O faamaumauga sa iloiloina e se vaega iloilo a le Feterale ua mafua ai ona faia se faamasinoga fou faasaga i le alii o Kaisa ma lona uso o Louis Tai, faasaga i le umia o fualaau faasaina, e ui o lea faamasinoga fou e le o aofia ai lo la uso matua o John Tai.

O Kaisa ma Louis na taofia faapagota atu i le teritori nei i le tausaga na te’a nei, ma auina atu ai laua i Honolulu mo le faia faatasi o le latou faamasinoga ma se isi alii i tulaga lava o le umia o fualaau faasaina, ae o le la uso o John na faatoa taofia mulimuli ane ai e FBI i lona fale i Kalefonia, ma auina atu ai loa foi lea o ia i Honolulu.

O le masina la na te’a nei na tali ioe ai John Tai i luma o le faamasinoga feterale i ona moliaga, i le tuana’i ai lea o nai aso talu ona loka mai e FBI nisi se toafa i Honolulu, ma taua ai e i latou nei, o John Tai, o ia lea o loo faauluulu i ai le faalapotopotoga o loo latou fela’uaina fualaau faasaina.

O se tasi o loo tuuaia i lenei mataupu o ia lea o Sifatutupu Fuamatu, lea o loo tuuaia e le  feterale i lona faaaogaina o lana pine faaleoleopo (security) ina ia le mafai ai e leoleopo o le malae vaalele ona suesueina o ia, ma mafai ai ona kiliva atu tupe o fualaau faasaina i Kalefonia.

O le tamaitai o Fuamatu o se tagata faigaluega i le kamupani vaalele a le  Delta Air Lines i le malae vaalele i Honolulu.

FAAMASINOGA FOU

O faamaumauga ia ua faatulaga mo le faamasinoga fou o loo tuuaia ai nisi sa aafia i se faamasinoga tau i fualaau faasaina mai le tausaga na te’a nei, lea foi e aofia ai Kaisa ma Louis ma isi e pei o Sifatutupu Fuamatu ma Falefia Fuamatu, ae o i latou uma e le o aofia ai i faamaumauga mo le faamasinoga fou, ua maeao na latou tali ioe i o latou molimaga, ma o loo faatalitali le taimi e lau ai a latou faasalaga.

O isi o loo tuuaia i lenei mataupu fou e aofia ai Fouina C.Toilolo, Aloalii Tootoo, Harry Akana, Daniel Fola, Walter Dominguez, Larry Hoohena Chung ma Lloyd Talia.

O loo tuuaia e le feterale i latou nei i lo latou iloaina lelei lea o gaioiga i le fela’uaina o le tusa ma le  400 pauna o le aisa ma faatau atu i isi tagata, atoa ai foi ma le faasoaina atu o tupe sa maua mai ai.

Mo se  faataitaiga e pei ona taua i faamaumauga a le feterale o loo taua ai e faapea, i le aso 23 Fepuari 2010, na sapalai atu ai pauna e 4 o le pauta o le aisa mai ia John Tai agai atu ia Dominguez, mulimuli ane kiliva atu ia Tootoo mo le faatauina atu i isi tagata.

O loo taua ai foi e faapea, i le va o le aso 24 Me ma Aokuso 30 2010, e tusa ma le $70,000 na faasoa atu i le va o i latou sa aofia i le faatauina atu o lenei fualaau faasaina o le  aisa.

O loo taua foi i faamaumauga a le feterale e faapea, sa faapea foi ona fesuiai tupe i le va o i latou nei o loo aafia i lenei mataupu, mo le faatauina atu o fualaau faasaina, ae i le masina o Me 2011,e tusa ma  le 174 pauna o le aisa na aumai mai Kalefonia ma auina atu ia Chung i Hawaii mo le faatauina atu.

O le aso 18 Setema, na lele mai ai Falefia Fuamatu mai Honolulu ma agai atu i Los Angeles mo le kilivaina atu lea o le $350,000 sa maua mai i le faatauina atu o fualaau faasaina ia Dominguez, ae o le aso na sosoo ai na lele mai ai Sifatutupu Fuamatu mai Honolulu ma agai atu i Los Angeles mo le kilivaina atu o le $604,075 sa maua mai i fualaau faasaina ia Dominguez, e pei ona tuuaia ai i latou nei e le feterale.

O le uta mulimuli o aisa lea e tusa lona mamafa ma le 118 pauna na aumai ia Dominguez ma faasoa atu i le masina o Mati o le tausaga na tea nei, e pei ona taua i faamaumauga a le feterale, ma totogi atu ai se vaega tupe e tusa ma le $150,000 i se tasi sa aofia ai i le faatauina atu o nei fualaau faasaina.

O le aso Gafua na tea nei na tutulai uma ai i latou nei i luma o le faaasinoga  feterale  ma ua  latou teena uma tuuaiga a le malo.

fa’aliliu Ausage Fausia