o faatoaga e aofia ai ma fualaau aina o lo o mafai ona faatau atu e le aufai faatoaga i le Polokalama School Lunch i vaiaso ta’itasi. O fua o faaeleeleaga e pito sili ona tele pauna sa fuaina mai le aufai faatoaga i le kuata lua ua mavae atu e aofia ai le fa’i pula e 81,135 pauna; esi e 43,936 pauna; kukama e 24,345 pauna; ma faasolo atu ai loa lea i meaai masoa e pei o le taro e 14,117 pauna ma le fa’i e 13,315.

 

Na taua e Lealao i lana tusi i le kovana sili ia Lolo Matalasi Moliga, o lo o i ai le faamoemoe e unaia pea le atunuu ina ia toaaga e toto faatoaga, atoa ai ma le taumafai e faamae’a la latou polokalama mo le fausia o Saipua’a faapea ai ma Faatoaga Laauaina e toto i totonu tama’i fale (hydroponic garden).

 

O lo o i ai fo’i lona faanaunauga e una’i ma faaleleia faatoaga i totonu o Manu’a, faapea ai ma le faamae’aina o se nofoaga faapitoa e maua ai fuamoa ina ia mafai ai fo’i ona tulei lea ituaiga atina’e i le atunuu.

 

O talosaga na tuuina atu e Lealao ia Lolo e aofia ai se fesoasoani tupe a le malo mo le Talo Mua Festival a le Aufai Faatoaga o lo o fuafua e faia i le masina o Novema o le tausaga nei; o le toe faaauaina lea o le fesoasoani tau tupe sa masani ona tuuina atu e le malo mo le aufai faatoaga (subsidy), atoa ai ma le fesoasoani mo le faatauina o vailaau mea mea faalelei eleele mo le aufai faatoaga i le atunuu.

 

ATINA’E UA MAE’A ONA FAIA

 

O ni isi o atina’e tau faatoaga ua mae’a ona faataoto e le Ofisa o Faatoaga e aofia ai toga laau aina mo ni isi o Aoga Tulaga Muamua i le atunuu; tufatufaina atu o koko i ni isi o le aufai faatoaga; tufatufaina atu i tiapula i Aumaga mo ni isi o afioaga ina ia unaia ai i latou e galulue ma toto faatoaga talo; faapea ai ma le toe faatulagaina o le Maketi fou i Fagatogo.

 

O afioaga ua maea ona faasoa atu i ai le koko e aofia ai Vaitogi, Malaeloa, Malaeimi ma Mapusaga Fou.

 

E lata i le 2,000 tiapula o le Samoa 1 ma le Samoa 2 sa mafai ona tufatufa atu e le Ofisa o Faatoaga i tagata fai faatoaga eseese i le atunuu, ina ia mafai ai ona toto lea ituaiga talo ma faalautele atu i vaega eseese o le atunuu.

 

O lo o faaauau pea ona faamili e le Ofisa o faatoaga ituaiga laau eseese e aoga mo le fofoga taumafa o le atunuu i le latou nofoaga autu i Tafuna, ona o le faanaunauga ia mafai ona ola laau nei ma tufatufa atu i le aufai faatoaga.

 

I faamaumauga mai le Maketi fou i Fagatogo mo le Kuata Lua ua mavae ai, o lo o taua ai le tele o le fa’i ma le talo sa mafai ona faatauina atu e le aufai faatoaga i le atunuu.

 

I suesuega sa faia mo oloa uma o lo o ulufale mai i le atunuu i le Kuata Lua, o lo o taua ai le leai o ni faama’i poo ni manu nini’i e ono aafia ai le saogalemu o faatoaga i totonu o le teritori.

 

O le paketi a le matagaluega o Faatoaga o lo o faatupe mai i tupe lotoifale atoa ai ma tupe fesoasoani mai le feterale.