Ads by Google Ads by Google

Fa’amaualalo Togiola i tagata faigaluega a le EMS

Na faaaoga e le alii kovana lana polokalama i le faaiuga o le vaiaso na tea nei e momoli atu ai le agaga faamaualalo i tagata faigaluega uma o le  EMS, ona o le faaletonu sa oo i o latou totogi na se’i mavae atu, lea na mafua ai ona tuai ona maua o latou totogi.

O le faafitauli e uiga i le EMS ma lana tautua na toe manu a’e i le vaiaso na tea nei ina ua salalau ripoti i le leai lea o ni totogi a le aufaigaluega na maua e mafua mai i le leai o se tupe e faatupe ai totogi.

Na taua e se tasi o alii faipule i le Samoa News, o se tala faanoanoa lea mo tagata faigaluega uma lava o le EMS, ina ua tigaina ma pologa e tautua le atunuu ae oo atu i le aso e selesele ai o latou totogi ae le maua.

Sa ia taua foi, o le faafitauli ma le matafaioi tonu lea a le falemai o le LBJ, o i latou ia e tatau ona faatupeina le tautua a le EMS, aua o i latou lea o loo agai i ai tupe ia e totogi e tagata mai le tautua a le EMS o loo faia i le aso ma le po  mo le atunuu.

Ae na saunoa le alii kovana e faapea, o le faafituali e uiga i le EMS na afua mai i le 4 tausaga talu ai ina ua faia le faaiuga e tuu atu ai le faatautaiga  o le vaega lea i lalo o le Matagaluega o Leoleo, ina ua maea ona ia taliaina ni fautuaga mai taitai o le EMS e faapea, e tele atu le vaega tupe latou te maua pe afai e aveese mai i latou ma le falemai, ae  tuu atu i lalo o le Ofisa o Leoleo, aua e i ai isi alagatupe mai le feterale o le a latou mauaina, e fesoasoani ai i le latou tautua.

“Peitai o le faafitauli ua tulai mai, ua agai atu i le tolu tausaga talu ona aveese mai le EMS mai le falemai, sa ou vaaia ai le leai o se suiga i tulaga o tupe e pei ona folafolagaina, ae ua agai atu ina pagatia ai le malo e faatupe galuega a le EMS, ma ou faia ai loa ma le faaiuga e sili ona toe faafoi le EMS i le LBJ,” o le saunoaga lea a le  alii kovana.

O le agaga o le malo e pei ona saunoa Togiola, e sili le toe faafoi o le EMS i le falemai, ona matua faasaga lea o le falemai e tapena ia lelei tulaga uma aua e fesootai lelei foi a latou tautua ma galuega.

Ae ina ua faia le fesuiaiga, sa tapa e le falemai poo fea le  tu pe e totogi ai tagata faigaluegaa le EMS, peitai sa  faailoa i ai e le alii kovana, e leai se tupe faasoasoa na o mai ma le EMS aua o le talitonuga, e saili lava e latou tupe mai a latou tautua e totogi ai latou.

Ae o le faafitauli na tulai mai i totogi o nai tagata faigaluega, na avea lea ma itu na lagona ai e le alii kovana lona alofa i aiga o i latou nei, ona o le a aafia atu ai i nei faafitauli.

Saunoa Togiola, ina ua aveese mai le EMS mai lalo o le falemai ae tuu atu i lalo o le Ofisa o Leoleo, o le malo sa faatupeina galuega ma gaioiga uma a lea vaega, e faatalitali ai vaega tupe ia sa latou folafola  o le a maua mai, peitai ina ua alu tausaga, sa ia maitauina ai, e leai ma se sene apa e tasi o maua mai i folafolaga sa faia, ma ia manatu ai loa ua tatau ona toe faafoi le EMS i le falemai.