O le taeao ananafi na ta’usalaina ai e le Faamasinoga Faaitumalo le alii o lo o faauluulu i ai le Ofisa o le Puipuiga o le Gataifale a le malo tele o Amerika, le U.S Coast Guard, susuga Lt. Steven Caskey, i le solitulafono mama o le ave ta’avale fa’atamala,

E lua moliaga mama na tuuaia ai e le malo ia Lt. Caskey, o le ave taavale ‘ona faapea ai ma le ave taavale faatamala, ae i se maliliega na sainia e itu e lua, ua solofua ai le moliaga o le ave taavale ‘ona, ae tali ioe Lt. Caskey i le moliaga o le ave taavale faatautala.

I le vaega o le maliliega lea ua talia e le faamasinoga, na talosaga ai le malo ina ia solofua le moliaga o le ave taavale ‘ona, ae suia le moliaga muamua i le ave taavale faatautala, o se solitulafono e mafai ona faasala ai o ia i le falepuipui mo le 6 masina, pe faasala i le salatupe e $500, poo faasalaga uma ia e lua.

Na talosaga foi loia ina ia sei le laisene a Lt. Caskey mo le 45 aso, ma ia faatonu o ia e alu e faatoese i le leoleo sa faia lana mataupu.

Sa fautua loia i le faamasinoga ina ia faanofovaavaaia le ua molia mo le ono masina, ma ia poloaina o ia e auai i ni aoaoga e fesoasoani ai i le tagofia o le ava malosi, peitai na faailoa e le faamasinoga ia Lt. Caskey, e pule le faamasinoga i le ituaiga faasalaga e faasala atu ai o ia.

O loo fautuaina foi e loia le faamasinoga ina ia aua nei i ai se faasalaga faafalepuipui e tuuina atu i le ua molia.

I faamaumauga a le faamasinoga na taua ai e faapea, na maitauina e alii leoleo le taavale a le ua molia i luga o le alatele i Pago Pago i le aso 30 Tesema, ma vaaia ai le tifa i le isi itu ala, ma toeititi ai lava fetoai ma le taavale sa o atu ai alii leoleo.

Na tuli e le taavale a leoleo le taavale a le ua molia, ma fesiligia ai loa e le alii leoleo suesue o Det. John Paselio le ua molia i le mafuaaga ua ala ai ona taofi lana taavale, ina ua toeititi lava fetoai ma le la taavale, peitai na tali le ua molia, na punou i lalo e piki mai luga lana sikaleti na pau, atonu o le mafuaaga lena o le tifa o lana taavale.

Na faalogoina e leoleo le malosi o le manogi o le ava malosi na alu atu i le tino o le ua molia, atoa ai ma le mumu o ona mata.

Na fesiligia e leoleo le ua molia pe sa ia tagofia le ava malosi, na tali le ua molia, e lima ana fagu Coors Light na inu i le Runway Bars ina ua faatoa ulufafo mai i le Hawaiian Air i le po lea.

Sa faia se suega i le tino o Lt. Caskey e leoleo i le po lea ma faamaonia ai le malosi o le ava i lona tino, ma taofia ai loa o ia i le toese e faatali ai le aso e tulai ai i luma o le faamasinoga.

O lo o tumau pea poloaiga a le faamasinoga o loo tatala ai Lt. Caskey i tua e faatali ai le lauina o lana faasalaga i le faaiuga o le masina nei.

O le alii loia fautua ia Blake Hanley o loo tulai mo le malo, ae o Sharron Rancourt o loo tulai mo Lt. Caskey.