Ads by Google Ads by Google

Fa’amaonia moliaga tau mulimuli i se teineititi 14 tausaga

O le ulua’i alii lea na tu’uaia e le malo i le tausaga na te’a nei, i le solitulafono, o lona taumulimuli i se isi tagata, ina ua fa’atoa pasia le tulafono lenei i le 2010, sa ia ta’utino i luma o le Fa’amasinoga Maualuga, e fa’amaonia tu’uaiga uma ma fa’amatalaga a le malo fa’asaga ia te ia, e tusa ai o le fa’alavelave sa tulai mai i le tausaga na tea nei.

Na fa’ailoa e le alii o Tasesa Kuresa, 37 tausaga le matua mai Pago Pago, e ui lava sa fai atu le teineititi na a’afia ia te ia e ‘aua ne’i ona toe fa’alavelave atu ia te ia, peita’i sa le mafai ai ona taofia lona tauanauina o le teineititi, ina ia la o i lana ta’avale.

O Kuresa na ulua’i tu’uaia e le malo i le moliaga mamafa e tasi, o lona taumafai e faalavelave i se teineititi e laititi i lalo o le tulafono, atoa ai ma moliaga mama e fa e aofia ai le faatupu vevesi i nofoaga faitele, faia o ni gaioiga e ono lamatia ai le saogalemu o se fanau e laititi i lalo o le tulafono, faaoolima i le tulaga tolu ma le taumulimuli i se isi tagata.

Ae i le maliliega lea ua maea ona latou sainia ma le malo ma ua talia e le faamasinoga maualuga, ua ia tali ioe ai i moliaga mama e tolu e aofia ai le faatupu vevesi i nofoaga faitele, faia o ni gaioiga e ono lamatia ai le saogalemu o se fanau e laititi i lalo o le tulafono ma le taumulimuli i se isi tagata, ae solofua ai e le faamasinoga isi moliaga e lua o loo totoe ai.

I le moliaga o lona faia o ni gaioiga e ono lamatia ai le saogalemu o le teineititi na aafia, na tautino ai Kuresa e faapea, o aafiaga na oo i le mafaufau, lagona ma le soifua maloloina o le tamaitai e 14 tausaga na aafia, na mafua mai lea ina ua faaauau pea ona ia tauanauina o ia la te o i lana taavale, e ui sa musu o ia la te o.

I le moliaga o le tau mulimuli, na taua ai e Kuresa i le faamasinoga e faapea, sa ia taumulimuli i le teineititi e 14 tausaga na aafia ma ia tauanauina o ia la te o i lana taavale, peitai sa musu le teineititi la te oe, ae sa ia taumulimuli pea i ai ma ia tauanauina o ia la te o.

I se vaega o le maliliega o loo taua ai e faapea, a’o nofonofo le teineititi i le fale faatali pasi i Fagaalu, na agai atu le ua molia ma tauanau o ia la te o, peitai sa musu le teineititi ae sa faaauau pea ona faia e le ua molia lea gaioiga, ma vaaia ai loa le matua fefe o le teineititi na aafia.

Na fesili le alii faamasino sili ia Michael Kruse i le alii ua molia, pe sa fefe le teineititi i le taimi na ia taumafai ai e tauanau o ia ma ia taumulimuli ai foi, na tali Kuresa ‘ioe’.

Sa toe fesiligia foi e le alii faamasino sili le ua molia, pe o le a sona mafaufau pe a fuafua atu i ona tausaga ma tausaga o le teineititi na aafia, pe o se mea talafeagai lana gaioiga sa faia, na tali le ua molia, “e le talafeagai i se tagata e 37 tausaga le matua ona ia aveina se teineititi e 14 tausaga i totonu o lana taavale.”

I vaega o le maliliega faapea ai ma faamaumauga a le faamasinoga o loo taua ai e faapea, o le aso 15 o Mati 2011 na tulai mai ai lenei mataupu ao faatalitali se pasi a le teineititi na aafia i le fale faatali pasi o loo i luma o le falemai o le LBJ i Fagaalu, ae agai atu loa lea ua molia i se taavale SUV ua tu i luma o le teineititi, ona fesili lea i ai o le ua molia pe mana’omia sana se taavale  e momoli ai o ia, ae na tali le teineititi e leai, ma faasaga i le isi itu.

Na taua i faamaumauga le agai atu o le ua molia ua paka lana taavale, ma savali mai loa ua nofo i tafatafa o le teineititi, ona tuu lea o ona lima i ogavae o le teineitiiti (tulou) ma taumafai e milimili ona vae.

Na lagona e le teineititi lona fefe ma le le mautonu, o lea na tu ai loa i luga ma savali agai atu i le isi itu o le auala ma agai atu ai i le faleoloa o loo i luma o le auala i Fagaalu ma faatau ai, ona toe savali atu loa lea i le fale faatali pasi o loo i le isi itu auala ma faatali ai lana pasi, peitai sa oso le ua molia i lana taavale ma toe mulimuli atu ai, ma ia tauanauina pea le teineititi e oso atu i totonu la te tietie i lana taavale.

E lei umi se taimi ae sau loa le pasi ma oso ai loa le teneititi na aafia ma alu ai loa, peitai sa valaau atu i ai le ua molia, “ou te alofa ia te oe.”

O loo tumau pea poloaiga a le faamasinoga o loo tatala ai le ua molia i tua e faatali ai le aso lea ua faatulaga e lau ai lona faasalaga.

O le tamaitai loia fautua ia Sharron Rancourt o loo tulai mo Kuresa ae o le tamaitai loia ia Mitzie Folau o loo tulai mo le malo.

O alii faamasino lagolago ia Logoai Siaki ma Faamausili Pomele na lagolagosua i le faamasino sili i le faatautaiga o lenei mataupu.