Ads by Google Ads by Google

Fa’amaonia moliaga o se tama’ita’i sa galue i se kamupani Inisiua

Ua ta’usalaina nei se tamaitai talavou sa galue i le kamupani Inisiua o le South Seas Insurance i moliaga mamafa e lua o lona faaaoga faasolitulafono o tupe sa totogi atu e ni tagata mo a latou Inisiua, atoa ai ma le moliaga o le gaoi, ina ua ia faaaoga se vaega o le tupe e totogi ai lona pasese i le Hawaiian Airlines.

E fa moliaga mamafa na tuuaia ai e le malo Katerina Siliga mai mataupu eseese e tolu sa tuuaia ai o ia, lea na aofia ai moliaga e tolu o lona faaaoga faasolitulafono o tupe sa tuuina atu i lalo o lana vaavaaiga, ma le moliaga e tasi o le gaoi.

I se maliliega ua sainia e Siliga ma le malo, ua malie ai Siliga e tali ioe i moliaga taitasi, ma afai ae talia e le faamasinoga, ona talosaga lea o le malo e solofua le moliaga e tasi o lo o totoe.

Sa tautino Siliga i le faamasinoga e faapea, i le va o Novema 2011 ma Iulai 2012, sa ia faaaoga ai faasolitulafono tupe sa totogi atu e se auuso tamaitai mo inisiua a o la matua.

E $104 sa totogi e le isi tamaitai ae $120 sa totogi e le isi, ma o ia tupe sa piki mai e le ua molia mai tamaitai ia e toalua, ina ia taofia ai le tigaina e tau o i le Ofisa e totogi ai.

I le masina o Aokuso 2012, na o ai tamaitai ia e toalua e siaki le tulaga ua i ai Inisiua a la matua i le Ofisa o le South Seas Insurance, peitai sa faailoa ane i ai e se sui o le Ofisa, e leai se inisiua a la matua ua taunuu atu i le latou Ofisa.

I le mataupu lona lua lea e pei ona tali ioe ai Siliga i le moliaga o le gaoi, sa ia tautino ai e faapea, i le aso 3 o Iulai 2012, sa tuu atu ai e sana uo ia te ia le $900 ma le faamoemoe e totogi ai pasese a ni tagata se toalua i le Hawaiian Air. Na tautino Siliga sa ia faaaoga le $200 o le tupe lea ae toe faafoi le $700 i lana uo.

I le moliaga o le fa’aaoga faasolitulafono o tupe, ua ioe ai Siliga e faapea, i le va o le masina o Me 2011 ma Iuni 2012, sa ia fa’aaoga faasolitulafono ai tupe sa totogi atu e se alii mo le Inisiua a lona tama.  E $84.20 na totogi i masina taitasi i le va o o Me 2011 ma Aokuso 2011, ae ina ua o’o mai ia Iuni 2012, sa ia totogi ai le $127.78 i le masina.

O le masina o Me 2012 na maliu ai le tuaa a lea alii, ae ina alu atu lenei alii e tala mai le Inisiua a lona tama, sa faailoa ane i ai e le ofisa inisiua, e leai se inisiua a lona tama i a latou faila.  Ae ina la talanoa ma Siliga, sa faatoese i ai le ua molia ma fai i ai, ua uma ona la faaaogaina le tupe ma se tasi o ana uo, ae ua sauni e toe totogi atu lana tupe.

E $3,158.15 le aofa’i atoa o le tupe mai mataupu eseese nei e tolu ua malie Siliga o le a ia toe totogi atu, ia i latou sa aafia i lana solitulafono.

O lo o taofia pea Siliga i le toese i Tafuna e faatali ai le aso 15 o Fepuari, lea ua faatulaga e lau ai lona faasalaga.

O le toatolu ai lea o tagata faigaluega i Ofisa Inisiua ua molia i lo latou ave faagaoi o tupe sa totogi atu e tagata mo feagaiga a latou taavale.

O tamaitai e to’alua na galulue muamua i le kamupani a le Florence Saulo & Associates Insurance na ulua’i tuuaia e le malo i ituaiga mataupu nei, ma ua faamoemoe o le Aso Faraile nei e fofogaina ai a laua faasalaga i luma o le Faamasinoga Maualuga.