Ads by Google Ads by Google

FA’AMATA E TOE I AI SE ISI SI’ITAGA PILI A LE FALEMA’I?

E ui o lea ua faalauiloa e le pulega a le falemai o le LBJ la latou faaiuga ina ia tolopo a latou siitaga lea sa fuafua e faia i le aso 21 Me, peitai o le fesili lea ua faatulai mai e misi o le atunuu, pe faamata e toe i ai se isi siitaga i tua atu o le siitaga lea ua toe tolopo.

O le faaaliga na tuu mai e le pulega a le falemai, o le masina o Iuni lea o loo fuafua e toe asiasi ai i le latou fuafuaga e faatulai siitaga i totogi o ana tautua, peitai na faaalia e nisi o le atunuu e faapea, afai ua finagalo le pulega a le falemai e toe tolopo a latou siitaga, o lona uiga o le faaiuga sao lea ua latou faia, e le tatau foi ona toe i ai nisi siitaga i luma atu o siitaga ia sa latou fuafuaina.

Fai mai nisi na valaau mai i le Samoa News, afai e faatali teisi le falemai sei toe tauaofia le fono faitulafono ia Iulai, e mautinoa e maua se fesoaosani tupe mai pili a le kovana o loo taoto i ai i luma o le Senate.

O le toatele o tagata latou te le o taliaina siitaga a le falema’i, o tagata mai fafo e le o agavaa i latou ona avea ma tagata nofomau i le teritori, e ui o loo agavaa ona alala ma aumau i latou i le teritori i le taimi nei.

“Afai e faatusatusa le tulaga taugata ua i ai le tau o le soifuaga i le taimi nei, totogi o pili a le ASPA faapea ai ma pili a le falemai, o lona uiga ua le aai le aiga pe a maua mai le totogi o le tagata faigaluega i le vaiaso,” o le finagalo lea o le alii o Alesana Afamasaga.

Ae na taua e se tina talavou e galue i se tasi o Faleoloa i le taulaga e faapea, ua foliga mai e tasi lava le mafuaaga e ala ai ona faigaluega le tagata, o le totogiina lea o pili a le ASPA, pe ave ai foi se isi o lana fanau i le falemai, ae ua leai se avanoa e atina’e ai aiga.

Na pau le itu o loo tete’e i ai le toatele i pili fou ia a le falemai, ona o loo mamafa a latou siitaga i tagata mai fafo e lei avea ma tagata nofomau i totonu o le teritori.

Na taua e se tamaitai e galue i le kamupani i’a a le StarKist Samoa e faapea, e le taitai gafatia e lona aiga siitaga fou a le falemai lea ua faalauiloa mai, pe afai e ova ma le $100 e totogi e le tagata e vaai ai le foma’i, ae ese ai foi le totogi o talavai ma isi tautua.

Fai mai le molimau a le alii pule o le falemai ia Michael Gerstenberger e faapea, o le tele o pili a tagata o loo i ai e lei totogiina, ua sauni le pulega a le falemai e faamalosia le toe totogiina, ina ia aua nei toe avea ma faafitauli i le falemai i se taimi o i luma.

O le faafitauli o loo feagai ma le falemai i le tau aoina mai lea o pili a tagata, o le toatele o i latou o loo i ai aitalafu ua tuua le atunuu ma ua mautinoa e le mafai ona toe maua mai nei vaega tupe.

E ui i taumafaiga uma a le falemai, fai mai le alalaga a nisi o le atunuu, talosia ae aua nei toe faia nisi siitaga i se taimi o i luma, ae faalagolago pea i se  fesoasoani mai le Fono Faitulafono.