Ads by Google Ads by Google

Fa’amavae Jones mai le Ofisa o le Enetia a le Teritori

O le fa’amavae ai o le susuga ia Timothy Jones mai le Ofisa o le Enetia a le Teritori (TEO) i le vaiaso na te’a nei, ua tatala ai loa le avanoa i le afioga i le kovana sili ia Lolo Matalasi Moliga, mo le fa’asalalauina lea o le avanoa Fa’atonusili mo se isi tagata e agava’a i le tauaveina o lea tulaga.

 

O le amataga o le tausaga nei na tofia ai e Lolo le susuga Jones e avea ma Faatonusili le tumau o le Ofisa o le TEO, peitai na teena e le Fono Faitulafono i le masina o Mati.

 

Na toe tofia e le kovana ia Jones na te tauaveina pea lea tulaga ae toe teena fo’i e le Fono i le masina na te’a nei, ma tofia ai loa e le kovana ia Jones e avea ma Pule (Administrator) mo le Ofisa o le Enetia, a’o tau saili ai se isi e avea ma Fa’atonu.

 

Ina ua fesiligia e le Samoa News le susuga Jones i le vaiaso nei e tusa ai o lea mataupu, sa ia faamaonia mai ai lona faamavae mai lea tofiga.

 

Na taua e Jones lona aloaia o faaiuga fai a le alii kovana atoa ai ma lona naunau e fai suiga lelei mo le malo ma le atunuu.

 

Sa ia taua foi lona vaai maualuga i le alii kovana, ona o ia o se ta’ita’i e savali i upu sa ia folafola, ma o le ituaiga kovana fo’i lea e fiafia o ia e lagolago ma galulue faatasi ma ia.

 

“O ia o se tagata lelei e naunau e fai mea sili mo lona atunuu, e naunau fo’i i lana kapeneta ina ia latou tutu faatasi e faaauau pea le manu lauti e pei ona ia faalauiloa i le taimi o le palota, ia faamuamua tagata, e aunoa ma le faia o ni alofaga,” o le saunoaga lea a Jones.

 

I le ono masina talu ona tauave mai e Jones le tofiga o le faatonusili le tumau, e tele galuega lelei sa ia taua ua ia faia mo le Ofisa.

 

“O se lagona faanoanoa ia te a’u le tula’i mai o lenei faaletonu i le va o le kovana ma le fono, ma ou faia ai loa le faaiuga ou te faamavae mai le tofiga, ma lo’u faanaunauga o le a maua ai le avanoa e toe faaleleia ai le faaletonu na tula’i mai i le va o le kovana ma le fono, lea na pei e ogatotonu ia te a’u,” o le saunoaga lea a Jones.

 

Na taua e Jones i lana email i le Samoa News e faapea, ana le tuu atu atoa le lagolago a le faigamalo i le Fono Faitulafono, semanu ua faaletonu mea uma ma ua afaina fo’i tagata.

 

“Tatou te iloa uma lava le tele o le faaletonu ina ua o o atu Lolo i le ofisa, ae na tula’i mai lava le vaega e Faamuamua Tagata lea ua avea nei ma faigamalo e taitaia le atunuu ma faalelei faaletonu, e aunoa ma le manatu mo na latou lava, ae ua galulue mo tagata uma,” o le saunoaga lea a Jones e tusa ai ma lana vaai i mea o lo o tutupu i le atunuu talu ona taunuu mai i Amerika Samoa i le tele o tausaga ua mavae.

 

I le faaiuga o upu a Jones, sa ia faafetaia ai le alii kovana ia Lolo e tusa ai o le talitonuina o ia mo le galuega.

 

Na taua e Jones e faapea, o se tasi o vaega tele sa ia fesoasoani e faatula’i a’o i ai i le ofisa, o le faatulagaina lea o se ata faataoto mo le Enetia mo se lumana’i lelei o Amerika Samoa.

 

“Ou te faafetaia le alii kovana ia Lolo i lona talitonuga o a’u e mafai ona ou faia lenei galuega, ma o se lagona fiafia i lo’u tagata lo’u tu’uina atu o lea ata faataoto mo le Enetia i le alii kovana, a’o le’i teena a’u e le fono,” o le saunoaga lea a Jones.

 

Na taua e Jones e faapea, o lona faamavae ese mai i le tofiga, o se auala ua ia faia ina ia faaitiitia ai le taimi e tau finau ai le kovana i le fono mo ia, a ia faaaoga tatau loa le taimi e faaaoga ai le fuafuaga mo le Enetia lea ua ia faataotoina.

 

Sa ia taua fo’i e faapea, e ui ua faia lana faaiuga na te le toe taliaina se isi lava tofiga a le kovana mo se isi avanoa i le lumana’i, ae ua ia faailoa i le kovana lona avanoa i so o se taimi na te manaomia ai lana fesoasoani i le faaleleia o le Ofisa o le Enetia.

 

fa’aliliu Ausage Fausia