Ads by Google Ads by Google

Fa’amaonia Senatoa to’alua ma le Faalupega Itumalo Maoputasi

O le feiloaiga a le Itumalo a le Maoputasi i le malae i Gagamoe i le faaiuga o le vaiaso na te’a nei, na faamaonia ai ana tofi Senatoa e lua ma le Faalupega mo le nofoaiga fou o le a sosoo ai, sei vagana ai le isi tofi Senatoa e tasi e le’i maua i ai se tasi.

O le afioga i le Maoputasi ia Mauga Tasi Asuega, o ia lea ua faamaonia o le a avea ma Senatoa o le afioaga o Pago Pago, a’o le afioga i le Tapunuu ia Fa’agata Mano Fa’agata o le a fai ma Senatoa o Fagatogo, Utulei ma Fagaalu.

O le tofi Faalupega lea o lo o umia e le afioga Faumuina Tagisiaali’i mai Leloaloa i le taimi nei, ua see atu nei i Fagatogo, ma ua faamaonia ai le tofa Taamu Iakopo Vaigafa e fai ma Faalupega o le Itumalo atoa o le Maoputasi mo le isi 4 tausaga.

E le’i faigofie le fonotaga ina ua oo atu i le tofi Senatoa o Leloaloa, Atuu ma Aua, e le gata na siisii finagalo o ni isi o lo o tauva mo lea tofi, ae na faafofogaina foi ni isi o saunoaga ogaoga mai taitai o le Itumalo, peitai e ui i le vevesi ma le faigata o le talanoaina o lea mataupu, ae na faatoatoa lava e le afioga i le Tuua, le tofa Tuaolo M. Fruean le faatautaiga o le fono, ma faai’uina ai le fonotaga a le itumalo i le manuia.

Talu ai e le’i maua lava se tasi i le tofi Senatoa a Leloaloa, Atuu ma Aua, ua fautuaina ai e le afioga i le Maoputasi ia Mauga le faletolu ina ia toe foi e soalaupule ma saili sa latou tasi, ao le’i toe fono le Itumalo i le afiafi o le aso Lulu o le vaiaso nei, mo le faamautuina o tofi uma o le itumalo.

Na finau le afioga a Faumuina Tagisiaali’i, o ia lea o lo o avea ma Faalupega a le Itumalo i le taimi nei, o ia ua tasi i ai lona nuu o Leloaloa e fai ma Senatoa mo le nofoaiga o le a sosoo ai nei, peitai sa finau mai fo’i le tofa a Paopaoailua Joe Fiaui, o ia lea ua tasi ai lona nuu o Aua e avea ma Senatoa.

Na faailoa e le afioga Mauga i le feiloaiga a le Itumalo e faapea, afai e toe fono le Itumalo i le aso Lulu o le vaiaso nei ae le’i maua lava se tasi i le va o Faumuina ma Paopao, o le a ia faia le faaiuga ma tofia se tasi e fai ma Senatoa, ma o se faaiuga e le manatu le afioga Faumuina e tatau ona tupu.

Na umi se taimi o fefaloai le mataupu a Leloaloa ma Aua e faatatau i le tofi Senatoa, na finau Faumuina o ia lea ua tasi i ai lona nuu o Leloaloa, peitai sa finau mai foi le tofa Paopaoailua e faapea, o ia lea ua tasi i ai lona afioaga i Aua.

Sa manatu le afioga i le Tuua ia Tuaolo e faia lava le faaiuga o le mataupu a Leloaloa ma Aua i le aso Toona’i na te’a nei, ae talu ai ua vave saunoa le afioga i le Maoputasi, ua manatu ai loa o le a moe le toa ae se’i toe soalaupule se isi e avea ma Senatoa.

Na taua e le afioga Faumuina i le Samoa News e faapea, o lo o manino lava le mataupu e faatatau i le tofi Senatoa o le latou itumalo, o Leloaloa lea ua oo i ai le faasologa.

O le 2008 na toe tofia ai le afioga ia Liufau Tanielu Sonoma e avea ma Senatoa o Leloaloa, Atuu ma Aua, peitai ina ua tuumalo le alii afioga Liufau i le 2009, na toe filifili ai loa se isi na te faaauauina le tofi o le Itumalo.

Ae talu ai e lei maua se tasi i le va o Paopaoailua ma afioga i Faasuaga o le afioaga o Leloaloa poo ai e faaauauina le tofi o le itumalo, na faia ai loa e le afioga i le Maoputasi ia Mauga le faaiuga, o le a malolo Aua ma Leloaloa ae avea o ia e fai ma Senatoa na te faaauauina le tofi a le Itumalo e oo mai i le taimi nei.

“Ou te le mana’o e toe tupu le mea lea na tupu i le 2009, ae ou te manatu ia maua se tasi o le matou itumalo i le isi a matou fono lea o le a sosoo nei,” o le saunoaga lea a Faumuina, ma ia faamaonia mai ai, o le itula e 3:00 i le afiafi o le aso o le a toe fono ai le latou itumalo mo le talanoaina o lenei mataupu.

 ITUMALO O ALATAUA

O le vaiaso na te’a nei na lomia ai i le Samoa News se ripoti e faatatau i le tofi Senatoa o le Itumalo o Alataua, ina ua maea ona faamaonia mai e le afioga i le alii Senatoa ia Fuamatu J.V Fuamatu le faaiuga o le fonotaga a le itumalo, e pei ona tasi ai i le tofa i le tau tootoo ia Faletogo Tafavalu Taliloa.

Ae ina ua fesiligia e le Samoa News ni isi o Faasuaga o le Itumalo i le vaiaso na te’a nei, na faamaonia mai ai e i latou ia e toatolu, e le o le sa’o lea o le iuga o le fono a le itumalo e pei ona taoto ai, e lei filifilia foi le tofa i le tau tootoo ia Faletogo e fai ma Senatoa o le Itumalo.

O se taimi o le masina nei o le a toe fono ai le Itumalo o Alataua mo le faamautuina o le latou Senatoa, ona toe fofogaina foi lea o le atunuu e tusa ai o lea faaiuga.

ITUMALO O TUALA-TAI, MANU’A #2

O tulaga faaletonu o le tau na mafua ai ona le faataunuuina fonotaga a ni isi o Itumalo sa fuafua e faia i le aso Toona’i na te’a nei.

I se feiloaiga ma le afioga Tuiasina mai le Itumalo o Tuala-tai sa ia faamaonia mai ai e faapea, o tulaga louloua o le tau na mafua ai ona toe tolopo le fono a le Itumalo sa fuafua e faia i le faaiuga o le vaiaso na te’a nei, ma ua faatulaga e faia i le aso Lulu o le vaiaso nei.

Ae mo le itumalo o Manu’a #2, sa lei faataunuuina foi la latou fonotaga sa fuafua e faia i le aso Toona’i na te’a nei, ona o tulaga faaletonu o femalagaaiga mo Manu’a.

I se feiloaiga ma le tofa i le tootoo ia Malemo Tausaga i luga o le telefoni i le aso ananafi, na faamaonia mai ai e Malemo e faapea, o le fono a le Itumalo lea sa fuafua e faia i le aso Toona’i na te’a nei, ua toe faatulaga i le aso Faraile o le vaiaso nei.