Ua tausalaina nei e se vaega iloilo i'uga e to'a 12 le ali'i sa avea ma se tasi o pule i le Ofisa o A'oga a le malo o Paul Solofa, i moliaga e lua sa tu'uaia ai o ia e le malo feterale, o lona taumafai lea e fa'alavelave i molimau a le malo, atoa ai ma lona fa'alavelave i galuega a le Fa'amasinoga ao su'esu'eina le mata'upu e uiga i le fa'atauina atu lea o totoga o pasi a'oga i le Ofisa o A'oga a le malo.

O le aso 27 Aperila lea ua fa'atulaga e lau ai le fa'asalaga o Solofa, i le mae'a ai lea ona tu'uina mai e le vaega iloilo i'uga o la latou fa'ai'uga i le aso ananafi i le fa'amasinoga i Uosigitone, ma ua feagai nei o ia ma se fa'asalaga e ono mafai ona fa'asala ai o ia i le falepuipui mo le umi e le sili atu i le 20 tausaga, po o le salatupe e $250,000 i lona fa'alavelave lea i molimau a le malo, ae 10 tausaga i le falepuipui po o le salatupe e $250,000 i lona fa'alavelave i galuega a le fa'amasinoga.

Na ta'ua e le sui so'o'upu o le FBI mai Hawaii o Tom Simon le fa'aauau pea lea ona molia e le FBI o so o se tasi e taumafai e fa'alavelave i galuega a le feterale.

Sa aofia ai le FBI i le su'esu'eina o lenei mata'upu, lea na amata alia'e mai ina ua su'esu'e e le Komisi Su'esu'e a le Senate i le 2004, ma tu'uina atu ai loa e le komiti fa'ai'uga o lana su'esu'ega sa faia e sui o le feterale.

Sa fa'apea fo'i ona fa'ataunu'uina se su'esu'ega a le  Matagaluega o Leoleo a le atunu'u i lenei mata'upu, ma tu'uina atu ai fo'i fa'ai'uga o a latou su'esu'ega i le feterale, peita'i e leai ni moliaga na faila fa'asaga i ia su'esu'ega.

O le masina o Setema 2010 na taofia fa'apagota ai e le feterale Solofa mai le nofoaga o lo o i ai le Ofisa o le school lunch a le Ofisa o A'oga, i le mae'a ai lea ona tu'uina mai o se fa'ai'uga a le vaega iloilo fa'ai'uga e fa'amaonia ai le failaina lea o moliaga fa'asaga ia te ia.

E taofia fa'apagota le susuga Solofa, lea ua 51 tausaga o lona soifua mai lona Ofisa, ao avea o ia ma pule o le polokalama o le School Lunch a le Ofisa o A'oga a le malo. Na ta'ua i fa'amaumauga a le feterale e fa'apea, o le 2008 na amata ai a latou su'esu'ega i le mata'upu e uiga i le fa'aaogaina lea o ni faiga fa'aalatua e aofia ai le totogiina atu o tupe i le fa'atauina mai o totoga o pasi a'oga, atoa ai ma le le totogiina atu lea o tupe i kamupani sa feso'ota'i ma le malo o Amerika Samoa i le fa'atauina mai o totoga o pasi a'oga.

Na ta'ua fo'i i mau fa'amaonia o lenei mata'upu le talanoa lea o Solofa ma se tasi o sui o se kamupani sa fa'atauina mai totoga o pasi a'oga ia Aperila 3 2009, ma fa'ailoa ai loa e le sui lea ia Solofa le aga'i mai o FBI mo le fesiligia ma fa'atalatalanoa kamupani sa latou okaina mai totoga o pasi a'oga.

Ma o le kamupani lea o lo o ta'ua i fa'amaumauga a le fa'amasinoga feterale o le Samoa Products Ltd.

I se fa'atalatalanoaga a Solofa ma le sui o le kamupani lea sa pu’eina na fa'ailoa ai e Solofa e fa'apea, e le mafai e FBI ona o latou faia ni isi lava gaoioiga e su'esu'eina ai ni mata'upu e aofia ai tulaga tau tupe, e le mafai fo'i e le FBI ona o latou tulituliina kamupani o lo o a'afia i lenei mata'upu.

“Tusa lava fo'i pe e te fai i ai sa e tu'uina mai se tinoitupe ia te a’u, ou te tali ai fo'i e leai. E le mafai ona o latou talitonu i lau tala e uiga i tupe, aua o ni tala fa'alogo tala na,” o ni isi ia o mau na tu'uina atu e le malo i le taimi o le fa'amasinoga.

E le gata i lea, o isi mau sa tu'uina atu e le malo i le taimi o le fa'amasinoga e aofia ai le isi feiloa'iga lea na faia e Solofa ma le sui o le kamupani lava lea i le aso 14 Aperila 2009, lea na fa'ailoa ai loa e le sui lea ia Solofa e fa'apea, ua poloaina e se vaega o lo o latou iloiloina moliaga fa'asaga i lenei mata'upu fa'amaumauga mai lana kamupani, ma o ni isi o ia fa'amaumauga e feso'ota'i lea i le mata'upu e uiga i le fa'atauina atu o totoga o pasi a'oga.

I le mae'a ai o lea talanoaga, na fa'ailoa ai loa e Solofa i le sui o le kamupani lona le mana’o e tu'uina atu ni fa'amaumauga i le vaega a le feterale.

Sa ia faailoa fo'i i ai, “pau le 'auala e mafai ona fai i fa'amaumauga ia o le susunu, ina ia le mafai ai ona latou va'ai i ai, ona leai fo'i lea o se mea o le a popole ai fua ma oe ia, pau lava le mea e fai o le susunu o pepa na.”

faaliliu Ausage Fausia