E le o toe mamao ae tatala loa le tautua a le EMS mo le Falelima i Sasa’e, atoa ai ma le fausiaina lea o se Falema’i tua mo le motu o Aunu’u, e pei ona fa’amaonia e sui o le falema’i o le LBJ ma le EMS i se iloiloga sa faia i luma o le maota o sui i le aso Faraile na te’a nei.

Na taua e Galumalemana Popo Avegalio le pulesili o le vaega a le EMS e fa’apea, o le tatalaina o le tautua mo le Falelima i Sasa’e e aofia ai le tofia o se aufaigaluega e gafa ma le ofoina atu o le tautua i lea itu o le atunuu, fa’apea ai ma ta’avale ua fa’amoemoe e fa’aleleia atili ai lea auaunaga.

O le iloiloga lenei na valaauina e le Komiti o le Soifua Maloloina a le maota o sui, ona o se talosaga na fa’atula’i e le afioga i le ali’i faipule ia Fatulegae’e Palepoi Mauga i le vaiaso na te’a nei, i le mana’omia tele lea e le Falelima i Sasa’e o le tautua a le EMS i le tele o taimi.

Na toe faatepa e Fatulegae’e le komiti ma molimau i le autu na mafua ai ona fausia lala o Ofisa o Leoleo i Tafuna ma Fagaitua i le taimi o le alii kovana ia Lutali, ina ia mafai ai ona faapipii atu ai ma isi tautua e pei o le EMS ma le Fale Tineimu.

“O la’u asiasiga sa faia ua ou maua ai, e tofu uma lava lala o Ofisa o Leoleo i Leone ma Tafuna ma lala o le EMS ma le Vaega Tineimu, sei vagana ai le Ofisa o Leoleo i Fagaitua e leai se EMS ma se Tineimu, na o leoleo o lo o galulue ai, o le fesili la ua tula’i mai, aisea ua leai ai se tautua a le EMS mo le Falelima i Sasa’e,” o le saunoaga lea a le ali’i faipule mai Vaifanua.

O le faafitauli o lo o maitauina i le taimi nei e pei ona saunoa Fatulegae’e, a oo i le taimi e manaomia mai ai se taavale a le EMS mai le Falelima i Sasa’e, e muamua suesue le tagata o lo o vili atu i le telefoni ona faatoa tali mai ai lea o le telefoni, ae a alu atu fo’i le ta’avale, e alu atu tu tu i Aua poo Onesosopo e faatali ai le ta’avale a le aiga o lo o aumai ai le ma’i, ona fa’atoa momoli lea i le falema’i mo togafitiga

Na faamalulu le pulesili o le EMS ia Galumalemana Popo Avegalio i le komiti aemaise ai le alii faipule ona o le faaletonu e pei ona maitauina i le tautua a le EMS.

O tulaga faaletonu i vaega tupe e faatupe ai le auaunaga a le EMS i tausaga ua mavae, o le mafuaaga autu lea na ala ai ona toe aveese mai tagata faigaluega atoa ai ma mea faigaluega sa i ai i le ofisa o leoleo i Fagaitua.

Ae mo le taimi nei, ua sauni le EMS mo le toe tatalaina o lana tautua i Fagaitua faapea ai ma le motu o Manu’a, ina ua mafai ona tuuina atu le paketi e faatupe ai lea auaunaga.

“O lo o i ai le faamoemoe a mae’a loa ona fa’au’u le vaega fou o  lo o faagasolo i le taimi nei a latou aoaoga ona fuafua ai loa lea o le tatalaina o se tautua mo le EMS i le Falelima i Sasa’e, e aofia ai ma le avatu i ai o ni ta’avale e fa’aleleia atili ai lea auaunaga,” o le saunoaga lea a Galumalemana i luma o le Komiti.

Saunoa Galumalemana e faapea, sa i ai lava pea le tautua a le EMS i le ofisa o leoleo i Fagaitua ina ua tatala i taimi o le alii kovana ia Lutali, ae ina ua faaletonu tulaga o le paketi a le Ofisa, na toe tapunia ai loa lea tautua i le 2007, e ui sa ia faamautu i luma o le komiti, o le tautua a le EMS mo tagata uma o le atuunuu.

O le taimi nei, o lo o manaomia ni isi taavale e faaleleia atili ai le auaunaga a le EMS, aemaise lava i ni taavale lapopo’a e mafai ona oo i auala tua pe a manaomia mai e le atunuu, e fesoasoani i taavale o lo o i ai i le taimi nei.

Na faamanino atili e le tofa a Akapo Mase Akapo le taitaifono o le Komiti Faafoe a le LBJ e fa’apea, o i latou e toa 20 o lo o aooga i le polokalame a le EMS lea o lo o fuafua e fa’au’u i le masina o Me 2014, o le a mafai ai loa ona tali atu le EMS i le manaoga e pei ona tula’i mai, o le toe tatalaina lea o lana tautua i Fagaitua ma faasolo atu ai i Manu’a.

Na fesili le alii faipule ia Talaimatai Elisara Sua ia Galumalemana ma Mase, poo i ai se fuafuaga e tatala e lala o le EMS atoa ai ma se falema’i mo le motu o Aunuu.

O le faafitauli o lo o feagai ma Aunuu e pei ona saunoa le ali’i faipule, a i ai se tagata e gasegase i le leva o le po, e faatali lava se’i ao ona faatoa momoli ane lea i le va’a i Auasi, ae ana i ai se tautua a le EMS atoa ai ma sina falema’i tua, atonu e fesoasoani lea mo le motu.

O se tasi o auala e mafai ona fesoasoani ai mo Aunuu i le taimi nei e pei ona saunoa Galumalemana, o le i ai lea o ni tagata Aunuu e a’oa’oina i auala e ofo atu ai le fesoasoani muamua mo se tasi e lavea pe aafia i se faalavelave, ae mo le Falema’i tua, na faamautu e Mase e faapea, ua uma ona sainia se maliliega i le va o le LBJ ma le Soifua Maloloina, ma ua sauni le Matagaluega o le Soifua Maloloina e fausia se falema’i tua mo Aunuu.