Ads by Google Ads by Google

Fa’amavae Francisco Lutu mai le HPD - Faia le Su’esu’ega

Mai le tala tusia e le HawaiiNewsNow ua fa’ailoa mai ai le fa’amavae aloa’ia o le ali’i leoleo Francisco Lutu mai lana galuega, ae ua fa’asolo ina fa’ai’ui’u le sailiga mae’ae’a a matagaluega o Leoleo i lona tu’ua’iga, o lo’o ia avea fa’anana fana ua fa’afo’i atu e tagata lautele, ina ia fa’aleaogaina.

O le fa’amavaega a lenei sui, sa faia lea i le amataga o le spring ia Me, 2012.

O le vaega o le matagaluega o leoleo i Honolulu sa faigaluega ai lenei alo o le atunu’u o le itu lea o Records & Identification Unit - fa’amaumauga ma fa’ailo ai ituaiga o au’upega malolosi ma e faia ai fo’i talosaga mo pemita e umia ai e so’o se tasi se auupega malosi pe lesitala ai fo’i fana mo le mamalu lautele. O lea vaega o le Ofisa o Leoleo (HDP) i Honolulu e i Beretania Street.

Ua fa’ailoa mai, e silia ma le 50 fana ua fa’afo’i ane e tagata i le Ofisa o Leoleo i Honolulu ina ia fa’aleaogaina ma o lea ali’i leoleo Francisco Lutu e gasolo sa’o ane i ai i latou. O le su’esu’ega o lea tu’ua’iga e fa’asaga ia Lutu na amatalia lea i le masina o Mati 2012.

Mai le sui na ia lipotia lea mataupu i le matagaluega o Leoleo, sa ia fa’amatala i le Hawaii News Now, ua atoa le iva  tausaga o faigaluega Lutu i lea vaega o le Ofisa o Leoleo, peita’i ua tu’ua’ia o ia i lona avea o fana e fa’afo’i ane e tagata i le matagaluega e fa’aleaoga, ma ia toe taumafai e fa’atau atu i nisi, peita’i, i le taimi nei, e le’i molia o ia i se solitulafono, ona e le’i iloiloa le fa’ai’uga o le su’esu’ega na fa’atautaia i ona tu’ua’iga.

Ua fa’amatala lava e sui na latou matauina aga a Lutu  e faia pe a o’o ina fa’afo’i ane se ‘au’upega malosi ia te ia i le Ofisa, e taumafai loa o ia e fa’anoi mo sana malologa, ae fa’afetauia e ia lea tagata i fafo o le Ofisa, ma tauanau ina ia avane ia te ia le fana o fia fa’afo’i ma e na te fa’ataua fo’i.

Na fa’ailoa mai e le HPD, na ave’esea uma le malosi’aga fa’aleoleo mai ia Lutu i le masina o Mati 2012, na ia fa’afo’ia ai lana pine ma le fana sa ia umia ae ua amatalia fo’i lona su’esu’ega i lea taimi. O lea ua mae’a lelei le su’esu’ega o Francisco, ma ua tatalia nei se latou fa’alauiloa mai o ni moliga e fa’asaga ia te ia pe e leai fo’i ni ona moliga.

Ua fa’ailoa mai e le Keith Kaneshiro o le sui fa’asalalau mai le Matagaluega o Leoleo i Honolulu, “Ua mae’a atoa le su’esu’ega i le taimi nei, ua taoto fo’i i luga o le laulau a vaega fa’amalosi tulafono a le matagaluega mo a latou galuega fai, ma e toe lava o le fa’ailoa mai o ni moliga o lea sui, ma fa’aauau lea o galuega e tatau ona fa’atino e le matagaluega.”

Ua tula’i mai i se taofi lava o lea sui, e tauau e i ai moliga tau le gaoi, sainia fa’aletatau ma lona faia sese o ni fa’amaumauga a le matagaluega ma le malo i tulaga tau ‘au’upega malosi.

Ua le mautinoa pe mata e fia ni fana o le a tu’ua’ia ai le sui ua ia ‘ave fa’agaoi mai le matagaluega o leoleo, pe fia fo’i ua mafai ona ia toe fa’atau atu, pe o lo’o ia taofia fo’i nei fana uma mo sana fa’aputuga mo ia lava!

saunia: Leua Aiono Frost